ខេត្តរតនគិរី៖ យ៉ាងហោចណាស់បុរស២នាក់បានស្លាប់ភ្លាមៗនៅកន្លែងកើតហេតុ និង២នាក់ទៀតរងរបួសធ្ងន់ ដោយសារជិះម៉ូតូបុកគ្នាពេញទំហឹងកាលពីវេលាម៉ោង៩និង៤០នាទីយប់ ថ្ងៃទី២៧ ខែតុលា ឆ្នាំ២០១៥ តាមបណោយផ្លូវជាតិលេខ៧៦នៅចំណុចភូមិព្រួក ឃុំប៉ាតាង ស្រុកលំផាត់ ខេត្តរតនគិរី ។
ជនរងគ្រោះបើកបរឈ្មោះ ខ្លីន ស (ភេទទី៣) អាយុ២៧ឆ្នាំ ជនជាតិខ្មែរ ភុងលលាដ៍ក្បាល ស្លាប់នៅនឹងកន្លែង ។ មុនកើតហេតុជនរងគ្រោះជិះម៉ូតូម្នាក់ឯងម៉ាកវីវ៉ា ពណ៍ខ្មៅ អត់ស្លាកលេខ ក្នុងទិសដៅពីត្បូងទៅជើង និងមានទីលំនៅភូមិ-ឃុំកើតហេតុខាងលើ ។
ប្រភពព័ត៌មានពីសមត្ថកិច្ចមូលដ្ឋានបានឲ្យដឹងថា មុនពេលកើតហេតុ គេបានឃើញម៉ូតូមួយគ្រឿងម៉ាកឆ្លាម ពណ៍ខ្មៅ ពាក់ស្លាកលេខ រតនគិរី ១A.២១០៩ ធ្វើដំណើរក្នុងល្បឿនយ៉ាងលឿនតាមបណ្តោយផ្លូវជាតិលេខ៧៦ ក្នុងទិសដៅពីជើងទៅត្បូង ខណៈដល់ចំណុចកើតហេតុខាងលើ ក៏បុកគ្នាយ៉ាងពេញទំហឹងតែម្តង ។
ប្រភពបានបន្តទៀតថា អ្នកបើកកបរឈ្មោះ តាក់ ឃុង ភេទប្រុស អាយុ១៨ឆ្នាំ ជនជាតិទំពួន ភុងលលាដក្បាល(ស្លាប់)នៅនឹងកន្លែងកើតហេតុ ចំណែកអ្នករួមដំណើ២នាក់ មិនស្គាល់អត្តសញ្ញាណ រងរបួសធ្ងន់ត្រូវបានរថយន្តសាម៉ុយដឹកយកទៅសង្គ្រោះបន្ទាន់នៅឯមន្ទីរពេទ្យបង្អែកខេត្តភ្លាម ៗ ។
ក្រោយកើតហេតុ សាកសពជនរងគ្រោះទាំង២នាក់ ត្រូវបានសមត្ថកិច្ចប្រគល់ទៅឲ្យក្រុមគ្រួសាយកទៅធ្វើបុណ្យទៅតាមប្រពៃណី រីឯម៉ូតូទាំង២គ្រឿង សមត្ថកិច្ចយកមករក្សាទុកនៅប៉ុស្តិ៍ឃុំប៉ាតាង រង់ចាំដោះស្រាយជាក្រោយ ៕
ដោយ៖ អ៊ុចសាវុទ្ធ
