ប៉ូលិសហ្វីលីពីនបានថ្លែងឲ្យដឹងថា ឯកអគ្គរដ្ឋទូតចិនប្រចាំនៅទីក្រុងធំលំដាប់ទី២របស់ហ្វីលីពីនបានរងរបួស ចំណែកមន្ត្រីក្រោមឱវាទរបស់គាត់២នាក់ផ្សេងទៀតបានបាត់បង់ជីវិត បន្ទាប់ពីកើតមានការករណីបាញ់ប្រហារក្នុងអំឡុងពេលទទួលទានអាហារថ្ងៃត្រង់ស្ថិតនៅក្នុងភោជនីយដ្ឋានមួយកាលពីថ្ងៃទី២១ ខែតុលា ឆ្នាំ២០១៥ ។
លោក Wilben Mayor អ្នកនាំពាក្យកម្លាំងប៉ូលិសបានអះអាងថា ជនជាតិចិន២នាក់ផ្សេងទៀត ម្នាក់ជាមន្ត្រីទីប្រឹក្សាស្ថានទូត និងម្នាក់ទៀតជាភរិយារបស់មន្ត្រីទីប្រឹក្សានោះត្រូវចាប់ខ្លួនផងដែរដោយសង្ស័យជាប់ពាក់ព័ន្ធនៅក្នុងការបាញ់ប្រហារនេះ ។ លោកបានបន្តថា ប៉ូលិសបានរកឃើញកាំភ្លើងខ្លីស្វ័យប្រវត្តិ ៤៥ Colt និងសម្បកកាទុស៣គ្រាប់នៅកន្លែងកើតហេតុ ។
ប៉ូលិសបានអះអាងថា ការបាញ់ប្រហារនេះបានកើតឡើងនៅវេលាម៉ោង១និង៣០នាទីរសៀល ម៉ោងនៅក្នុងតំបន់ ថ្ងៃទី២១ ខែតុលា ស្ថិតនៅភោជនីយដ្ឋានយីហោ Lighthouse ដែលជាភោជនីយដ្ឋានដ៏ល្បីល្បាញមួយបម្រើសេវាម្ហូបអាហារហ្វីលីពីន ក្នុងទីក្រុង Cebu ភាគកណ្តាលហ្វីលីពីន ដែលជាទីក្រុងធំលំដាប់ទី២របស់ប្រទេសហ្វីលីពីន ។
បុគ្គលិកនៅក្នុងភោជនីយដ្ឋានបានប្រាប់AFP ថា មនុស្សមួយក្រុមមានគ្នា៩នាក់បានជួបជុំគ្នានៅក្នុងបន្ទប់ដាច់ដោយឡែកមួយដើម្បីរៀបចំពិធីខួបកំណើតជូនអគ្គកុងស៊ុលចិន Song Ronghua ។
អ្នកគិតលុយក្នុងភោជនីយដ្ឋានខាងលើឈ្មោះ Remedios Rivalde អាយុ២៧ឆ្នាំ បាននិយាយថា ខណៈដែលនាងកំពុងបំពេញការងារនៅខាងក្រៅនោះ ស្រាប់តែឮស្នូរគ្រាប់កាំភ្លើងផ្ទុះ ភ្លាមនោះ នាងបានលូនក្រាបចូលក្រោមតុ រួចបិទភ្នែក ។ បន្ទាប់មកនាងបានឮគ្រាប់កាំភ្លើងផ្ទុះជាបន្តបន្ទាប់ទៀត ។ នាងបានបន្តថា កម្មវិធីខួបកំណើតនេះត្រូវបញ្ជាកុម្មង់ឲ្យធ្វើភ្លាមៗ បន្ទាប់ពីអាហារថ្ងៃត្រង់ដើម្បីជូនអគ្គកុងស៊ុលចិន ។
ស្នងការប៉ូលិសហ្វីលីពីន លោក Tom Banas បានប្រាប់AFP ថា គ្រាប់កាំភ្លើងបានបាញ់ចំត្រង់កលោកអគ្គរដ្ឋទូត Song ប៉ុន្តែការរងរបួសនេះមិនត្រូវគេជឿថា គំរាមកំហែងដល់អាយុជីវិតនោះឡើយ ។ ស្ថានភាពរបស់លោកនៅពេលនេះស្ថិតក្នុងសភាពធម្មតានោះទេ ។ ប៉ូលិសក៏បានបញ្ជាក់ដែរថា អនុទូតម្នាក់ឈ្មោះ Sun Shan និងមន្ត្រីហិរញ្ញវត្ថុ ឈ្មោះ Hui Li បានបាត់បង់ជីវិតក្នុងហេតុការណ៍នេះ ។
ប៉ូលិសហ្វីលីពីនបន្តថា ប្តី ប្រពន្ធ២នាក់ត្រូវចាប់ខ្លួនដោយសារតែមិនបានសហការជាមួយប៉ូលិសនៅកន្លែងកើតហេតុ ។ មូលហេតុនៃការបាញ់ប្រហារនេះ មិនទាន់ដឹងពីមូលហេតុច្បាស់លាស់នៅឡើយ ។ ប្តីប្រពន្ធ២នាក់ដែលប៉ូលិសចាប់ខ្លួននោះនិយាយថា ពួកគេមិនអាចនិយាយភាសាអង់គ្លេសបានទេ ។ ករណីនេះប៉ូលិសសង្ស័យថា ពួកគេគ្មានបំណង់ផ្តល់ភស្តុតាងដល់ប៉ូលិស ។
លោកស្រី Li Lingxiao អ្នកនាំពាក្យស្ថានទូតចិនប្រចាំនៅទីក្រុងម៉ានីលអះអាងថា នៅពេលនេះស្ថានទូតមិនអាចធ្វើអត្ថាធិប្បាយជុំវិញបញ្ហានេះឡើយ ដោយពេលនេះស្ថានទូតកំពុងពិនិត្យ និងស្រាវជ្រាវ ៕
ប្រែសម្រួល៖ ថាច់ យ៉ាត
