ខេត្តសៀមរាប៖ ជនបទេស២នាក់ត្រូវបានសមត្ថកិច្ចនគរបាលអន្តោប្រវេសន៍ នៃស្នងការខេត្តបានហៅមកសួរ រួចឃាត់ខ្លួនបញ្ជូនទៅតុលាការដើម្បីដោះស្រាយតាមច្បាប់ ពីបទប្រើហិង្សាដល់លំនៅឋាន ។
ការឃាត់ខ្លួនជនបរទេសទាំង២នាក់នេះ ធ្វើឡើងតាមពាក្យបណ្តឹងរបស់ជនរងគ្រោះជាជនជាតិអង់គ្លេសកាលពីថ្ងៃទី២៩ ខែកញ្ញា ឆ្នាំ២០១៥កន្លងទៅនេះ ។
លោក ចៅ ម៉ៅវីរៈ ស្នងការរងទទួលការងារអន្តោប្រវេសន៍នៃស្នងការនគរបាលខេត្តបានប្រាប់ នៅរសៀលថ្ងៃទី២៣ ខែតុលា ឆ្នាំ២០១៥ថា បន្ទាប់ពីមានពាក្យបណ្តឹងរបស់ជនរងគ្រោះឈ្មោះ ដេ វីដ ស្កុតឆ័រ(David Scotcher)ភេទប្រុស អាយុ៦៦ឆ្នាំ មុខរបរជាគ្រូបង្រៀនភាសាអង្គគ្លេស ជនជាតិអង្គគ្លេស ដែលមានទីលំនៅភូមិស្ទឹងថ្មី សង្កាត់ស្វាយដង្គំ ក្រុងសៀមរាប ។
លោកបន្តថា ក្រោយពីទទួលបានពាក្យបណ្តឹងរបស់ជនរងគ្រោះរួចមក កម្លាំងជំនាញក៏បានកោះហៅជនបរទេស២នាក់យកមកសួរនាំនៅក្នុងការិយាល័យអន្តោប្រវេសន៍ ដោយជនសង្ស័យ បានសម្លុតគំរាម និងទះកំភ្លៀងជនរងគ្រោះដល់ក្នុងផ្ទះ ។ លោកបានបញ្ជាក់ទៀតថា ជនបរទេសទាំង២នាក់នេះមានឈ្មោះ Eglitis Guido James ភេទប្រុស អាយុ៦៨ឆ្នាំ ជាជនជាតិអូស្ត្រាលី កាន់លិខិតឆ្លងដែនលេខ E៤០៥៣៦៥០ ចុះថ្ងៃទី២៩ ខែមីនា ឆ្នាំ២០១១ ត្រូវបានចូលនិវត្តន៍ មកស្នាក់នៅផ្ទះជួល ភូមិមណ្ឌល៣ សង្កាត់ស្លក្រាម ក្រុងសៀមរាប និងម្នាក់ទៀតមានឈ្មោះ Brett Michael Hastie ភេទប្រុស អាយុ៤៤ឆ្នាំ មានមុខរបរម៉ៅការសំណង់ ជាជនជាតិញ៉ូហ្សេឡេនកាន់លិខិតឆ្លងដែនមិនច្បាស់លាស់ ពីព្រោះបានយកទៅបន្តវីសានៅភ្នំពេញ បច្ចុប្បន្នស្នាក់នៅបន្ទប់ជួល ភូមិស្លក្រាម សង្កាត់ស្លក្រាម ក្រុងសៀមរាប ព្រមទាំងដកហូតបានពីក្នុងខ្លួនជនជនសង្ស័យមានៈម៉ាស៊ីនថតរូបចំនួន១ និងលិខិតឆ្លងដែន១ ។
បច្ចុប្បន្នជនសង្ស័យជាជនបរទេសទាំង២នាក់នេះ ត្រូវបានកម្លាំងជំនាញរបស់ការិយាល័យអន្តោប្រវេសន៍នៃស្នងការខេត្ត កសាងសំណុំរឿងបញ្ជូនទៅតុលាការនៅព្រឹកថ្ងៃទី២៣ ខែតុលា ឆ្នាំ២០១៥ ដើម្បីចាត់ការតាមច្បាប់ ៕
ដោយ៖ ជានិរន្ដរ៍
