នាយករដ្ឋមន្ត្រីម៉ាឡេស៊ី លោក Najib Razakបានប្រកាសនៅឯសម័យប្រជុំពេញអង្គ របស់អង្គការសហប្រជាជាតិនៅបុរីញូវយ៉កកាលពីថ្ងៃទី១ ខែតុលាឆ្នាំ២០១៥ថា ក្នុងរយៈពេល៣ឆ្នាំតទៅមុខនេះ ម៉ាឡេស៊ីនឹងបើកទ្វារទទួលយក ជនភៀសខ្លួនស៊ីរី៣ពាន់នាក់ ដើម្បីជួយសម្រាលដល់ទុក្ខលំបាកចំពោះវិបត្តិជនភៀសខ្លួននៅពេលបច្ចុប្បន្ន ។
លោក Najib Razak ក៏បានបញ្ជាក់ផងដែរថា ប្រទេសមូស្លីមក៏ជាប្រទេសទទួលខុសត្រូវខ្លះដែរចំពោះវិបត្តិជនភៀសខ្លួនស៊ីរីនេះ ខណៈដែលពួកគេទាំងនោះចាក់ចេញពីប្រទេសកំណើតរបស់ពួកគេក្នុងចំនួនដ៏ច្រើន ហើយធ្វើឲ្យមានវិបត្តិនៅក្នុងសង្គម និងសេដ្ឋកិច្ចក្នុងតំបន់អឺរ៉ុបនោះ ។
លោកបន្តថា ដោយមូលហេតុនេះហើយទើបម៉ាឡេស៊ីសុខចិត្តទទួលយកជនភៀសខ្លួនទាំងនេះ ។ ក្នុងរយៈពេលច្រើនឆ្នាំ មនុស្សជាច្រើនបានភៀសខ្លួចដោយសារសង្គ្រាម ដោយសារកង្វះអាហារ និងការកាប់សម្លាប់ ។ នៅពេលបច្ចុប្បន្ន ម៉ាឡេស៊ីមានជនភៀសខ្លួនរាប់ពាន់នាក់ទៅហើយ ហើយនៅក្នុងឆ្នាំនេះម៉ាឡេស៊ីបានទទួលយកជនភៀសខ្លួនបន្ថែមទៀត នៅពេលដែលស្ថានការវិបត្តិមនុស្សធម៌កើតឡើងនៅក្នុងតំបន់សមុទ្រ Andaman នោះ ។
រហូតមកដល់ពេលនេះ សេចក្តីរាយការណ៍បានបញ្ជាក់ថា ជនភៀសខ្លួនស៊ីរីបានចាកចេញពីប្រទេសរបស់ខ្លួនចូលទៅកាន់ប្រទេសជិតខាងនោះមានប្រមាណ៤លាននាក់ហើយ ចាប់តាំងពីប្រទេសស៊ីរីផ្ទុះឡើងនូវសង្គ្រាមស៊ីវិលក្នុងឆ្នាំ២០១១រៀងរហូតមក ។
លោកនាយករដ្ឋមន្ត្រីម៉ាឡេស៊ីបានថ្លែងថា ដំណោះស្រាយថ្មីមួយរបស់សហគមន៍អន្តរជាតិត្រូវតែធ្វើឡើងដើម្បីដោះស្រាយចំពោះវិបត្តិជនភៀសខ្លួននេះ។
លោកបានថ្លែងថា យើងត្រូវតែគោរពទៅដល់មនុស្សជាតិដូចគ្នា ហើយការភៀសខ្លួនមនុស្សរាប់លាននាក់ចេញពីប្រទេសស៊ីរីនេះគឺជាក្តីកង្វល់មួយរបស់ពិភពលោក ៕
ប្រែសម្រួល៖ ថាច់ យ៉ាត
