ខេត្តកំពង់ធំ៖ លោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំបញ្ជាអោយកម្លាំងសមត្ថកិច្ចនគរបាលនៃការិយាល័យប្រឆាំងគ្រឿងញៀនដឹកនាំបញ្ជា ដោយនាយការិយាល័យ ចាប់បានជនល្មើសម្នាក់ នៅចំណុចបេនឡានស្រុកស្ទោង បញ្ចូនមកស្នងការនគរបាលខេត្ត ។
កាលពីព្រឹកថ្ងៃទី២១ ខែតុលា ឆ្នាំ២០១៥ពីបទ ញុះញង់អ្នកដ៏ទៃអោយ ប្រើប្រាស់គ្រឿងញៀន យោងតាម ដីកាបង្គាប់អោយចូលខ្លួន របស់លោក ឃនកុសល ប្រធាននិងចៅក្រមស៊ីបសួរនៃសាលាដំបូងខេត្តកំពង់ធំ នៃសំនុំរឿងព្រហ្មទានលេខ៥៤៧ ចុះថ្ងៃទី១៥ ខែ០៨ ឆ្នាំ២០១៥ និងដោយមានពាក្យបណ្ដឹងពីប្រជាពលរដ្ឋ៥៣គ្រួសារនៅភូមិបុស្សតាអែក ឃុំទ្រា ស្រុកស្ទោង ខេត្តកំពង់ធំ មកលើជនល្មើសរូបនេះ ។
បន្ទាប់ពីបញ្ចូនមកការិយាល័យប្រឆាំងគ្រឿងញៀន ដើម្បីកសាងសំនុំរឿង និងសាកសួរ ជនល្មើសឈ្មោះ តឿន កុសល អាយុ ១៧ឆ្នាំ មុខរបរកសិករ រស់នៅនៅភូមិ ឃុំខាងលើ បានឆ្លើយសារភាពថា ខ្លួនជាបណ្ដាញ សង្ងាត់ក្នុងការចាប់និងបង្រ្កាប់គ្រឿងញៀន របស់លោក ឃុនប៊ុនហ៊ូរ មេបញ្ជាការកងរាជអាវុធហត្ថស្រុកស្ទោង តែខ្លួនក៏បានញុះញង់អ្នកដ៏ទៃអោយប្រើប្រាស់គ្រឿងញៀនផង លក់គ្រឿងញៀនផងនិងស្វែងរកចាប់អ្នកលក់ចែកចាយគ្រឿងញៀនផង ។
លោក ឃុន ប៊ុន ហូរបានអោយដឹងថាកាលពីមុន លោកធ្លាប់បានយក ជនល្មើសឈ្មោះ តឿន កុសល ធ្វើជាភ្នាក់ងារសង្ងាត់ក្នុងការបង្រ្កាប់ចាប់គ្រឿងញៀន មែន តែជនរូបនេះបែរជាជក់និងប្រើប្រាស់គ្រឿងញៀនទៅវិញ នេះគឺជារឿងរបស់វា ។
លោក អ៊ិត សុធា ព្រះរាជអាជ្ញា អមសាលាដំបូងខេត្តមានប្រសាសន៍ថាក្រោយពីកសាងសំនុំរឿងរួច សាលាដំបូងខេត្តកំពង់ធំ ចាត់ការតាមនិតិវិធីច្បាប់ដោយ បញ្ចូនជនល្មើសរូបនេះទៅពន្ធធានាខេត្ត នៅរសៀលថ្ងៃទី២១ ខែតុលា ឆ្មាំ២០១៥នេះ ៕
ដោយ៖ ប៊ុន រិទ្ធី
