ក្រុមជួយសង្គ្រោះបន្តាន់របស់ប្រទេស Guatemala បានបញ្ជាក់កាលពីថ្ងៃទី២ ខែតុលា ឆ្នាំ២០១៥ថា មនុស្ស៩នាក់បានបាត់បង់ជីវិត និងជាង៦០០នាក់ផ្សេងទៀតបាត់ខ្លួន ក្រោយពីហេតុការណ៍បាក់ដីដ៏ធំមួយគ្របសង្កត់លើលំនៅឋានពលរដ្ឋប្រមាណជាង១០០ខ្នង ស្ថិតនៅភាគខាងត្បូងប្រទេស Guatemala អាហ្វ្រិកភាគកណ្តាលនោះ ។
ទីភ្នាក់ងារព័ត៌មាន Prensa Libre បានផ្សព្វផ្សាយថា ហេតុការណ៍បាក់ដីសង្កត់លើលំនៅឋានពលរដ្ឋជាង១០០ខ្នងខាងលើនេះបានកើតឡើងនៅតំបន់ El Cambray II ជាប់ព្រំប្រទល់ទីប្រជុំជន Santa Catarina Pinula ចម្ងាយ១៥គីឡូម៉ែត្រ ភាគខាងត្បូងទីក្រុង Guatemala ។ ក្រុមជួយសង្គ្រោះ ក៏ដូចជាគ្រឿងចក្រផងដែរបានទៅដល់កន្លែងបាក់ដីដែលបានកើតឡើងកាលពីយប់ថ្ងៃទី១ ខែតុលា ឆ្នាំ២០១៥នោះដើម្បីជួយសង្គ្រោះ ។
ទីភ្នាក់ងារព័ត៌មានខាងលើដដែលនេះបានបន្តថា ក្នុងរយៈពេល១៨ម៉ោងក្រុមជួយសង្គ្រោះបានធ្វើសកម្មភាពគាស់កកាយផ្ទាំងដីដ៏ធំនោះ ប៉ុន្តែទោះបីយ៉ាងណា រហូតមកដល់ពេលនេះ ជនរងគ្រោះជាច្រើនរយនាក់ផ្សេងទៀតបាននិងកំពុងស្ថិតនៅក្រោមផ្ទាំងដីនេះ ។ ប្រភពបញ្ជាក់ថា លំនៅឋាន១២៥ខ្នងរងការខូចខាត ហើយពលរដ្ឋជាង៦០០នាក់ផ្សេងទៀតនៅបាត់ខ្លួន ។
សំឡេងដង្ហោយហៅឲ្យមានការជួយពីសំណាក់ជនរងគ្រោះនៅតែបន្តឮសូរឡើង ហើយក្រុមជួយសង្គ្រោះកំពុងធ្វើកិច្ចការនេះយ៉ាងប្រុងប្រយ័ត្ន ។ អាជ្ញាធរគ្រប់គ្រងមហន្តរាយជាតិបានសាងសង់តង់បណ្តោះអាសន្នដើម្បីឲ្យពលរដ្ឋដែល បាត់បង់លំនៅឋានដោយសារគ្រោះបាក់ដីខាងលើនោះ ស្នាក់នៅជាបណ្តោះអាសន្ន ។
មន្ត្រីរដ្ឋាភិបាលក្នុងតំបន់បានប្រកាសថា រដ្ឋាភិបាលនឹងជួយសម្រួលដល់ជនរងគ្រោះដោយការបាក់ដីខាងលើនេះ ។ លំនៅឋានដែលរងគ្រោះភាគច្រើនជារបស់ពលរដ្ឋក្រីក្រតោកយ៉ាក ។
រដូវភ្លៀងធ្លាក់នៅក្នុងប្រទេសនេះដែលចាប់ផ្តើមពីខែឧសភា រហូតដល់ខែតុលា ឆ្នាំ២០១៥ បណ្តាលឲ្យពលរដ្ឋជាង៣៥០.០០០នាក់រងផងប៉ះពាល់ និងបើតាមទិន្នន័យរបស់រដ្ឋាភិបាល ។ អាកាសធាតុប្រែប្រួលធ្វើឲ្យប្រទេសនេះរងគ្រោះកាន់តែខ្លាំងឡើងផងដែរ ៕
ប្រែសម្រួល៖ ថាច់ យ៉ាត
