ខេត្តបាត់ដំបង៖ សំណុំរឿងអតីតគ្រូពេទ្យយ៉ែម ជ្រិន រង់ការចោទប្រកាន់ព្យាបាលជម្ងឺប្រជាពលរដ្ឋ ឆ្លងមេរោគអេដស៍ជិត៣០០នាក់ នៅឃុំរកា ស្រុកសង្កែ ខេត្តបាត់ដំបង ត្រូវបានតុលាការខេត្តបាត់ដំបងបញ្ចប់នីតិវិធីនៃការសាកសួរនៅក្នុងអង្គជំនុំជម្រះសវ ការកាលពីថ្ងៃទី២៨ ខែតុលា ឆ្នាំ២០១៥ ក៏ប៉ុន្តែតុលាការមិនទាន់ប្រកាសសាលក្រមផ្តន្ទាទោសនៅឡើយនោះទេ។ សំណុំរឿងជនជាប់ចោទឈ្មោះ យ៉ែម ជ្រិន តុលាការនិងបើកសវការប្រកាសសាលក្រមនៅថ្ងៃទី៣ ខែធ្នូ ឆ្នាំ២០១៥ ខាងមុខ។
អង្គសវការជំនុំជម្រះរឿងក្តីអតីតគ្រូពេទ្យយ៉ែម ជ្រិន គឺដំណើរការទៅមានរយៈពេល៥ថ្ងៃ គឺចាប់ពីថ្ងៃទី២០ តុលា រហូតដល់ថ្ងៃទី២៨ ខែតុលា ឆ្នាំ២០១៥ ហើយនៅក្នុងអង្គជំនុំជម្រះ គេសង្កេតឃើញដឹកនាំប្រធានក្រុមនៃអង្គចៅក្រមជំនុំជម្រះ ដោយ លោក ស្រី យិច ឈាណាវី និងចូលរួមចៅក្រមប្រឹក្សា២រូបទៀត គឺចៅក្រម លីស សុខា និងចៅក្រម អ៊ុក សុវណ្ណរិទ្ធ ចំណែកតំណាង អយ្យការ គឺ លោក ហេង លុយ ព្រះរាជអាជអាជ្ញារងអមសាលាដំបូងខេត្ត ដែលជាតំណាងឱ្យដើមបណ្តឹងរបស់ជនរងគ្រោះ និងមេធាវីការពារក្តី ជនជាប់ចោទ ផងដែរ។ នៅពេលនោះក៏គេសង្កេតឃើញមានការចូលរួមបំភ្លឺពីមកពីតំណាងក្រសួងសុខាភិបាល រួមមានលោក មាន ឈីវ៉ុន ទីប្រឹក្សាក្រសួងសុខាភិបាល លោក នាយសកលវិទ្យាធិការនៃសាកលវិទ្យាល័យសុខាភិបាល និងលោក វឿង ប៊ុនរ៉េត ប្រធានមន្ទីរសុខាភិបាលខេត្តបាត់ដំបង ដែលជាក្រុមការងារនៃការចុះស្រាវជ្រាវស៊ើបអង្កេតនៃរឿងរ៉ាវករណីឆ្លងមេរោគអេដស៍នៅឃុំរកាផងនោះដែរ។
អង្គសវការដំណើរការទៅនៅថ្ងៃចុងក្រោយគឺថ្ងៃទី២៨ ខែតុលា ឆ្នាំ២០១៥ គេសង្កេតឃើញចៅក្រមជំនុះជម្រះ តំណាងអយ្យការ និងមេធាវីការពារជនជាប់ចោទ បានធ្វើការសាកសួរដេញដោល ជនរងគ្រោះដែលជាសាក្សី, សាក្សីតំណាងក្រសួងសុខាភិបាល, ជនជាប់ចោទនិង សាក្សីខាងជនជាប់ចោទដែលបាន ចូលខ្លួនបំភ្លឺនៅអង្គសវការ ហើយការសាកសួរបានអូសបន្លាយពេលវេលាចាប់ពីម៉ោង៣រសៀលរហូតដល់ម៉ោង៧និង៣០នាទីយប់ថ្ងៃដដែល ទើបនីតិវិធីនៃការសាកសួរបស់តុលាការត្រូវបានបញ្ចប់ទាំងស្រុង ។
តមក តំណាងអយ្យការបានធ្វើការសរុបសន្និដ្ឋានដោយយោងតាមពាក្យបណ្តឹងរបស់ ជនរងគ្រោះជាង១០០នាក់ និងយោងតាមឯកសារស្រាវជ្រាវរបស់ក្រុមការងារស៊ើបអង្កេតរបស់ក្រសួង សុខាភិបាលបានបញ្ចូនមកអយ្យការ និងយោងតាមការសាកសួរដេញដោលជនរងគ្រោះ ជន, ជាប់ចោទ និងអ្នកតំណាងសាក្សីពាក់ព័ន្ធមួយចំនួននិងតំណាងក្រសួងសុខាភិបាលនៅក្នុងអង្គសវការពេលដែលមានរយៈ៥ថ្ងៃរកឃើញថាជនជាប់ចោទឈ្មោះ យ៉ែម ជ្រិន ប្រព្រឹត្តខុសនិងវិជ្ជាជីវៈរបស់គ្រូពេទ្យព្យាបាលជម្ងឺបង្កឆ្លងមេរោគអេដស៍ដល់ប្រជាពលរដ្ឋនៅឃុំរកាចំនួន២៩០នាក់ ។
លោកព្រះរាជអាជ្ញាតំណាងដើមបណ្តឹងរបស់ជនរងគ្រោះបានស្នើសុំឱ្យតុលាការត្រូវផ្តន្ទាទោស ជនជាប់ចោទឈ្មោះ យ៉ែម ជ្រិន ដាក់គុក អស់មួយជីវិត ដោយចោទប្រកាន់ពីបទល្មើសចំនួន៣ករណី ១.ការប្រព្រឹត្តរាលដាលមេរោគ អេដស៍ក្នុងចេតនា ចម្លងអ្នកដទៃ ក្នុងមាត្រា១៨និង៥០ នៃច្បាប់ស្តីពីអេដស៍ ២,ឃាតកម្មដោយ អំពើឃោរឃៅ ក្នុងមាត្រា២០៥ នៃក្រមព្រហ្មទណ្ឌ និចចំណុចទី៣, ចោទប្រកាន់ ពីបទ បើកពីគ្រោះជម្ងឺដោយគ្មានការអនុញ្ញាតពីក្រសួងសុខាភិបាល។ ក៏ប៉ុន្តែបទល្មើសទី៣ លោកព្រះរាជអាជ្ញាក៏បានស្នើសុំតុលាការពិចារណាគ្រាន់តែឱ្យបិទទីតាំងប៉ុណ្ណោះ ។
ទន្ទឹមនោះ មេធាវីការពារក្តីជនជាប់ចោទ បានស្នើសុំឱ្យតុលាការពិចារណាបដិសេដ្ឋនូវការចោទ ប្រកាន់របស់លោកព្រះរាជអាជ្ញាមកលើកូនក្តីរបស់លោកទៅលើបទល្មើសឃាតកម្មដោយអំពើឃោឃៅក្នុងមាត្រ២០៥ នៃក្រមព្រហ្មទណ្ឌ ដោយលោកមេធាវីអះអាងថា កូនក្តីរបស់ លោកជាជនជាប់ចោទ មិនមានសកម្មភាពចេតនាណាទៅចម្លងមេរោគអេដស៍ដល់ប្រជាពលរដ្ឋនោះទេ ដោយលោកអះអាងថាកូនក្តីរបស់លោកជាមនុស្សដែលមានសប្បុរសធម៌ ប្រជាជនតែងអាណិតស្រលាញ់រាប់អានតែងតែហៅគាត់ទៅព្យាបាលជម្ងឺដោយ អ្នកជម្ងឺខ្លះមានជីវភាពក្រខ្សត់គាត់មិនយកប្រាក់ មិនតែប៉ុណ្ណោះ ការព្យាបាលជម្ងឺនៅពេលខ្លះអ្នកជម្ងឺជំពាក់ប្រាក់ក៏គាត់មិនទារ ផងនោះទៀត ។
សូម្បីអ្នករងគ្រោះថ្នាក់ចរាចរណ៍នៅពេលព្យាបាលនៅមន្ទីរពេទ្យអស់ប្រាក់ច្រើន ក៏រត់មកព្យាបាលកូនក្តី លោកទៀតផង។ចំណែកបទល្មើសចំនួន២ករណីទៀតលោកសូមឱ្យតុលាការពិចារណាអនុវត្តតាមនីតិវិធីនៃច្បាបទៅចុះ។តមកជនជាប់ចោទឈ្មោះ យ៉ែម ជ្រិន ក៏បាននិយាយនៅក្នុងអង្គសវការសុំឱ្យតុលាការបន្ធូបន្ថយទោសដល់រូបលោក ពីព្រោះលោកគ្មានចេតនាព្យាបាលជម្ងឺប្រជាពលរដ្ឋ ឱ្យឆ្លងមេរោគអេដស៍នោះឡើយ គឺលោកចង់តែព្យាបាលអ្នជម្ងឺជាសះស្បើយ ហើយលោកសប្បាយចិត្ត។ បន្ទាប់មកតុលាការក៏បានប្រកាសបិទអង្គសវការដើម្បីធ្វើការពិចារណាដោយលើកពេលរង់ចាំប្រកាសសាលក្រមផ្តន្ទាទោសនៅថ្ងៃ៣ខែធ្នូឆ្នាំ២០១៥ ខាងមុខ ។
សូមបញ្ជាក់ថា នៅពេលដែលតុលាការបញ្ជាឱ្យនាំខ្លួនជនជាប់ចោទឈ្មោះ យ៉ែម ជ្រិន ទៅឃុំខ្លួននៅពន្ធនាគារ គឺគេសង្កេតឃើញប្រពន្ធជនជាប់ចោទ និងបងស្រីថ្លៃរបស់ជនជាប់ចោទនៅពេលនោះបានស្រែកទ្រហូរយំរហូតដល់សន្លប់បាត់ស្មារតីនៅកន្លែងតុលាការ ក៏ប៉ុន្តែត្រូវបានគ្រូពេទ្យជួយអន្តរាគមន៍ទាន់ពេលវេលា ។
គួរបញ្ជាក់ថា អតីគ្រូពេទ្យឈ្មោះ យ៉ែម ជ្រិន អាយុ៥៦ឆ្នាំ រស់នៅភូមិរកា ឃុំរកា ស្រុក សង្កែ ត្រូវបាននគរបាលខេត្តបាត់ដំបងចាប់ឃាត់ខ្លួនកាលពីថ្ងៃទី១៧ ខែធ្នូ ឆ្នាំ២០១៤ ក្រោយពីមានការភ្ញាក់ផ្អើលនូវករណីផ្ទុះអ្នកឆ្លងមេរោគអេដស៍ទៅលើប្រជាជនដ៏ច្រើនសន្ទឹកសន្ធាប់លើកដំបូងនៅឃុំ រកានោះ ។ ករណីឆ្លងមេរោគអេដស៍ ត្រូវគេដាក់ការសង្ស័យថាបង្កឡើងដោយការព្យាបាលជម្ងឺទៅលើប្រជាពលរដ្ឋចាក់ថ្នាំនិងព្យួសេរ៉ូមមិនប្រុងប្រយ័ត្នរបស់គ្រូពេទ្យឈ្មោះ យ៉ែម ជ្រិន។សេចក្តីរាយការណ៍ឱ្យដឹងថា មកដល់ពេលនេះ ក្នុងចំណោមជនរងគ្រោះឆ្លងមេរោគទាំង២៩០នាក់មានជនរងគ្រោះ ក្មេងប្រុសស្រីនិងមនុស្សចាស់ចំនួន១០នាក់ បានស្លាប់រួចមកហើយ។សេចក្តីរាយការណ៍ឱ្យ ដឹងទៀតថាទន្ទឹមនោះក៏មានអ្នកឆ្លងមេរោគអេដស៍មួយចំនួនទៀតកំពុងធ្លាក់ខ្លួនឈឺដុន ដាបជាបន្តបន្ទាប់នោះផងដែរ ៕
ដោយ៖ សំ វិច្ឆិកា
