ភ្នំពេញ៖ ប្ដីប្រពន្ធវ័យក្មេងមួយគូ បន្ទាប់ពីរៀបការថ្មោងថ្មី និងដោយហេតុតែគ្មានការងារធ្វើដើម្បីសាងជីវភាព គ្រួសារឱ្យបានរុងរឿងដូចគេឯងសុខចិត្ដដឹកដៃគ្នាចាកចេញពីស្រុកកំណើតមក រកការងារធ្វើនៅក្រុងភ្នំពេញ ប៉ុន្ដែអ្វី ដែលគួរសង្វេគនោះគឺបន្ទាប់ពីស្ដាប់ បានការផ្សាយព័ត៌មានតាមវិទ្យុថាមជ្ឈមណ្ឌលឱកាសការងារខ្ញុំអាចរកការងារ ធ្វើបាននោះប្ដីប្រពន្ធមួយគូនេះសុខចិត្ដយកអត្ដសញ្ញាណប័ណ្ណរបស់ពួកគាត់ទាំង ២នាក់ទៅឱ្យតំណាងមជ្ឈមណ្ឌលចាត់ចែង រកការងារឱ្យធ្វើហើយក្រោយមកដោយសាររង់ចាំយូរពេកក៏បានសម្រេចចិត្ដឈប់ចង់ធ្វើការវិញហើយសុំដកអត្ដ សញ្ញាណប័ណ្ណមកវិញតែត្រូវតំណាង ក្រុមហ៊ុនទាមទារប្រាក់៦០ដុល្លារក្នុង ម្នាក់ៗជាថ្នូរនឹងការដកអត្ដសញ្ញាណ ប័ណ្ណ ។
ករណីនេះកើតឡើងនៅវេលាម៉ោង៧យប់ ថ្ងៃទី១៩ ខែតុលា ឆ្នាំ២០១៥ នៅ មជ្ឈមណ្ឌលផ្ដល់ឱកាសការងារខ្ញុំ ស្ថិត ក្នុងភូមិព្រៃទា សង្កាត់ចោមចៅ ខណ្ឌ ពោធិ៍សែនជ័យនិងបានធ្វើឱ្យមានការ ភ្ញាក់ផ្អើលបន្ទាប់ពីប្ដីប្រពន្ធវ័យក្មេងមួយគូនេះរត់ទៅប្ដឹងនគរបាលប៉ុស្ដិ៍ចោមចៅ ឱ្យជួយដោះស្រាយក្នុងបញ្ហានេះបន្ទាប់ពីីពួកគាត់ទាំង២នាក់មានទំនាស់ពាក្យ សម្ដីគ្នាជាមួយតំណាងមជ្ឈមណ្ឌលឱកាស ការងារខ្ញុំ ។
ជនរងគ្រោះទាំង២នាក់ខាងលើប្ដី មាន ឈ្មោះ ហម សុខចាន់ អាយុ១៩ឆ្នាំ ដែលទើបរៀបការជាមួយប្រពន្ធឈ្មោះ ស៊ឹម ស្រីពៅ អាយុ២០ឆ្នាំ មានទីលំនៅ ភូមិតាឌូ សង្កាត់រកាក្រៅ ក្រុងដូនកែវ ខេត្ដតាកែវដែលមិនទាន់មានការងារធ្វើ ក្រោយពេលរៀបការរួច ។
បុរសជាប្ដីបានរៀបរាប់ប្រាប់មន្ដ្រី នគរបាលប៉ុស្ដិ៍ចោមចៅថានាព្រឹកថ្ងៃទី១៩ ខែតុលា ឆ្នាំ២០១៥ បន្ទាប់ពីពួក គាត់បានស្ដាប់ការផ្សាយព័ត៌មានពីវិទ្យុក្នុងស្រុកមួយថា មជ្ឈមណ្ឌលផ្ដល់ឱកាស ការងារខ្ញុំអាចរកការងារធ្វើសម្រាប់អ្នកអត់ការងារបាន ទើបគាត់សម្រេចចិត្ដ ដឹកដៃប្រពន្ធចាកចេញពីស្រុកកំណើត មកដាក់ពាក្យធ្វើការងារនៅមជ្ឈមណ្ឌលខាងលើដោយគេអះអាងថា រូបគាត់ជាប្ដី អាចធ្វើជាបុគ្គលិកសន្ដិសុខឯកជន រីឯ ប្រពន្ធជាអ្នករត់តុនៅតាមភោជនីយ ដ្ឋាន។ នៅពេលមកដល់មជ្ឍមណ្ឌលនេះ នៅវេលាម៉ោង៩ព្រឹកតំណាងមជ្ឈមណ្ឌល បានទាមទារយកអត្ដសញ្ញាណប័ណ្ណពួក គាត់ទាំង២នាក់ដោយហេតុផលថាយក ទៅបំពេញបែបបទចូលធ្វើការងារ ។ ពេលនោះពួកគាត់ក៏ប្រគល់អត្ដសញ្ញាណ ប័ណ្ណ២សន្លឹកដែលជារបស់គាត់មួយ សន្លឹកនិងប្រពន្ធមួយសន្លឹកទៅឱ្យតំណាងមជ្ឈមណ្ឌលខាងលើ ។
បុរសជាប្ដីបន្ដទៀតថា បន្ទាប់ពី ប្រគល់អត្ដសញ្ញាណប័ណ្ណទៅឱ្យតំណាងមជ្ឈមណ្ឌលរួចគេឱ្យពួកគាត់រង់ចាំដល់ ពេលរសៀលថ្ងៃដដែលឱ្យមកទទួលដំណឹង ពីការងារដែលត្រូវធ្វើ ប៉ុន្ដែដោយរង់ចាំ យូរពេកពួកគាត់សម្រេចចិត្ដឈប់ចង់ ធ្វើការតាមរយៈមជ្ឈមណ្ឌលមួយនេះ ហើយបានសុំដកអត្ដសញ្ញាណប័ណ្ណរបស់គាត់និងប្រពន្ធមកវិញ ប៉ុន្ដែត្រូវបាន តំណាងមជ្ឈមណ្ឌលបញ្ជាក់ថា បើចង់ បានអត្ដសញ្ញាណប័ណ្ណវិញទាល់តែបង់ ប្រាក់ក្នុងម្នាក់ៗ៦០ដុល្លារទៅឱ្យមជ្ឈ មណ្ឌលនេះ ។ ពេលឮដូច្នេះពួកគាត់២ នាក់ប្ដីប្រពន្ធដែលមានលុយតែ២ម៉ឺន រៀលនៅក្នុងហោប៉ៅគ្មានលទ្ធភាពបង់ឱ្យមជ្ឈមណ្ឌលខាងលើក៏កើតទៅជាទំនាស់ពាក្យសម្ដីឡើងហើយក៏សម្រេចចិត្ដទៅប្ដឹងនគរបាលប៉ុស្ដិ៍ចោមចៅឱ្យជួយដោះស្រាយបញ្ហានេះ ។
ប្រភពព័ត៌មានពីមន្ដ្រីនគរបាលប៉ុស្ដិ៍ចោមចៅបានអះអាងថា ដោយឃើញប្ដី ប្រពន្ធវ័យក្មេងមួយគូនេះស្ថិតក្នុងស្ថាន ភាពលំបាកលំបិនយ៉ាងខ្លាំងនោះទើប លោកអធិការនគរបាលខណ្ឌសែនសុខ អាណិតអាសូរបានឧបត្ថម្ភប្រាក់ចំនួន៥ម៉ឺនរៀលទៅឱ្យពួកគាត់សម្រាប់ហូប ចុកនិងជួលបន្ទប់ស្នាក់នៅមួយយប់ហើយ ព្រឹកឡើងថ្ងៃទី២០ ខែតុលា ទើបលោក ចាត់មន្ដ្រីឱ្យទៅសម្របសម្រួលជាមួយមជ្ឈមណ្ឌលផ្ដល់ឱកាសការងារខ្ញុំដើម្បីយកអត្ដសញ្ញាណប័ណ្ណមកវិញ ។ បន្ទាប់ មកប្ដីប្រពន្ធមួយគូនេះបានថ្លែងអំណរ គុណចំពោះលោកអធិការខណ្ឌនិងបាន ដឹកដៃគ្នាវិលត្រឡប់ទៅស្រុកកំណើតធ្វើស្រែសាងជីវភាពថ្មីដោយមិនបាច់ពឹងផ្អែកមជ្ឈមណ្ឌលផ្ដល់ឱកាសការងារខ្ញុំជួយ រកការងារទៀតទេបានន័យថា“លាហើយ ភ្នំពេញ” ឋានសួគ៌បោកប្រាស់ ៕
ដោយ៖ ប្រាថ្នា
