ខេត្តស្វាយរៀង៖ បុរសម្នាក់ត្រូវកម្លាំងកងរាជអាវុធហត្ថខេត្តស្វាយរៀងឃាត់ខ្លួន បន្ទាប់ពីធ្វើសកម្មភាពលួចលុយបានជិត១ម៉ឺនដុល្លារពីខេត្តស្ទឹងត្រែង រត់ចូលមកខេត្តស្វាយរៀង ។
ករណីចាប់ឃាត់ខ្លួនបុរសខាងលើនេះ បានកើតឡើងកាលពីវេលាម៉ោង៨និង៤០នាទីថ្ងៃទី២២ ខែតុលា ឆ្នាំ២០១៥ នៅត្រង់ចំណុចភូមិ ត្រស់ ឃុំ ត្រស់ ស្រុក រមាសហែក ខេត្តស្វាយរៀង ។
បើតាមសមត្ថកិច្ចអាវុធហត្ថខេត្តស្វាយរៀងបានឲ្យដឹងថា ដោយទទួលបានព័ត៌មានពីខាងអាវុធហត្ថខេត្តស្ទឹងត្រែងថា ជនសង្ស័យលួចលុយខាងលើ លោកឧត្តមសេនីយ៍ត្រី សែ វុទ្ធី មេបញ្ជាការកងរាជអាវុធហត្ថខេត្តស្វាយរៀងបានដាក់បទបញ្ជាឲ្យខាងមន្ទីរយុត្តិធម៌នៃបញ្ជាការដ្ឋានកងរាជអាវុធហត្ថខេត្តស្វាយរៀង ដឹកនាំដោយលោកវរសេនីយ៍ត្រី យ័ន្ត សេង ប្រធានមន្ទីរយុត្តិធម៌ កម្លាំងអាវុធហត្ថស្រុករមាសហែក សហការជាមួយកម្លាំងអាវុធហត្ថខេត្តស្ទឹងត្រែងដឹកនាំដោយលោកវរសេនីយ៍ត្រី សៅ វុត្ថា បានឃាត់ខ្លួនជនសង្ស័យបានភ្លាមៗត្រង់ចំនុចភូមិ ឃុំ តែម្តង។ប្រភពខាងលើបានបន្តឲ្យដឹងទៀតថា៖ជនសង្ស័យដែលសមត្ថកិច្ចយើងធ្វើការឃាត់ខ្លួនមានឈ្មោះ នួន អ៊ន ភេទប្រុស អាយុ ៤៧ ឆ្នាំ មានទីលំនៅភូមិ តាពេជ្រខាងជើង ឃុំ ម្រាក់ជ័យ ស្រុក បាភ្នំ ខេត្តព្រៃវែង ។
បច្ចុប្បន្នជនសង្ស័យត្រូវកម្លាំងកងរាជអាវុធហត្ថខេត្តស្វាយរៀងឃាត់ខ្លួនកសាងសំណុំរឿង និងប្រគល់បន្តឲ្យទៅខាងម្ចាស់ករណីគឺខាងអាវុធហត្ថខេត្តស្ទឹងត្រែងដើម្បីចាត់ការបន្តតាមច្បាប់ ៕
ដោយ៖ យឹម សុថាន
