អគ្គមេបញ្ជាការកងទ័ពរុស្ស៊ី ឧត្តមសេនី Valery Gerasimov បានចោទប្រកាន់ប្រទេសលោកខាងលិច និងតំបន់មជ្ឈឹមបូព៌ា ជាអ្នកហ្វឹកហាត់ដល់មេដឹកនាំក្រុមភេរវកម្ម IS ។
សារព័ត៌មាន Spuniknews កាលពីថ្ងៃទី ២៧ខែធ្នូ បានដកស្រង់ការប្រកាសរបស់មេបញ្ជាការកងទ័ពរុស្ស៊ីបញ្ជាក់ថា «ចាប់តាំង ពីព្រឹត្តិការណ៍ស៊ីរី ចាប់ផ្តើម ខ្ញុំបានតាមដានយ៉ាងយកចិត្តទុកដាក់ ហើយ ឃើញមានចំណុចខុសប្រក្រតី នៅក្នុងយុទ្ធសាស្ត្ររបស់ក្រុម ភេរវកម្ម ។ក្រៅពីការវាយប្រហារភែរវកម្ម ក្រុមIS ក៏បានប្រើប្រាស់យុទ្ធសាស្ត្រ សង្គ្រាមយ៉ាងស្ទាត់ជំនាញ។
មេដឹកនាំក្រុមភេរវកម្មទទួលបានការហ្វឹកហាត់ជាពិសេស ពីប្រទេស លោកខាងលិចណិងតំបន់មជ្ឈឹមបូព៌ា។
លោក Valery Gerasimov បានបញ្ជាក់ទៀតថា នៅក្នុងសមរភូមិ ក្រុមភេរវកម្មដណ្តើមបាន អាវុធជាច្រើនពីកម្លាំងទាហានអីរ៉ាក់ និងស៊ីរី ក្នុងនោះមានទាំង រថក្រោះនិងរថពាសដែក១៥០០គ្រឿង កាំភ្លើង ធំនិងកាំភ្លើងត្បាល់ ១២០០ដើម ។ លោកបន្តទៀតថាសកម្មភាពរបស់ក្រុម IS គឺជាកម្លាំងស្ទាត់ជំនាញនៅក្នុងការធ្វើសង្គ្រាម។
ក្រៅពីនេះ ឧត្តមសេនីយ៍ Valery Gerasimov ក៏បានបញ្ជាក់ថា កម្លាំងទាហានសម្ព័ន្ធមិត្តដឹកនាំដោយអាមេរិក មិនមានបំណងកម្ចាត់ក្រុមភេរវកម្ម IS នោះឡើយ។ លោកបន្តទៀតថា ជារៀងរាល់ថ្ងៃកម្លាំងទាហានរុស្ស៊ី បានបើកការវាយប្រហារតាមដែនអាកាស ប្រមាណ៦០ទៅ៧០ ករណី ថ្ងៃខ្លះវាយប្រហាររហូតដល់ទៅ១២០-១៤០លើក នៅពេលដែលមានភាពតានតឹង។ចំណែកម្លាំងទាហានអាមេរិនិងសម្ព័ន្ធមិត្តបើកការវាយប្រហារតែ ៨ទៅ១០លើកក្នុងមួយថ្ងៃ។ លោកបានចោទប្រកាន់ គោលដៅរបស់ទាហានអាមេរិក មិនសម្តៅទៅលើទាហានក្រុម IS នោះឡើយ គឺសម្តៅទៅលើ រដ្ឋាភិបាលរបស់លោកអាលអាសាដ។
លោក Valery Gerasimov បញ្ជាក់ទៀតថា កម្លាំងទាហានស៊ីរី បានឡោមព័ទ្ធទីតាំង យោធារបស់អាមេរិក នៅក្នុងតំបន់ At Tanf ដោយសារតែ បានឃើញ ក្រុមភេរវកម្មធ្វើដំណើរនៅទីនោះ។ នៅពេលឡោមព័ទ្ធ មាន ទាហានក្រុមIS ប្រមាណ៣៥០នាក់ចាកចេញពីទីនោះ ។ មេបញ្ជាការកងទ័ពរុស្ស៊ី បានបញ្ជាក់ថា មានទីតាំងហ្វឹកហាត់ផ្សេងទៀត នៅតំបន់ Sahddadi ភាគខាងជើងប្រទេសស៊ីរី ។
តាមការបញ្ជាក់របស់កម្លាំងទាហានស៊ីរីបានបញ្ជាក់ថា ទាហានរុស្ស៊ីបានធ្វើសង្គ្រាមប្រឆាំងនិងក្រុមភេរវកម្មប្រមាណ៧មឺននាក់ ហើយមកទលពេលនេះបានសម្លាប់អស់ប្រមាណជង ៦មុឺននាក់ ។ លោក Valery Gerasimov បញ្ជាក់ទៀតថា គោលដៅនៅក្នុងប្រទេសស៊ីរី នាឆ្នាំ២០១៨ខាងមុខគឺ កម្ចាត់ក្រុមភេរវកម្ម IS ឲ្យអស់។
ពាក់ព័ន្ធនិងស្ថានភាពនៅក្នុងប្រទេសស៊ីរីនេះដែរក្នុងចំណោមមនុស្ស១៣លាននាក់នៅស៊ីរី ដែលត្រូវការជំនួយមនុស្សធម៌ មានមនុស្សប្រហែល៣លាននាក់ ដែលបានទទួលជំនួយពីអង្គការសហប្រជាជាតិ និងអង្គការក្រៅរដ្ឋាភិបាលដែលបំពេញបេសកកម្មជួយប្រជាជនតាមតំបន់ក្រុមឧទ្ទាមស៊ីរី។ សេចក្តីសម្រេចពន្យារពេលផ្តល់ជំនួយមនុស្សធម៌ទៅតំបន់ក្រុមឧទ្ទាមស៊ីរី ត្រូវបានក្រុមប្រឹក្សាសន្តិសុខអង្គការសហប្រជាជាតិអនុម័ត ១២សម្លេង ទល់នឹងអនុប្បវាទ៣សម្លេង គឺអនុប្បវាទរបស់រុស្ស៊ី ចិន និងបូលីវី ប៉ុន្តែ គ្មានវេតូជំទាស់ទេ។ ការដឺកស្បៀងទៅជួយប្រជាជននៅតំបន់ក្រុមឧទ្ទាមនឹងពន្យារថែម១ឆ្នាំ រហូតដល់ថ្ងៃ១០មករា ឆ្នាំ២០១៩។
រុស្ស៊ីជាដៃគូរបស់រដ្ឋាភិបាលស៊ីរី ប្រាប់ថា គ្មានបំណងបង្អាក់ដំណើរការដឹកស្បៀងមនុស្សធម៌ស៊ីរីទេ គ្រាន់តែជំទាស់ការពន្យារបែបបច្ចេកទេស នៃសេចក្តីសម្រេចប៉ុណ្ណោះ។ រុស្ស៊ីទាមទារអោយពង្រឹងការត្រួតពិនិត្យការដឹកស្បៀងទាំងនោះ ដើម្បីចៀសកុំអោយមានការលួចលាក់ដឹកអាវុធ ដើម្បីលក់ក្នុងទីផ្សារងងឹត។
សេចក្តីសម្រេចពន្យារពេលដឹកជំនួយមនុស្សធម៌នេះ ស្នើដោយជប៉ុន អេហ្ស៊ីប និងស៊ុយអែត ជាសំណើសុំអោយរដ្ឋាភិបាលស៊ីរីផ្តល់ចម្លើយអោយឆាប់រហ័សដល់ការស្នើផ្សេងៗរបស់អង្គការសហប្រជាជាតិ ហើយបើអាច រដ្ឋាភិបាលស៊ីរីគួរតែផ្តល់ចម្លើយជាវិជ្ជមាន។ សេចក្តីសម្រេចគូសបញ្ជាក់ផងដែរថា ស្ថានការណ៍ស៊ីរីនៅតែបន្តធ្លាក់ដុនដាប ព្រោះស៊ីរីនៅមិនទាន់រកបានដំណោះស្រាយនយោបាយនៅឡើយ។ កិច្ចពិភាក្សាសន្តិភាពក្រុងហ្សឺណែវ រវាងរដ្ឋាភិបាល និងក្រុមឧទ្ទាមស៊ីរី ជុំទី៨ហើយ ក៏នៅតែមិនផ្តល់លទ្ធផលអ្វីយកជាការបាន។ អង្គការសហប្រជាជាតិនឹងស្នើប្រតិទិនមួយ សម្រាប់ការបោះឆ្នោត ទៅអោយគ្រប់ភាគីក្នុងជម្លោះស៊ីរី។ អង្គការសហប្រជាជាតិក៏នឹងស្នើនិតិវិធីកំណែទម្រង់ផ្សេងៗដល់ពួកគេផងដែរ៕
ដោយ៖ មែវ សាធី
