ពិធីថ្លែងអំណរគុណរបស់សហភាពសហព័ន្ធយុវជនកម្ពុជា ដល់មូលនិធិអង្គររបស់ក្រុមហ៊ុន Cambrew LTD

ចែករំលែក៖

ភ្នំពេញ៖ កាលពីថ្ងៃទី២ ខែតុលា ឆ្នាំ២០១៥ ពិធីថ្លែងអំណរគុណរបស់សហភាពសហព័ន្ធយុវជនកម្ពុជាបានធ្វើឡើង ដល់មូលនិធិអង្គររបស់ក្រុមហ៊ុន Cambrew LTD ដែលបានឧបត្ថម្ភអាហារូបករណ៍ថ្នាក់ឧត្តម្ភសិក្សា 400កន្លែង សម្រាប់រយៈពេល4ឆ្នាំដល់សិស្សានុសិស្សដែល រៀនពូកែ និងពុំមានលទ្ឋភាពបន្តការសិក្សានៅថ្នាក់ឧត្តមសិក្សា ក្រោមអធិបតីភាពលោក ហ៊ុនម៉ានី ប្រធានសហភាពសហព័ន្ធយុវជនកម្ពុជា៖

សន្ទរកថា លោក NORMAN LIM នាយកផ្នែកលក់ និងទីផ្សារ របស់ក្រុមហ៊ុន Cambrew Ltd

ជាបឋមខ្ញុំបាទ សូមសម្តែងគារកិច្ចចំពោះ ឯកឧត្តម ហ៊ុនម៉ានី ប្រធានសហភាពសហព័ន្ធយុវជនកម្ពុជា សូមគោរព ឯកឧត្តម លោកជំទាវ ឧកញ៉ា លោក លោកស្រី នាងកញ្ញា ក្មួយៗ សិស្ស និស្សិត និងថ្នាក់ដឹកនាំរបស់ស្រាបៀរអង្គរទាំងអស់។

នាព្រឹកនេះ ខ្ញុំបាទមានក្តីសោមន្សរីករាយនឹងជំរាបជូនឯកឧត្តម លោកជំទាវ ឧកញ៉ា លោក លោកស្រី នាងកញ្ញា ក្មួយៗសិស្ស និស្សិត ឲ្យបានជ្រាបថា ក្រុមហ៊ុនស្រាបៀរកម្ពុជាខេមប្រ៊ូវ យល់យ៉ាងច្បាស់ថា អនាគតប្រទេសយើងគឺអាស្រ័យលើប្អូនៗក្មួយៗជំនាន់ក្រោយទាំងស្រុង។ ដូច្នេះហើយ ថ្នាក់ដឹកនាំគ្រប់រូបរបស់ស្រាបៀរអង្គរមានក្តីរំភើបជាខ្លាំងដែលបានក្លាយជាដៃគូរសហការជាមួយនឹងសហភាពសហព័ន្ធយុជនកម្ពុជាតាមរយៈសមាគមមូលនីធិអង្គររបស់ស្រាបៀរអង្គរ។ តាំងពីដើមមក យើងជឿជាក់លើការប្តេជ្ញាចិត្ត និងការខិត្តខំប្រឹងប្រែងដ៏ឥតងាករេ របស់សហភាពសហព័ន្ធយុវជនកម្ពុជា ក្នុងការផ្តល់ឱកាសឲ្យយុវជនដែលពុំមានលទ្ធភាព និងមធ្យោបាយគ្រប់គ្រាន់ឲ្យទទួលបានការអប់រំដ៏សមស្របមួយ ។

គួរបញ្ជាក់ផងដែរថា នៅឆ្នាំ 2009 ក្រុមហ៊ុនស្រាបៀរកម្ពុជាខេមប្រ៊ូវ បានសម្រេចថា វាជាពេលវេលាសមស្របមួយក្នុងការតបស្នងទៅកាន់សង្គមជាតិវិញ។ ដើម្បីបំពេញកិច្ចការនេះ សមាគមមូលនីធិអង្គរក៏បានលេចជារូបរាងឡើង ដោយសង្ឃឹមថានឹងផ្តល់ពន្លឺជីវិតដល់យុវជនខ្មែរយើងដែលមិនមានឱកាសទទួលបានការអប់រំ។ ដោយមើលឃើញពីសក្តានុពលរបស់សហភាពសហព័ន្ធយុវយជនកម្ពុជា យើងក៏បានសម្រេចរួមសហការគ្នា ដែលកិច្ចសហការនេះមិនត្រឹមតែជួយឲ្យសមាគមឲ្យសម្រេចក្តីស្រមៃរបស់ខ្លួនប៉ុននោះទេ តែវានឹងអាចជួយសម្រេចក្តីស្រម៉ៃរបស់ក្រុមគ្រួសាររាប់រយផ្សេងទៀត ដែលមានជីវភាពខ្វះខាតនៅទូទាំងប្រទេស។

ឯកឧត្តម លោកជំទាវ ឧកញ៉ា លោក លោកស្រី នាងកញ្ញា ក្មួយៗ សិស្ស និស្សិតជាទីមេត្រី! សមាគមមូលនីធិអង្គរគឺអង្គការសប្បុរសមួយរបស់ក្រុមហ៊ុនស្រាបៀរកម្ពុជាខេមប្រ៊ូវដែលមានគោលដៅចម្បងបំផុតធំ 4គឺ៖

ជួយសម្រាលបន្ទុកផ្នែកហិរញ្ញវត្ថុដល់គ្រួសារមានជីវភាពខ្វះខាត
រួមចំណែកអប់រំយុវជនឲ្យមានសមត្ថភាព និងទំនុកចិត្តក្នុងការប្រកួតប្រជែងក្នុងទីផ្សារការងារ
រួមចំណែកក្នុងការអភិវឌ្ឍន៍ប្រទេសជាតិទាំងមូលដោយការលើកកំពស់ការអប់រំរបស់យុវជន
ផ្តល់ឱកាសឲ្យយុវជនមានសមត្ថភាព ដែលមកពីគ្រួសារមានជីវភាពខ្វះខាត ឲ្យទទួលបានការអប់រំដូចយុវជនដ៏ទៃទៀតដែរ។

ខ្ញុំបាទសូមឆ្លៀតឱកាសនេះរំឮកផងដែរថា សមាគមមូលនីធិអង្គរ បានចាប់ផ្តើមឡើង ពីការផ្តល់សម្ភារៈសិក្សារដូចជា សៀវភៅអាន សៀវភៅសរសេរ និងកាបូប ដល់សិស្សានុសិស្សនៅបឋមសិក្សាដាច់ស្រយាលនៅទូទាំងប្រទេស។

ដោយឃើញពីផលជាវិជ្ជាមានរបស់គម្រោងនេះ យើងក៏បានសម្រេចបន្តជំនួយដល់ថ្នាក់មធ្យមសិក្សា។ រហូតមកដល់បច្ចុប្បន្ននេះ មានសិស្សានុសិស្សចំនួន 46,875នាក់ នៅតាមសាលាជាង 90 មកហើយ ដែលបានទទួលជំនួយពីសមាគមមូលនីធិអង្គរ។ ហើយក្នុងឱកាសបវេស្សណកាលថ្មីនេះ សមាគមនិងបន្តផ្តល់ជំនួយដល់សិស្សានុសិស្សចំនួន 21,000 នាក់ មកពី 32 សាលា នៃខេត្តក្រុងចំនួន12 ជាបន្តទៀត។ ក្រៅពីការផ្តល់ជំនួយឧបត្ថម្ភដល់សិស្សានុសិស្សបឋម និងមធ្យមសិក្សា ការផ្តល់អាហារូបករណ៍ថ្នាក់ឧត្តមសិក្សាគឺជាអតិភាពមួយរបស់ពូកយើងតាំងពីដើមមក។ នៅថ្ងៃនេះ យើងមានមោទនភាពនឹងជម្រាបជូនថា សមាគមបានផ្តល់អហារូបករណ៍ចំនួន 400 កន្លែងដល់និស្សិតដែលមកពីគ្រួសារមានជីវភាពខ្វះខាតឲ្យបានបន្តថ្នាក់បរិញ្ញាបត្រជាបន្តរួចមកហើយ។ ក្នុងនោះ សមាគមបានចេញថ្លៃសិក្សាចំនួន 4 ឆ្នាំពេញដល់និស្សិតទាំងនោះ ឲ្យបានរៀនជំនាញដែលពួកគេជ្រើសរើស។

ឯកឧត្តម លោកជំទាវ ឧកញ៉ា លោក លោកស្រី នាងកញ្ញា ក្មួយៗ សិស្ស និស្សិតជាទីរាប់អាន! សមាគមមូលនីធិអង្គរតែងរិះរកមធ្យោបាយផ្សេងៗដើម្បីបុព្វហេតុជាតិជានិច្ច ទាំងវិស័យអប់រំ តន្ត្រី កីឡា និងសកម្មភាពមនុស្សធម៌សង្គមផ្សេងទៀត។ ដោយមើលឃើញ ពីទស្សនវិស័យដ៏មោះមុតរបស់សហភាពសហព័ន្ធយុវជនកម្ពុជា សមាគមមូលនីធិអង្គរបានសម្រេចពួតដៃគ្នា ដើម្បីបំពេញបេសកកម្មផ្នែកមនុស្សធម៌របស់យើងឲ្យកាន់តែទូលំទូលាយថែមទៀត។

តាងនាមឲ្យសមាគមមូលនីធិអង្គរ និងស្រាបៀរអង្គរ ខ្ញុំបាទសូមបញ្ជាក់ពីជំហររបស់យើងជាថ្មីម្តងទៀតថា យើងនឹងបន្តកិច្ចឧបត្ថម្ភនេះជាបន្តទៀតនាពេលអនាគតខាងមុខ។ ជាមួយគ្នានឹងសហភាពសហព័ន្ធយុវជនកម្ពុជា យើងនឹងរួមគ្នាបង្កើតព្រឹត្តិការណ៍ និងការផ្តួចផ្តើមគំនិតផ្សេងៗទៀត ដើម្បីរួមចំណែកក្នុងការអភិវឌ្ឍន៍កម្ពុជា ទាំងវិស័យអប់រំ និងវប្បធម៌។ សមាគម និងរូបខ្ញុំបាទផ្ទាល់ជឿជាក់ថា ទង្វើរទាំងនេះមិនត្រឹមតែផ្តល់ឱកាសឲ្យដល់យុវជនកម្ពុជាមួយចំនួនដែលទទួលបានអហារូបករណ៍ប៉ុននោះទេ តែវានឹងផ្តល់ទៅឲ្យក្រុមគ្រួសារ និងសហគមន៍របស់ពួកគេជារួមផងដែរ។

នាទីបញ្ចប់នេះ ខ្ញុំបាទសូមថ្លែងអំណរគុណចំពោះវត្តមានរបស់ ឯកឧត្តម លោកជំទាវ ឧកញ៉ា លោក លោកស្រីនាងកញ្ញា ក្មួយៗសិស្ស និស្សិត នាព្រឹកនេះ សូមជូនពរសុខភាពល្អ និងជ័យជំនះគ្រប់ភារិកិច្ច ។ សូមអរគុណ! ៕

សុន្ទរកថា ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជាក្នុងពិធីថ្លែងអំណរគុណដល់មូលនិធិអង្គររបស់ក្រុមហ៊ុន Cambrew Ltd.ដែលបានឧបត្ថម្ភអាហារូបករណ៍ដល់សហភាពសហព័ន្ធយុវជនកម្ពុជានៅសាកលវិទ្យាល័យពុទ្ធិសាស្ត្រ នាថ្ងៃទី០២ ខែតុលា ឆ្នាំ ២០១៥

សូមគោរព លោក NORMAN LIM នាយកផ្នែកលក់ និងទីផ្សារ របស់ក្រុមហ៊ុន Cambrew Ltd. ជាទីគោរព!

សូមគោរព ឯកឧត្តម សុខ ពុទ្ធីវុធ សាកលវិទ្យាធិការនៃសាកលវិទ្យាល័យពុទ្ធិសាស្ត្រ ជាទីគោរព!

សូមគោរព ឯកឧត្តម លោកជំទាវ លោក លោកស្រី អ្នកនាង កញ្ញា ជាទីគោរព!

សួស្តីប្អូនៗនិស្សិតអាហារូបករណ៍ទាំងអស់ដែលមានវត្តមាននៅទីនេះ!

ថ្ងៃនេះ ខ្ញុំមានសេចក្ដីសោមនស្សរីករាយឥតឧបមា ដែលបានតំណាងឱ្យសហភាពសហព័ន្ធ យុវជនកម្ពុជា ក្នុងពិធីថ្លែងអំណរគុណ របស់សហភាពសហព័ន្ធយុវជនកម្ពុជាដល់មូលនិធិអង្គររបស់ក្រុមហ៊ុន Cambrew Ltd. ដែលបានឧបត្ថម្ភជាអាហារូបករណ៍ដល់គម្រោងអាហារូបករណ៍សហភាពសហព័ន្ធយុវជនកម្ពុជាតាំងពីឆ្នាំ២០១២ រៀងមក។

ក្នុងនាមក្រុមគ្រួសារសហភាពសហព័ន្ធយុវជនកម្ពុជា និងនិស្សិតក្រីក្រទាំងឡាយដែលបានទទួលអាហារូបករណ៍តាមរយៈគម្រោងអាហារូបករណ៍ដែលឧបត្ថម្ភដោយមូលនិធិអង្គរ ខ្ញុំសូមថ្លែងអំណរគុណយ៉ាងជ្រាលជ្រៅបំផុត ជូនចំពោះមូលនិធិអង្គរនៃក្រុមហ៊ុន Cambrew Ltd. ដែលបាន និងកំពុងចូលរួមឧបត្ថម្ភគាំទ្រដល់កម្មវិធីអាហាររូបករណ៍ ស.ស.យ.ក. តាំងពីឆ្នាំ២០១២រៀងមក ហើយបានចុះអនុស្សារណៈជាផ្លូវការជាមួយសហភាពសហព័ន្ធយុវជនកម្ពុជានៅថ្ងៃទី១៧ ខែកុម្ភៈ ឆ្នាំ២០១៥ នាពេលកន្លងមក។ នេះជាការសរបញ្ជាក់នូវការរួមចំណែកយ៉ាងធំធេងរបស់មូលនិធិអង្គររបស់ ក្រុមហ៊ុន Cambrew Ltd. ក្នុងការកសាងធនធានមនុស្សកម្ពុជា តាមរយៈសហភាពសហព័ន្ធយុវជនកម្ពុជា ដោយបានផ្តល់អាហារូបករណ៍ដល់និស្សិតក្រីក្រជួបការលំបាកចំនួន ១០០ កន្លែងជារៀងរាល់ឆ្នាំចាប់ផ្ដើមពីឆ្នាំ២០១២មក។ កាយវិការដ៏សប្បុរសនេះបង្កប់នូវស្មារតីនៃវប្បធម៌ចែករំលែក និងសាមគ្គីភាពនៅក្នុងសង្គមកម្ពុជាដែលមានតាំងពីដើមរៀងមក ហើយសកម្មភាពដ៏ថ្លៃថ្លានេះអនុញ្ញាតឱ្យយុវជនក្រីក្រក្នុងព្រះរាជាណាចក្រកម្ពុជាបានសម្រេចនូវបំណងរបស់ខ្លួនក្នុងការបន្តការសិក្សាកម្រិតឧត្តម ដើម្បីអាចក្លាយខ្លួនជាសសរទ្រូងយ៉ាងរឹងមាំ សម្រាប់បន្តវេននូវការអភិវឌ្ឍជាតិ កម្ពុជានាពេលអនាគត។

តបតាមការផ្តល់ឱកាសដោយក្រុមហ៊ុន Cambrew Ltd. តាមរយៈសហភាពសហព័ន្ធយុវជនកម្ពុជា ខ្ញុំស្នើសុំយ៉ាងទទូចឱ្យប្អូនៗនិស្សិតដែលមានវត្តមាននៅទីនេះ ក៏ដូចជានិស្សិតអាហារូបករណ៍ផ្សេងទៀតដែលទទួលបានឱកាសនេះហើយ ត្រូវក្តាប់ឱ្យជាប់ដោយមិនត្រូវបោះបង់ការសិក្សានៅកណ្ដាលផ្លូវឡើយ ព្រោះកាយវិកាដ៏អវិជ្ជមាននេះជាការបង្ហាញនូវភាពខ្ជីខ្ជា និងគ្មានការទទួលខុសត្រូវ។

បើចេះប្រាកដ “ប្រាក់រត់តាមហៅ” មានតែចំណេះវិជ្ជាប៉ុណ្ណោះ ដែលជាប្រទីបបំភ្លឺផ្លូវនាំប្អូនៗទៅរកអនាគតដ៏ត្រចះត្រចង់។ សម្រាប់ប្អូនៗដែលបានខិតខំសិក្សា និងតស៊ូក្រេបយកចំណេះវិជ្ជាប្រកបដោយគុណភាព នោះប្អូនៗនឹងអាចទទួលបាននូវអនាគតមួយដ៏ភ្លឺស្វាង ក៏ដូចជាជួយជ្រោមជ្រែងក្រុមគ្រួសារប្អូនៗ និងសង្គមជាតិផងដែរ។ ផ្ទុយទៅវិញ បើយើងបោះបង់ឱកាសនេះស្មើនឹងការបាត់បង់នូវធនធានមួយដ៏សំខាន់សម្រាប់ក្រុមគ្រួសារប្អូនៗ និងសង្គមកម្ពុជា ហើយបន្ថែមពីលើនោះការបោះបង់អាហារូបករណ៍នេះមិនត្រឹមតែជាការបោះបង់ឱកាសរបស់ខ្លួននោះទេ ប៉ុន្តែវាស្មើនឹងការបំផ្លាញឱកាសរបស់អ្នកដែលត្រូវការអាហារូបករណ៍ពិតប្រាកដ និងមានការព្យាយាមយ៉ាងលំបាកតែមិនទទួលបានឱកាសដ៏មានសារប្រយោជន៍នេះ។ ធ្ងន់ធ្ងរជាងនេះទៅទៀត ប្រសិនបើអ្នកទាំងអស់គ្នាបោះបង់ការសិក្សាដោយប្រការណាមួយនោះ អាចនឹងធ្វើឱ្យសប្បុរសជនអស់ទឹកចិត្តក្នុងការគាំទ្រដល់គម្រោងអាហារូបករណ៍បន្តទៀត។

ជាការពិតណាស់ ការសិក្សាជាដំណើរផ្លូវមួយដ៏វែងឆ្ងាយ និងលំបាក ក៏ប៉ុន្តែប្រសិនយើងក្រឡេកមើលទៅជាងសាមសិបឆ្នាំមុន យើងពិតជានៅតែមានសំណាងជាងយុវជនសម័យនោះ ដែលត្រូវហែលឆ្លងកាត់ភ្លើងសង្គ្រាម គ្មានអាហារបរិភោគគ្រប់គ្រាន់ គ្មានសាលារៀន គ្មានមន្ទីរពេទ្យ គ្មានវត្តអារាម ត្រូវលីអាវុធចូលព្រៃ និងបានពលីជីវិត ដើម្បីរំដោះប្រទេសជាតិចេញពីភ្នក់ភ្លើងសង្គ្រាមដ៍រ៉ាំរ៉ៃ ពលិកម្ម និងការបូជាគ្រប់បែបយ៉ាងដើម្បីរំដោះប្រទេសពីអំពើប្រល័យពូជសាសន៍ និងជាបន្តបន្ទាប់ក្នុងបុព្វហេតុដើម្បីស្វែងរកសន្តិភាព រក្សាសិ្ថរភាព ជំរុញការអភិវឌ្ឍ ទើបប្អូនៗទាំងអស់គ្នា យុវជនទូទៅ ក៏ដូចជាកម្ពុជាទាំងមូលទទួលបានសុខសន្តិភាពពេញបរិបូរណ៍ ព្រមទាំងមានឱកាសសិក្សាយ៉ាងទូលំទូលាយដូចសព្វថ្ងៃនេះ។ អាវុធរបស់យុវជននាពេលបច្ចុប្បន្ន មិនមែនជាគ្រឿងសព្វាវុធសម្រាប់ធ្វើសង្គ្រាមទៀតទេ តែជាដងប៉ាកា និងសៀវភៅដែលជាឃ្លាំងចំណេះមិនចេះរីងស្ងួត សម្រាប់ត្រៀមខ្លួនក្លាយជាសរសរទ្រូងនៃប្រទេសជាតិ។ អនាគតនៃកម្ពុជាអាស្រ័យលើការខិតខំប្រឹងប្រែង និងប្ដេជ្ញាចិត្តរបស់យុវជនដែលជាទំពាំងស្នងឬស្សី ការរក្សាកេរមរតក និងបន្តជំរុញការអភិវឌ្ឍដែលអតីតយុវជនបានបន្សល់ទុកដល់យើង ដោយបង្កើតនូវស្នាដៃថ្មីបន្ថែមទៀត ដើម្បីកសាងកម្ពុជាមួយប្រកបដោយវឌ្ឍនៈភាព កិត្យានុភាព និងមោទនភាព។

ខ្ញុំនៅតែជឿជាក់យ៉ាងមុតមាំថា សង្គមណាក៏ដោយ នៅសម័យណាក៏ដោយ លើកលែងតែសម័យប្រល័យពូជសាសន៍ខ្មែរក្រហមដែលយកបញ្ញវន្តជាសត្រូវ ចំណេះវិជ្ជាជាអាវុធដ៏សក្ដិសិទ្ធក្នុងការប្រយុទ្ធប្រឆាំងភាពក្រីក្រទាំងនៅក្នុងសង្គមគ្រួសារ ក៏ដូចជាសង្គមជាតិទាំងមូល។ ជោគជ័យរបស់អ្នកទាំងអស់គ្នាមិនត្រឹមតែជាជោគជ័យផ្ទាល់ខ្លួនប៉ុណ្ណោះទេ តែក៏ជាជោគជ័យសម្រាប់គ្រួសារ សង្គមកម្ពុជា និងជាពិសេសជាមោទនភាពដ៏ធំធេងសម្រាប់ជាតិយើង ។

ជាចុងបញ្ចប់ តាងនាមសហភាពសហព័ន្ធយុវជនកម្ពុជា និងក្នុងនាមខ្ញុំផ្ទាល់ ខ្ញុំសូមជូនពរដល់ ក្រុមហ៊ុន Cambrew Ltd. ថ្នាក់ដឹកនាំក្រុមហ៊ុន និងបុគ្គលិកទាំងអស់ សូមជួបប្រទះតែនឹងជោគជ័យគ្រប់ភារកិច្ចនៅក្នុងអាជីវកម្ម និងសូមជូនពរដល់ ឯកឧត្តម លោកជំទាវ លោក លោកស្រី អ្នកនាង កញ្ញា និងប្អូនៗនិស្សិតអាហារូបករណ៍ទាំងអស់ដែលមានវត្តមាននៅទីនេះឱ្យជួបតែពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ និងជាពិសេសសម្រាប់ប្អូនៗនិស្សិត សូមឱ្យទទួលបានជោគជ័យក្នុងការសិក្សា។ សូមអរគុណ! ៕