ខេត្តកំពង់ឆ្នាំង៖ បុរសម្នាក់ដែលជាឪពុកក្មេងស្រីរងគ្រោះបានសំណូមពរឲ្យសមត្ថកិច្ចស៊ើបអង្កេតឡើងវិញ អំពីស្លាកស្នាមរបួសរបស់កូនស្រីគាត់ ដែលមានការសង្ស័យមិនមែនជាស្លាកស្នាមដែលបង្កគ្រោះថ្នាក់ចរាចរណ៍នោះទេ ។
បុរសឈ្មោះ ដួង ហៀប អាយុ៤១ឆ្នាំ ជាឪពុកយុវតីរងគ្រោះ អោយដឹងថា បច្ចុប្បន្នមកសុំផ្ទះគេស្នាក់នៅ ធ្វើជាកម្មករសំណង់ ក្នុងម៉ុងបារាំង សង្កាត់ប្អេរ ក្រុងកំពង់ឆ្នាំងដើម្បីធ្វើជាកម្មករសំណង់ ហើយគ្រួសាររបស់គាត់ មានទីលំនៅក្នុងភូមិអូបាក្រង ឃុំបន្ទាយដី ស្រុកកណ្តៀង ខេត្តពោធិសាត់ ។
បុរសរូបនេះបានអោយដឹងទៀតថា កាលពីយប់ថ្ងៃទី២១ ខែកញ្ញា ឆ្នាំ២០១៥ កូនស្រីរបស់គាត់ ឈ្មោះដួង ស្រីហូ អាយុ១៤ឆ្នាំ ជាកូនទី២ ក្នុងចំណោមបងប្អូន៦នាក់ បានសុំគាត់ ទៅមើលការប្រគុំតន្ត្រី និង តាំងពិពណ៌ នៅទីលានបាល់ទាត់ (ស្តាតចាស់) ក្បែរវត្តធម្មយុត្តិ ។ ស្រាប់តែនៅវេលាម៉ោងជិត២ កណ្តាលអធ្រាត ឈានចូលថ្ងៃទី២២ ខែកញ្ញា ស្រាប់តែមានគេមកប្រាប់ថា កូនស្រីរបស់គាត់គ្រោះថ្នាក់ចរាចរណ៍សង្គ្រោះបន្ទាន់នៅក្នុងមន្ទីរពេទ្យខេត្ត បានរងរបួសដោយប្រេះស្រាំលលាដ៍ក្បាលយ៉ាងធ្ងន់ ។
យុវតីរងគ្រោះជួបគ្រោះថ្នាក់ចរាចរណ៍នាពេលយប់ដោយត្រូវម៉ូតូបុក ក្នុងខណៈដែលពួកគេនាំគ្នាដើរតាមផ្លូវត្រឡប់មកពីមើលការប្រគុំតន្ត្រីទៅផ្ទះវិញ ។ ដោយសារស្ថានភាពធ្ងន់ ក្រុមគ្រូពេទ្យ បានសម្រេចបញ្ជូនកូនស្រីគាត់ ទៅសង្គ្រោះបន្តនៅមន្ទីរពេទ្យរាជធានីភ្នំពេញ តែក្នុងពេលនោះស្ថានភាពជីវភាពមិនអាចទៅរួច ម្ចាស់ផ្ទះជួលបានរៃអង្គាសលុយគ្នានៅក្នុងភូមិ ដើម្បីបាននាំកូនស្រីយកទៅពេទ្យភ្នំពេញ ។
លោកដួង ហៀប បានអោយដឹងទៀតថា កូនស្រីរបស់គាត់ បានរងរបួសប្រេះស្រាំ លលាដ៍ នៅត្រង់កណ្តាលក្បាល ប៉ុន្តែខ្លួនប្រាណរបស់នាងទាំងមូលមិនមានស្លាកស្នាមរបួសអ្វីឡើយ សូម្បីតែរលាត់ស្បែកបន្តិចក៍គ្មានដែរ ហើយចំណុចមួយទៀត នៅពេលសុងទឹកនោម ស្រាប់តែពេទ្យឃើញដាច់រលាត់ទ្វារមាសរបស់កូនស្រីគាត់ និងមានហូរឈាមទៀតផងដែរ ដែលករណីនេះធ្វើអោយមានការសង្ស័យថា វាមិនជាករណីគ្រោះថ្នាក់ចរាចរណ៍ អាចជាករណីផ្សេងវិញ ដូច្នេះស្នើសុំអោយសមត្ថកិច្ចជួយមេត្តាស្រាវជ្រាវ និង ស៊ើបអង្កេតករណីនេះ ឡើងវិញ ៕
ដោយ៖ ចន្ថា
