ភ្នំពេញ៖ ផ្ទះឈើ២ខ្នងមានទំហំទទឹង៤ម៉ែត្រ បណ្តោយ៨ម៉ែត្រ ដំបូលប្រក់ស័ង្កសី ត្រូវអគ្គិភ័យឆាបឆេះអស់ទាំងស្រុងកាលពីវេលាម៉ោង១១ និង២២នាទីយប់ ថ្ងៃទី២០ តុលា ២០១៥ ស្ថិតក្នុងភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ ដោយសារតែប្តីប្រពន្ធឈ្លោះគ្នាហើយធ្វើឱ្យរលំទៀនដែលកំពុងឆេះក៏បង្កជាអគ្គិភ័យនេះឡើយ ។
ម្ចាស់ផ្ទះទាំង២ខ្នង់ដែលត្រូវភ្លើងឆាប់ឆេះអស់ទាំងស្រុងនោះ ទី១ឈ្មោះវ៉ា រ៉ានី ហៅតឿ អាយុ២៨ឆ្នាំ មុខរបរមិនពិតប្រាកដ ចំណែកប្តីមិនស្គាល់ឈ្មោះ ជាអ្នកបង្កហេតុ ទាំង២នាក់ស្នាក់នៅកន្លែងកើតហេតុខាងលើ។ចំណែកម្ចាស់ផ្ទះរងគ្រោះម្នាក់ទៀតឈ្មោះ កូយ ធី អាយុ៣៩ឆ្នាំ ជាស្ត្រីមេម៉ាយ មានមុខរបរជាអ្នកដើររើសអេតចាយ ព្រមទាំងមានកូន៧នាក់ក្នុងបន្ទុកទៀតផង ។
លោក យ៉ិន វុធ ចៅសង្កាត់ច្បារអំពៅទី២ បានឱ្យដឹងថា មុនពេលកើតហេតុ គេឮប្តីប្រពន្ធ១គូដែលមានប្រពន្ធឈ្មោះ វ៉ា រ៉ានី ហៅតឿ អាយុ២៨ឆ្នាំ មុខរបរមិនពិតប្រាកដ (មិនស្គាល់ឈ្មោះប្តី) ឈ្លោះប្រកែកគ្នា បន្ទាប់មកក៏ធ្វើឱ្យរលំទៀន ដែលដុតបំភ្លឺ ទៅលើម៉ុង នៅក្បែរនោះ ក៏បង្កជាអគ្គិភ័យឆាប់ឆេះផ្ទះឈើរបស់ខ្លួន ឃើញដូចនោះប្តីប្រពន្ឋ២នាក់នោះបានបើកទ្វារផ្ទះរួចរត់ចេញមកក្រៅ ស្រែកអោយអ្នកភូមិនៅក្បែរៗនោះជួយ ។
ប្រភពបន្តថា ភ្លាមៗនោះ អ្នកភូមិបាននាំគ្នាយកធុងទឹក យកទៅដងទឹកដើម្បីមកជះពន្លត់ តែដោយអំណាចភ្លើងឆេះខ្លាំងពេក ក៏បានឆាប់ឆេះរាល់ដាលដ៏ផ្ទះអ្នក១ខ្នង់ទៀតដែលនៅក្បែរនោះ បង្កអោយមានការភ្ញាក់ដល់សមត្ថកិច្ចខណ្ឌច្បារអំពៅចុះមកអន្តរាគមន៍ហៅ រថយន្តពន្លត់អគ្គីភ័យ១គ្រឿងមកបាញ់ពន្លត់ តែពេលរថយន្តពន្លត់អគ្គីភ័យមកដល់ភ្លើងបានរលត់ បាត់ទៅហើយ ព្រោះដោយសារប្រជនពលរដ្ឋបាននាំគ្នា វាយកម្ចេចផ្ទះទាំង២ខ្នង់នោះផងនឹងជះទឹកផង ទើបអំណាចនៃភ្លើងបានរលត់ទាំងស្រុង ហើយមិនឆេះរាល់ដាល ដល់ផ្ទះអ្នកភូមិបន្តទៀត ។
ក្រោយពេលកើតហេតុប្តីប្រពន្ឋដែលជាម្ចាស់ផ្ទះ១ខ្នង់បង្កហេតុខាងលើបានរត់គេចខ្លួនបាត់ស្រមោល នៅសល់តែស្ត្រីមេម៉ាយកូន៧នាក់ក្នុងបន្ទុក បានឈរស្រែកទ្រហោយំសុំការជួយសង្គ្រោះពីរសម្បុរសជន មេត្តាជួយគាត់ផង ព្រោះគាត់ក្រណាស់ គ្មានលុយឯណាមកសាងសងផ្ទះដើម្បីស្នាក់នៅឡើងវីញទេ ព្រោះគាត់ដើររើសអេតចាយរាល់ថ្ងៃនេះគ្រាន់តែបានទិញបាយ ម្ហូប និងឲ្យកូនៗទៅរៀនបានខ្លះៗប៉ុណ្ណោះ ។
ដោយឃើញការយំស្រែកសុំអោយគេជួយបែបនោះ លោក យ៉ិន វុធ ចៅសង្កាត់ច្បារអំពៅទី២ ក៏បាននិយាយថា ស្អែកគាត់នឹងរាយការណ៍ទៅលោកអភិបាលខណ្ឌច្បារអំពៅ ដើម្បីសុំជំនួយខ្លះមកជួយជនរងគ្រោះទាំង២គ្រួសារខាងលើនោះផងដែរ ៕
ដោយ៖ សណ្តោស
