កាលពីថ្ងៃទី២៦ ខែតុលា ឆ្នាំ២០១៥ ប្រធានាធិបតីប្រទេសឥណ្ឌូនេស៊ី លោក Joko Widodo បានធ្វើដំណើរទៅកាន់សេតវិមានដើម្បីជួបពិភាក្សាជាមួយសមភាគីប្រធានាធិបតីអាមេរិក លោកបារ៉ាក់អូបាម៉ា ។
ដំណើរទស្សនកិច្ចនៅពេលនេះត្រូវគេរំពឹងភាគច្រើនផ្តោតទៅលើកិច្ចព្រមព្រៀងពាណិជ្ជកម្ម និងវិនិយោគ ប៉ុន្តែបញ្ហាផ្សេងៗទៀត ដូចជាបញ្ហាសន្តិសុខ និងសិទ្ធិមនុស្សក៏ជាប្រធានបទផងដែរអំឡុងពេលលោក Joko Widodo ជួបជាមួយលោកអូបាម៉ា នៅទីក្រុងវ៉ាស៊ីនតោននោះ ។
សេតវិមានមិនទាន់បញ្ចេញប្រាប់ជាសាធារណៈអំពីរបៀបវារៈក្នុងដំណើរទស្សនកិច្ចនេះនៅឡើយទេ ប៉ុន្តបុគ្គលិករដ្ឋការលោកអូបាម៉ា បានថ្លែងថា ដំណើរទស្សនកិច្ចក្នុងនាមប្រធានាធិបតីឥណ្ឌូនេស៊ីនាពេលនេះ ជាឱកាសល្អប្រសើរសម្រាប់អាមេរិក និងឥណ្ឌូនេស៊ីក្នុងការបង្កើនដៃគូមិត្តភាពជាមួយគ្នាឲ្យកាន់តែខ្លាំងក្លាជាងមុនទៀត ។
លោក Widodo ឬត្រូវគេស្គាល់ថា Jokowi នៅក្នុងប្រទេសឥណ្ឌូនេស៊ីនោះបានប្រឈមមុខបញ្ហាលំបាកនៅក្នុងការដឹកនាំរយៈពេលមួយឆ្នាំរបស់លោក ហើយបញ្ហាទាំងនោះ ទំនងជាប្រធានបទចម្បក្នុងការពិភាក្សានិងសន្ទនាគ្នាអំឡុងពេលជូបប្រជុំជាមួយលោកបារ៉ាក់អូបាម៉ា ។
ការប្រែប្រួលអាកាសធាតុ ទំនងជាអាទិភាពចម្បងផងដែរក្នុងរបៀបវារៈដែលប្រទេសឥណ្ឌូនេស៊ីត្រូវប្រឈមជាមួយភ្លើងឆេះព្រៃ ហើយធ្វើឲ្យតំបន់ទាំងមូលញាំញីដោយផ្សែងអ័ព្ទ ។
ប្រធានាធិបតីអាមេរិកធ្លាប់បានរស់នៅក្នុងប្រទេសឥណ្ឌូនេស៊ីរយៈពេល៥ឆ្នាំ ខណៈដែលលោកនៅជាកុមារភាព ។ វាជាការងាយស្រួលបន្ថែមទៀតសម្រាប់មេដឹកនាំទាំងពីរពិភាក្សាត្រង់ទៅត្រង់មក ហើយការមានជំនឿទុកចិត្តគ្នាពិតជារឿងសំខាន់ និងជាការធ្វើឲ្យចំណងដៃគូមិត្តកាន់តែខ្លាំងក្លាឡើងថែមទៀត ។
ដំណើរទស្សនកិច្ចរបស់លោក Widodo នៅពេលនេះគឺមានការសំចតនៅតំបន់ Silicon Valley ទីដែលលោកនឹងចូលទៅទស្សនាក្រុមហ៊ុន Google និងក្រុម Apple ផងដែរក្នុងគោលបំណងទាក់ទាញឲ្យមានការពង្រីកប្រព័ន្ធបន្ថែមទៀតនៅក្នុងប្រទេសឥណ្ឌូនេស៊ី ៕
ប្រែសម្រួល៖ ថាច់ យ៉ាត
