ខេត្តរតនគិរី៖ ប្រព័ន្ធធារាសាស្ត្រទំនប់អាងស្តុកទឹកល្បាំង២ ស្ថិតក្នុងភូមិកាទៀង ឃុំល្បាំង២ ស្រុកលំផាត់ ខេត្តរតគិរី ដែលមានសភាពចាស់ទ្រុឌទ្រោម ត្រូវបានក្រុមការងារមន្ទីរធនធានទឹក និងឧតុនិយមខេត្តរតនគិរី ធ្វើការស្តារ និងជួសជុលឡើងវិញរួចរាល់ជាស្ថាពរ នៅថ្ងៃទី ១៨ ខែតុលា ឆ្នាំ ២០១៥ ។
លោក ចាន់ ប៊ុនធឿន អនុប្រធានមន្ទីរធនធានទឹក និងឧតុនិយមខេត្តរតនគិរី បានឱ្យដឹងថា ការងារស្តារ និងជួសជុលទំនប់អាងស្តុកទឹកល្បាំង២ ត្រូវបានចាប់ដំណើរការបើកការដ្ឋានកាលពីថ្ងៃទី ០១ ខែតុលា ឆ្នាំ ២០១៥ ដោយមានទំហំការងារ ១. ធ្វើផ្លូវតាមភ្លឺប្រឡាយទៅកាន់សំណង់ស្ទាក់ទឹកប្រវែង ១.២០០ម៉ែត្រ ២. ធ្វើផ្លូវថ្មីចូលទៅកាន់អាងស្តុកទឹកប្រវែង ១.០០០ម៉ែត្រ ៣. ជួសជុលទំនប់អាងស្តុកទឹកប្រវែង ៨០០ម៉ែត្រ និង៤. ជួសជុលទ្វារទឹក ចំនួន ០២កន្លែង ។
លោកអនុប្រធានមន្ទីរបានបន្តថា អាងស្តុកទឹកល្បាំង២ អាចស្តុកទឹកបានប្រមាណ ៦៣ម៉ឺនម៉ែត្រគូប និងមានលទ្ធភាពស្រោចស្រោចលើផ្ទៃដីស្រូវវស្សាជាង ៤០០ហិកតា និងស្រូវប្រាំងប្រមាណពី ៥០ ទៅ ១០០ហិកតា ៕
