ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានមានប្រសាសន៍ក្នុងឱកាសប្រគល់សញ្ញាបត្រជូននិស្សិតនៃសាកលវិទ្យាល័យវេស្ទើន នាព្រឹកថ្ងៃទី១៩ ខែតុលា ឆ្នាំ២០១៥ នៅវិទ្យាស្ថានជាតិអប់រំ ដោយបានគូសបញ្ជាក់ជាមួយការស្នើសុំឲ្យក្រុមហ៊ុនលក់ប្រេងសាំងនានានៅក្នុងប្រទេសកម្ពុជា បើបានជាចុះថ្លៃហើយ សុំកុំឡើងវិញ ។ សម្តេចបានមានប្រសាសន៍ថា« ចុះត្រឹមតម្លៃ១០០រៀល, ប្រយ័ត្នចុះត្រឹម១០០រៀល ស្រាប់តែឡើង៣០០រៀល, អត់បានទេណា?»។
សម្តេចមានប្រសាសន៍ថា ចំពោះករណីអ្នកផ្តល់ដំណឹងឲ្យខ្ញុំតាមគេហទំព័រ សូមប្រយ័ត្នចុះ១០០រៀលមុនភ្ជុំ, ឡើង៣០០រៀលក្រោយភ្ជុំ! កុំណា! សុំផ្តាំផ្ញើទៅអ្នកលក់សាំងទាំងឡាយ បើមិនបានបន្តចុះទេ សុំអាណិតកុំឡើងថ្លៃ ។
សម្តេចបានមានប្រសាសន៍ថា មានហេតុផលដែលអាចយោគយល់នៅត្រង់ថា ពេលដែលប្រេងចុះថ្លៃ អ្នកលក់ថា គាត់អត់ទាន់ចុះ(ថ្លៃ)បានទេ ពីព្រោះគាត់ទិញយកមកពីពេលមុន មានតម្លៃថ្លៃ ។ ដូច្នេះគាត់ស្តុកទុកតម្លៃនោះមួយរយៈ ដល់ទិញប្រេងថ្មី ទើបគាត់ចុះ(ថ្លៃ) ។
ប៉ុន្តែរឿងដែលគួរឲ្យសំណើចនៅត្រង់កន្លែងដែលឮសូរថា ប្រេងឡើងថ្លៃនៅទីក្រុងឡុង, ញូវយ៉ក គាត់ដំឡើងថ្លៃភ្លាម នៅភ្នំពេញ ។ ក្នុងពេលដែលគាត់មិនទាន់បាននាំប្រេងដែលឡើងថ្លៃនៅទីក្រុងឡុង, ញូវយ៉ក១ដំណក់មកសោះ ។ ត្រង់ហ្នឹងដែលយល់គ្នាអត់បាន ។
ទាក់ទឹននឹងបញ្ហានេះដែរ សម្តេចតេជោបានមានប្រសាសន៍បន្តថា សម្តេចនឹងជួបជាមួយអ្នកលក់សាំងដោយផ្ទាល់តែម្តង ហើយឲ្យលោករដ្ឋមន្ត្រីក្រសួងពាណិជ្ជកម្មធ្វើមេគុណដើម្បីកំណត់និយាយជាមួយគ្នាអំពីបញ្ហាឡើងថ្លៃ, ចុះថ្លៃនេះ កុំឲ្យតាមស្រេចតែនឹងចិត្តរបស់ខ្លួនពេក ។
យោគយល់បានពេលដែលក្នុង១បារ៉ែលតម្លៃ៥៥តុល្លារ លុះដល់គេចុះមកនៅ៥០ដុល្លារ ខ្លួនមិនទាន់ចុះបានទេ ក្នុងប៉ុន្មានថ្ងៃដំបូង ដោយសារតែខ្លួនដឹកយកអា៥៥ដុល្លារមួយបារ៉ែលនោះមកស្តុក ។ នេះយោគយល់បាន! ប៉ុន្តែអ្វីដែលយោគយល់មិនបាន នៅត្រង់ ពេលប្រេងឡើងដល់៦០ដុល្លារ គាត់ដំឡើងថ្លៃនៅភ្នំពេញភ្លាម ក្នុងពេលដែលគាត់អត់ទាន់បាននាំប្រេងយកមកមួយដំណក់សោះនោះ ។ ស្រាប់តែដំឡើងដូច្នេះខ្ញុំនឹងត្រូវធ្វើការផ្ទាល់ហៅមេៗទៅជួប ។
ប៉ុន្តែក្រុមហ៊ុនស្រុកខ្មែររកស៊ីស្រួលនិយាយគ្នាជាងក្រុមហ៊ុនមកពីបរទេស គេសួរមេរបស់គេនៅក្រៅប្រទេស ។ ដូច្នេះ ខ្ញុំចង់ឲ្យកម្ពុជាខ្លួនឯងពង្រីកសមត្ថភាពអ្នករកស៊ីឲ្យកាន់តែធំ ។
ប៉ុន្តែអ្នករកស៊ីនោះត្រូវគេគំរាមបង្កើតតុលាការកាត់ទោសក្រោយគេឈ្នះឆ្នោតទៅទៀត ។ សង្គ្រាមផ្ទៃក្នុង ផ្ទុះដាច់ខាត, ត្រូវតែផ្ទុះ ព្រោះអ្វី?
ប៉ុល ពត ឆ្នាំ១៩៧០ដល់ឆ្នាំ១៩៧៥ ថានឹងកាត់ទោស លន់ នល់, សិរិមតៈ, ចេង ហេង, អ៊ឹន តាំ, សុស ស្ទែន, ឡុង បូរ៉េត, ហង្ស ធុនហាក់…៧នាក់ រួចហើយអាពត កាត់ទោសមួយប្រទេស ។
ឥឡូវនេះ សារនយោបាយរបស់ពួកគេ បើគេឈ្នះ គេនឹងបង្កើតតុលាការកាត់ទោសអ្នករកស៊ីខុសច្បាប់ ។ ដូច្នេះសំណួរថា តើប្រព័ន្ធតុលាការបច្ចុប្បន្ននឹងត្រូវបោះបង់ចោល? ច្បាប់បច្ចុប្បន្នហ្នឹងត្រូវបោះចោល? អ្វីៗចោលទាំងអស់? បង្កើតឡើងតុលាការមួយ ច្បាប់ថ្មីមួយ ។ ដើមចោទជានរណា? ចុងចោទងាយយល់ទេ? អ្នកណា អ្នកមានគឹជាចុងចោទទាំងអស់។ ប៉ុន្តែដើមចោទ គេនឹងដើរចង្អុលដូចសម័យអាពត ចង្អុលអ្នកនេះម្ចាស់ដី១០ហិកតា ដាក់គ្រឹប, នេះគ្រូបង្រៀន, សាស្ត្រាចារ្យ… ដូច្នេះសង្គ្រាមនឹងកើតឡើង ហើយកុំថា ខ្ញុំគំរាម ។
សម្តេចនាយករដ្ឋមន្ត្រីបន្តរិះគន់ថា ចុះចាំបាច់ដល់ឈ្នះ ចុះប្តឹងពីឥឡូវទៅថា នរណាខ្លះរកស៊ីខុសច្បាប់ ប្តឹងទៅតុលាការទៅ ម៉េចក៏មិនប្តឹងទៅ ហើយចាំដល់ខ្លួនឈ្នះ បានខ្លួន…បើដូច្នេះ រឿងអាពត មកដល់ទៀតហើយ ។
សម្តេចមានប្រសាសន៍ថា ជឿខ្ញុំទៅ នឹងកើតសង្គ្រាមសារជាថ្មី មិនមែនបន្លាចទេ គឺនឹងកើតមែន ៕
ដោយ៖ ហេង សូរិយា
