ប៉ោយប៉ែត៖ ពលការិនី៦នាក់ ចាញ់បោកមេខ្យល់ឆ្លងដែនខុសច្បាប់ត្រូវសមត្ថកិច្ចថៃចាប់បញ្ជូនមកឲ្យមណ្ឌល់សំចតនៃក្រសួងសង្គមកិច្ចកម្ពុជាប្រចាំក្រុងប៉ោយប៉ែត កាលពីម៉ោង១១និង២៣នាទីព្រឹក ថ្ងៃទី២២ ខែតុលា ឆ្នាំ២០១៥ តាមច្រកទ្វារអន្តជាតិប៉ោយប៉ែត ។
ពលការិនីដែលចាញ់បោកមេខ្យល់ហើយឆ្លងដែនទៅរកការងារធ្វើនៅប្រទេសថៃនោះមាននៅក្នុងខេត្តព្រៃវែង៣នាក់ នៅខេត្តសៀមរាប១នាក់ ខេត្តកំពងចាម១នាក់ និងខេត្តបន្ទាយមានជ័យ១នាក់ ។
បើតាមការឲ្យដឹងពីលោកស្រីឈា ម៉ានិត ប្រធានមណ្ឌល់សំចតនៃក្រសួងសង្គមកិច្ចប្រចាំក្រុងប៉ោយប៉ែតមានប្រសាសន៍ថា ពលការិនីទាំង៦នាក់នេះគីគាត់បានឆ្លងដែនតាមច្រកទ្វារអន្តជាតិប៉ោយប៉ែតតាមរយៈមេខ្យល់ទៅធ្វើការនៅប្រទេសថៃបានរយៈពេលជាង១ខែកន្លងមកហើយ ដោយពួកគាត់គ្មានឯកសាគ្រប់គ្រាន់សំរាប់ចូលធ្វើការស្របច្បាប់ក្នុងប្រទេសថៃ មានតែលិខិតឆ្លងដែនដើរកំសាន្ត ។
លោកស្រីបន្តថា ពួកគាត់មិនមែនមេខ្យល់យកទៅលក់កំលាំងពលកម្មឡើយ គ្រាន់តែគ្មានឯកសារបំពេញការងារក្នុងប្រទេសគេតែប៉ុណ្ណោះ ហើយសមត្ថកិច្ចថៃបានចាប់ពួកគាត់នៅកន្លែងការងារហើយបានបញ្ជូនពលការិនីទាំង៦នាក់នេះទៅកាន់មណ្ឌល គ្រិះស្ថាន ជាអង្កការមួយរបស់រាជរដ្ឋាភិបាលថៃ នៅក្នុងប្រទេសថៃ រួចហើយអង្កការក្នុងប្រទេសថៃបានទំនាក់ទំនងជាមួយដៃគូបញ្ជូនពលការិនីទាំង៦នាក់នោះមកមណ្ឌលសំចតរបស់កម្ពុជានៅក្រុងប៉ោយប៉ែត ដើម្បីសាកសួរបញ្ហាពាក់ពន្ធ័ ។
លោកស្រីបញ្ជាក់ថា ចំពោះពលការិនីទាំង៦នាក់នេះក្រោយពីសាកសួរ ធ្វើកំណត់ហេតុ លោកស្រីបានបញ្ជូនពួកគាត់ទៅអង្កការជួយស្ត្រីមានវិបត្តិកម្ពុជាហៅកាត់(CWCC)មួយរយៈដើម្បីស្រាវជ្រាវរកឪពុកម្ដាយ និងក្រុមគ្រួសាររបស់ពួកគាត់ បើសិនជាពលការិនីណាគ្មានឪពុកម្ដាយហើយជាក្មេងកំព្រារទេនោះ នឹងត្រូវបណ្ដុះបណ្ដាលពួកគាត់រកមុខវិជ្ជាអ្វីមួយដែលគាត់មានចំណាប់អារម្មណ៍ និងបញ្ជូនគាត់ឲ្យធ្វើការតាមតម្រូវការរបស់គាត់ដែលចូលចិត្ត ប៉ុន្តែចំពោះពលការិនីណាដែលមានឪពុកម្ដាយហើយចង់ទៅជួបជុំជាមួយឪពុកម្ដាយគាត់គីបញ្ជូនគាត់ឲ្យពុកម្ដាយគាត់វិញ ។
សូមបញ្ជាក់ថាចំពោះបញ្ហាឆ្លងដែនខុសច្បាប់គីជាបញ្ហាមួយដែលពួកគាត់ប្រឈមទៅនឹងការជួញដូរខាងផ្លូវភេទ ឬពលកម្ម និងជាបញ្ហាមួយដ៏គ្រោះថ្នាក់បំផុតចំពោះពលការិនីទាំង៦នាក់នេះដែលមេខ្សល់មានបំណងអាក្រក់មកលើពួកគាត់ ដូច្នេះគួរតែបងប្អូនឆ្លងដែនទៅរកការងារធ្វើត្រូវមានឯកសារគ្រប់គ្រាន់ដើម្បីការពារការលក់កំលាំងពលកម្មឲ្យទៅបំរើផ្នែកអ្វីមួយដែលក្រុមឈ្មួញខិលខូមានគំនិតមកលើពួកគាត់ ៕
ដោយ៖ វណ្ណា
