ខេត្តកណ្តាល៖ បុរសម្នាក់ទំនងជាតូចចិត្តនឹងជំពាក់ប្រាក់ធនាគារអេស៊ីលីដា និង ធនាគារផ្សេងទៀត គ្មានលទ្ធភាពសង ក៏សម្រេចចិត្តចង.កធ្វើអត្តឃាតសម្លាប់ខ្លួន នៅលើដើមរាំងមួយដើម ត្រង់ចំណុចក្នុងព្រៃថ្លុកតាអ៊ុយ ស្ថិតក្នុងភួមិទួលទ្រា ឃុំព្រែកក្មេង ស្រុកល្វាឯម ។
សាកសពជនរងគ្រោះត្រូវបានក្រុមគ្រួសារតាមរកប្រទះឃើញ បង្កឲ្យមានការភ្ញាក់ផ្អើលនៅវេលាម៉ោង២១ និង១០នាទី ថ្ងៃទី២២ ខែតុលា ឆ្នាំ២០១៥ ។
របាយការណ៍របស់នគរបាលស្រុកល្វាឯមបានឲ្យដឹងថា ជនរងគ្រោះឈ្មោះ សុខ ប៊ុនធឿន ភេទប្រុស អាយុ៥២ឆ្នាំ ជនជាតិខ្មែរ មុខរបរ ជាកសិក មានប្រពន្ធឈ្មោះ នួន សំអុល អាយុ៥៣ឆ្នាំ មានកូន៨នាក់ ប្រុស៧នាក់-ស្រី១នាក់ ក្នុងនោះមានគ្រួសារ៤នាក់ រស់នៅផ្ទះជុំគ្នាស្ថិតក្នុងភូមិព្រែកក្មេង ឃុំព្រែកក្មេង ស្រុកល្វាឯម ។
របាយការណ៍ដដែលបានបញ្ជាក់ថា ប្រពន្ធជនរងគ្រោះបានលួចទៅខ្ចីប្រាក់ធនាគារអេស៊ីលីដា និងធនាគារផ្សេងទៀត រហូតមានឈ្មោះជំពាក់ប្រាក់ធនាគារជាង១ម៉ឺនដុល្លារសហរដ្ឋអាមេរិក ។ លុយដែលបានមកពីការខ្ចីងាយស្រួលនោះបានធ្វើឲ្យប្រពន្ធរបស់ជនរងគ្រោះយកទៅស៊ីចាយអស់ ហើយគ្មានលទ្ធភាពសងឲ្យធនាការវិញ បានធ្វើឲ្យបុគ្គលិកធនាគារអេស៊ីលីដា ក៏ដូចជាធនាគារផ្សេងទៀតនាំគ្នាទៅរំអុកទារប្រាក់ពីជនរងគ្រោះដល់លំនៅដ្ឋាន ជាហេតុធ្វើឲ្យជនរងគ្រោះដោះស្រាយមិនបាន មានអារម្មណ៍ខ្មាស់អ្នកជិតខាង ។
នៅមុនពេលកើតហេតុជនរងគ្រោះបាននិយាយរអ៊ូរទាំប្រាប់កូនៗ និងអ្នកជិតខាងថា “ជំពាក់ប្រាក់ធនាគារច្រើនយ៉ាងនេះគាត់រស់មិនបានយូរនោះទេ បើបើកភ្នែកសឹងតែមិនទាន់មានគេមកទារបំណុលដល់សំយាបផ្ទះយ៉ាងនេះ” ។ ពេលឮជនរងគ្រោះនិយាយបែបនេះកូនៗ និងអ្នកជិតខាងបានប្រើពាក្យសំដីលួងលោមកុំឲ្យជនរងគ្រោះគិតច្រើនអី រកប្រាក់សងគេតាមដំណើរទៅ ។
លុះមកដល់ថ្ងៃទី២២ ខែតុលា ឆ្នាំ២០១៥ វេលាម៉ោងប្រមាណ២រសៀលជនរងគ្រោះបានជិះកង់ចេញពីផ្ទះ ដោយប្រាប់កូនប្រុសថា “ពុកទៅភូមិព្រែកតាអុង” ។ ក្រោយពីនិយាយចប់ជនរងគ្រោះក៏បានជិះកង់ចេញទៅបាត់ទៅ រហូតដល់វេលាម៉ោងប្រមាណ៤រសៀលមិនឃើញជនរងគ្រោះមកផ្ទះវិញ ស្ត្រីជាប្រពន្ធនិងកូនបាននាំគ្នាតាស្វែងរកជនរងគ្រោះ រហូតដល់ចុងភូមិក៏បានប្រទះឃើញកង់ដែលជនរងគ្រោះផ្ញើអ្នកស្រុក ។បន្ទាប់ពីឃើញដូច្នេះស្ត្រីជាប្រពន្ធនិងកូនៗមានការសង្ស័យក៏បានពឹងពាក់អ្នកភូមិឲ្យជួយតាមរកជនរងគ្រោះ នៅក្នុងព្រៃថ្លុកតាអ៊ុយ ខណៈចូលទៅដល់ក្នុងព្រៃក៏បានប្រទះឃើញជនរងគ្រោះចង.ក នឹងក្រម៉ានៅលើដើមរាំងស្លាប់បាត់បង់ជីវិតបាត់ ហើយបានរាយការណ៍ប្រាប់អាជ្ញាធរមូលដ្ឋាន និងសមត្ថកិច្ចនគរបាល ។
លោកអធិការបានបានបញ្ជាក់ថា តាមការសន្និដ្ឋានរបស់សមត្ថកិច្ចនគរបាលជំនាញបច្ចេកទេស និងវិទ្យាសាស្ត្រ ជនរងគ្រោះពិតជាស្លាប់ដោយចង.កធ្វើអត្តឃាតប្រាកដមែន គឺមិនមានពាក់ព័ន្ធករណីអ្វីផ្សេងនោះឡើយ ។ មូលហេតុដែលនាំឲ្យជនរងគ្រោះដាច់ចិត្តធ្វើអត្តឃាត គឺបណ្តាលមកពីជនរងគ្រោះជំពាក់ប្រាក់ធនាគារសរុបប្រមាណ១ម៉ឺនដុល្លារសហរដ្ឋអាមេរិក ពុំមានលទ្ធភាពសងធនាគារវិញ ។
ពាក់ព័ន្ធករណីជនរងគ្រោះខ្ចីលុយធនាគារអេស៊ីលីដា ក៏ដូចជាធនាគារផ្សេងទៀត ហើយបុគ្គលិកទៅរំអុកទារប្រាក់ដល់ផ្ទះនាំឲ្យជនរងគ្រោះពិបាកចិត្តរហូតចង.ក ធ្វើអត្តឃាតនោះអ្នកយកព័ត៌មាននគរវត្តមិនអាចសុំការបកស្រាយ ពីខាងតំណាងធនាគារអេស៊ីលីដាបានទេ នៅព្រឹកថ្ងៃទី២៣ ខែតុលា ឆ្នាំ២០១៥ ។ ក្រោយពីពិនិត្យចប់សព្វគ្រប់រួចមកសមត្ថកិច្ចបានប្រគល់សាកសពជនរងគ្រោះទៅឲ្យក្រុមគ្រួសារយកទៅចាត់ចែងធ្វើបុណ្តាមប្រពៃណី ៕
ដោយ៖ ស្អាងជ័យ
