ខេត្តកណ្តាល៖ រថយន្តធុនធំផ្ទុកអុសពេញទ្រុងបើកលើកំណាត់ផ្លូវលេខ១១៥ចុះពីស្ពានព្រែកសំរោង បណ្តាលឲ្យទាក់ជាមួយខ្សែភ្លើងកាត់ទទឹងផ្លូវបណ្តាលឲ្យទុស្សេបង្កជាគ្រោះអគ្គីភ័យឆាបឆេះយ៉ាងសន្ធោសន្ធៅ ។
កាលពីវេលាម៉ោង១៩និង៣០នាទី ថ្ងៃទី២៨ ខែកញ្ញា ឆ្នាំ២០១៥ ត្រង់ចំណុចបង្គោលភ្លើង ក្នុងបរិវេណរបងសាខាកាកកបាតក្រហមកម្ពុជាខេត្តកណ្តាល តាមបណ្តោយផ្លូវលេខ២១Bកែងផ្លូវ១១៥ ស្ថិតក្នុងភូមិព្រែកសំរោង សង្កាត់-ក្រុងតាខ្មៅ ។
ប្រភពពីមន្ត្រីនគរបាលក្រុងតាខ្មៅបានឲ្យដឹងថា រថយន្តបង្កម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ3B-7568 បើកបរដោយឈ្មោះ ប៉ិច វិចិត្រ ភេទប្រុស អាយុ២៥ឆ្នាំ មានស្រុកកំណើតនៅភូមិស្តេចកន ឃុំក្រឡា ស្រុកកំពង់សៀម ខេត្តកំពង់ចាម ។
ប្រភពដដែលបានបន្តថា រថយន្តនេះបានផ្ទុកអុសពេញទ្រុងបើកបរចុះពីស្ពានព្រែកសំរោងក្នុងទិសដៅពីកើតទៅលិចតាមបណ្តោយផ្លូវលេខ១១៥ ខណៈបើកដល់ចំណុចភ្លើងស្តុបចោងស្ពានព្រែកសំរោង រថយន្តបង្កបានបើកទាក់ជាមួយខ្សែភ្លើងកាត់ទទឹងផ្លូវ បណ្តាលឲ្យខ្សែភ្លើងដាច់ប៉ះគ្នាទុស្សេយ៉ាងខ្លាំងនៅត្រង់ចំណុចបង្គោលភ្លើង ក្នុងបរិវេណរបងសាខាកាកកបាតក្រហមកម្ពុជាខេត្តកណ្តាល បង្កជាគ្រោះអគ្គីភ័យឆាបឆេះយ៉ាងសន្ធោសន្ធៅ ។
ក្រោយពីមានហេតុការណ៍កើតឡើងរថយន្តពន្លត់អគ្គីភ័យ របស់ស្នងការដ្ឋាននគរបាលខេត្តកណ្តាលចំនួន២គ្រឿង និងរថយន្តពន្លត់អគ្គីភ័យរបស់អង្គភាពកងអង្គរក្សចំនួន១គ្រឿងបានចេញអន្តរាគមន៍បាញ់ទឹកពន្លត់ភ្លើងដែលកំពុងឆាបឆេះ ខណៈដែលមន្ត្រីអគ្គិសនីបានបិទបារ៉េតភ្លើងរួចរាល់ហើយនោះ រហូតធ្វើឲ្យភ្លើងរលត់ជាស្ថាពរ ដោយប្រើប្រាស់ទឹកអស់មួយរថយន្ត ។ ចំពោះរថយន្តបង្កត្រូវបានសមត្ថកិច្ចនគរបាលក្រុងតាខ្មៅដកហូតនាំយកទៅរក្សាទុកនៅអធិការដ្ឋាននគរបាលក្រុងតាខ្មៅ ដើម្បីចាត់ការតាមច្បាប់ ៕
ដោយ៖ ស្អាងជ័យ
