ខេត្ដកណ្ដាល៖ មានជម្លោះក្លាយជា អំពើហិង្សាមួយបង្កឱ្យមានការភ្ញាក់ផ្អើល នៅក្នុងការដ្ឋានឡឥដ្ឋមួយកន្លែងឋិតនៅក្នុងភូមិឈើទាល ឃុំព្រែកអញ្ចាញ ស្រុក មុខកំពូល ខេត្ដកណ្ដាល ដោយសារថៅ កែឡឥដ្ឋចិត្ដភ្លើងវាយកម្មករខ្លួនឯងនឹង ឈើជ្រុងបែកក្បាល ។
ប្រភពពីកន្លែងការដ្ឋានកើតហេតុ បានឱ្យដឹងថា ជនរងគ្រោះឈ្មោះ ភុន រី អាយុ៤៣ឆ្នាំ មានស្រុកកំណើតនៅស្រុក កោះធំ ខេត្ដកណ្ដាល មានប្រពន្ធឈ្មោះ គៀល ពៅ អាយុ៣៩ឆ្នាំនៅភូមិ-ឃុំ ព្រែកតាម៉ាក ស្រុកខ្សាច់កណ្ដាល ជា កម្មករឡឥដ្ឋខាងលើ ។ ២នាក់ប្ដីប្រពន្ធ ដោយមានជីវភាពខ្វះខាតក៏សម្រេចចិត្ដមកធ្វើជាកម្មករឡឥដ្ឋរបស់លោកថៅ កែចិត្ដភ្លើងឈ្មោះ ថាច លាងស្រ៊េង បានរយៈពេលប្រមាណ៣ខែមកហើយ។ លុះមកដល់ថ្ងែទី២២ ខែតុលា ឆ្នាំ២០១៥ វេលាម៉ោង៩និង២០នាទីព្រឹក ខណៈជន រងគ្រោះកំពុងធ្វើការបញ្ចេញឥដ្ឋចេញពីឡក៏មានកម្មករម្នាក់ទៀតដែលធ្វើការ ជាមួយឈ្មោះ ផែន បាននិយាយលេង ជាមួយគ្នាដោយធ្វើការបណ្ដើរនិយាយ លេងចំអន់គ្នាបណ្ដើរនោះ ស្រាប់តែ លេចមុខថៅកែ ថាច លាងស្រ៊េង ដើរ មកដល់ហើយហាក់ដូចជាខឹងអ្នកណាពីនាយក៏បានមកចង្អុលមុខជនរងគ្រោះ ភុន រី ស្ទើរដល់ភ្នែកដោយចោទថា បង្ក ទំនាស់ជាមួយកម្មករដទៃតែជនរងគ្រោះបានតមាត់ថាខ្ញុំ? និយាយបានតែប៉ុណ្ណេះ ស្រាប់តែថៅកែចិត្ដភ្លើង ថាច លាង ស្រ៊េង ស្ទុះយកដំបងឈើជ្រុងមកសំពងចំ កណ្ដាលក្បាលបណ្ដាលឱ្យបែកឈាមហូរស្រោចពេញខ្លួន ។ បន្ទាប់មកដោយឃើញ សភាពបែបនេះក្រុមគ្រួសារនិងកម្មករដទៃទៀតបានស្ទុះមកជួយហើយបញ្ជូន ជនរងគ្រោះមកកាន់មន្ទីរពេទ្យបង្អែក ស្រុកមុខកំពូលដើម្បីសង្គ្រោះបន្ទាន់ ។
ក្រោយកើតហេតុថៅកែឡឥដ្ឋចិត្ដ ភ្លើងរូបនេះបានគេចខ្លួនបាត់ហើយជន រងគ្រោះបានទៅដាក់ពាក្យបណ្ដឹងនៅនគរ បាលប៉ុស្ដិ៍ព្រែកអញ្ចាញឱ្យជួយធ្វើអន្ដរាគមន៍ ប៉ុន្ដែបានប្រមាណកន្លះម៉ោង ក្រោយមកលោកថាច លាង ស្រ៊េង បាន ទូរស័ព្ទប្រាប់ក្រុមគ្រួសារជនរងគ្រោះថារូបលោកមិនគេចខ្លួននោះទេលោកមកភ្នំពេញដើម្បីទិញសម្ភារធ្វើឡឥដ្ឋហើយ លោកនឹងចូលខ្លួនទៅបំភ្លឺចំពោះមុខសមត្ថ កិច្ចនៅថ្ងៃបន្ទាប់ ។
ករណីនេះបើតាមមន្ដ្រីនគរបាលប៉ុស្ដិ៍ព្រែកអញ្ចាញបានឱ្យដឹងថា លោក ថាច លាងស្រ៊េង មិនគេចខ្លួនហើយព្រមមក ប្រឈមមុខដោះស្រាយជាមួយជនរង គ្រោះនោះសមត្ថកិច្ចនិងសម្របសម្រួលនៅនឹងមូលដ្ឋាន តែបើមិនចូលខ្លួនទេ សមត្ថកិច្ចនគរបាលព្រហ្មទណ្ឌស្រុកមុខកំពូលនឹងកសាងសំណុំរឿងបញ្ជួនទៅ សាលាដំបូងខេត្ដកណ្ដាលដើម្បីចាត់ការតាមច្បាប់ ៕
ដោយ៖ ឡូ សំអាត
