ខេត្តពោធិ៍សាត់៖ យោងតាមពាក្យបណ្ដឹងរបស់ឈ្មោះ នាក់ រ៉េត ភេទប្រុស អាយុ ៥១ឆ្នាំ រស់នៅភូមិសាមគ្គី ឃុំស្នាមព្រះ ស្រុកបាកាន ខេត្តពោធិ៍សាត់ (ត្រូវជាឪពុកជនរងគ្រោះ) បានដាក់ពាក្យបណ្ដឹងចូលមកអភិបាលនៃគណៈអភិបាលខេត្ត ដើម្បីសុំឱ្យជួយអន្ដរាគមន៍យករថយន្ដម៉ាក លុចស៊ីស ៤៧០ ពណ៌ស ពាក់ស្លាកលេខ ភ្នំពេញ 2AE-5581 បង្កការគ្រោះថ្នាក់ចរាចរណ៍មករក្សាទុកនៅសមត្ថកិច្ចដើម្បីដោះស្រាយគ្នាតាមផ្លូវច្បាប់ ។
នៅក្នុងពាក្យបណ្ដឹងនោះប្ដឹងឈ្មោះ រិន វ៉ាន់ដា ភេទប្រុស អាយុ ៣៣ឆ្នាំ មានទីលំនៅភូមិចំការចេកខាងជើង សង្កាត់ផ្ទះព្រៃ ក្រុង-ខេត្តពោធិ៍សាត់ ជាមន្ដ្រីបរិស្ថានខេត្តពោធិ៍សាត់ ក្នុងពាក្យបណ្ដឹងនោះបានរៀបរាប់បន្ដថា កាលពីវេលាម៉ោង ៣.៣០នាទីរសៀល ថ្ងៃទី២៧ ខែកញ្ញា ឆ្នាំ២០១៥ នៅលើកំណាត់ផ្លូវជាតិលេខ៥ ស្ថិតក្នុងភូមិថ្នល់បំបែក សង្កាត់រលាប ក្រុង.ខេត្តពោធិ៍សាត់ មានករណីគ្រោះថ្នាក់ចរាចរណ៍មួយកើតឡើងបង្កដោយរថយន្ដខាងលើ បណ្ដាលឱ្យបុរស ២នាក់ ជិះម៉ូតូបុកពីក្រោយដួលរងរបួសធ្ងន់ ប៉ុន្ដែរថយន្ដខាងលើនេះមិនបានឈប់ទទួលខុសត្រូវនោះទេ ដោយបើកបត់ឆ្វេងរត់គេចខ្លួនបាត់ស្រមោល លុះក្រោយមកទើបសមត្ថកិច្ចស្រាវជ្រាវរកឃើញ ទើបប្ដឹងចូលអភិបាលខេត្តដើម្បីយកវត្ថុតាងមករក្សាទុកនិងដោះស្រាយគ្នាតាមនីតិវិធី ។
ប្រភពនានាឱ្យដឹងថា មន្ដ្រីបរិស្ថានឈ្មោះ រិន វ៉ាន់ដា អ្នកបើកបររថយន្ដបង្កខាងលើ គឺខ្ចីរថយន្ដឈ្មោះ ភួង ស្រៀវ រស់នៅឃុំឈើតុំ ស្រុកក្រគរ ខេត្តពោធិ៍សាត់ (អតីតជាមន្ដ្រី បរិស្ថានជាប់កិច្ចសន្យា) ដែលត្រូវបានគេដកចេញជាលើកទី២ ខណៈមានរឿងអាស្រូវមិនចេះឈប់មិនចេះឈរ ប្រភពបន្ដទៀតថា រិន វ៉ាន់ដា មន្ដ្រីបរិស្ថានចេញមុខសម្របសម្រួលគ្នាជាមួយជនរងគ្រោះ នៅអធិការនគរបាលក្រុងពោធិ៍សាត់ ដោយភាគីខាងជនរងគ្រោះទាមទារសំណងជម្ងឺចិត្តថ្លៃខូចខាតម៉ូតូ ១គ្រឿង និងមនុស្សរងរបួសធ្ងន់ដេកសម្រាកនៅមន្ទីរពេទ្យខេត្តបាត់ដំបងនៅឡើយចំនួន ២ពាន់ដុល្លារ ប៉ុន្ដែមន្ដ្រីបរិស្ថានខ្ចីឡានគេបើក អោយចំនួនតែ ៦០ម៉ឺនរៀលប៉ុណ្ណោះ ដោយការសម្របសម្រួលមិនត្រូវរូវគ្នា សំណុំរឿងខាងលើ បានបញ្ជូនទៅដល់ការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តពោធិ៍សាត់ ដោយភាគីជនរងគ្រោះទារសំណងចំនួន ២ពាន់ដុល្លារដដែល ប៉ុន្ដែភាគីខាងរថយន្ដបង្កទារសំណងថ្លៃខូចខាតរថយន្ដចំនួន ៣ពាន់ដុល្លារវិញ ដូច្នេះករណីនេះគេកំពុងរង់ចាំមើលការចរចាគ្នាបន្ដទៀត ៕
ដោយ៖ ប៉ឹម ពិន
