ខេត្ដតាកែវ៖ កាលពីពេលថ្មីៗនេះ ក្រុមអាជីវករលក់ដូរនៅក្នុងផ្សារអង្គរបុរីស្ថិតក្នុងភូមិកំពង់ហ្លួង ឃុំស្រុកអង្គរបុរី ខេត្ដតាកែវបានបែងចែកផ្សារជាពីរហើយសកម្មភាពនេះត្រូវបានលោកប្រធាន វិនិយោគផ្សារអង្គរបុរីចោទថា វាជា ទសកម្មភាពរបស់លោកអភិបាលស្រុក ទើបបានជាក្រុមអាជីវករធ្វើបែបនេះ ។
បើយោងតាមការអះអាងពីក្រុម អាជីវករក្នុងផ្សារអង្គរបុរីបានឱ្យដឹងថា មុនពេលកើតរឿងចែកផ្សារជាពីរដើម្បីលក់ដូរបន្លែត្រីសាច់ គឺលក់ដូរជាប់ៗគ្នា មិនមានបញ្ហាអ្វីនោះទេតែបច្ចុប្បន្ន ស្រាប់ តែប្រធានផ្សារចាត់ចែងឱ្យក្រុមអាជីវករដែលលក់ដូរបន្លែត្រីសាច់ចល័តទៅលក់នៅកន្លែងផ្សេង ចំណែកតូបលក់សាច់ ជ្រូកសាច់គោមិនអាចបម្លាស់ទីបានគឺលក់ដូរឱ្យខ្មោចទៅវិញ ។
យោងតាមប្រភពដដែលបានឱ្យដឹងថាកាលដែលលោក ឌឹម គឹមសាន្ដមិន ទាន់ចូលមកកាន់តំណែងជាអភិបាល ស្រុកអង្គរបុរីក្រុមអាជីវករពួកគាត់មានការលក់ដូរដោយរលូនមិនមានបញ្ហាអ្វី កើតឡើងនោះទេ គ្រាន់តែលោកចូល កាន់ជាអភិបាលស្រុកស្រាប់តែមាន បញ្ហាមិនចេះចប់រឿងផ្សារអង្គរបុរីនេះ ។
បើយោងតាមក្រុមអាជីវករបានឱ្យ ដឹងបន្ថែមទៀតថា ពួកគាត់ស្នើសុំឱ្យ លោកអភិបាលស្រុក និងលោកប្រធាន ផ្សារមេត្ដាជួយរៀបចំក្រុមលក់ដូរបន្លែ ត្រីសាច់នៅជុំគ្នាវិញកុំឱ្យបន្លែត្រីសាច់យកទៅលក់ជាមួយស្ដង់លក់ស្បែកជើង ខោអាវដូចសព្វថ្ងៃទៀត ។
ជុំវិញករណីខាងលើលោក ប្រាក់ ឈី ប្រធានវិនិយោគផ្សារអង្គរបុរីបានឱ្យដឹងថា រឿងក្រុមអាជីវករមានភាពចល័ត មិនមែនជាកំហុសរបស់លោកនោះទេ វាជាការរៀបចំរបស់លោកអភិបាល ស្រុក ។ លោកបានបន្ដទៀតថាបើក្រុម អាជីវករលក់ដូរមានភាពចលាចលបែបនេះលោកស្នើរសុំក្រុមអាជីវករនាំគ្នាទៅឱ្យលោកអភិបាលស្រុកដោះស្រាយទៅ លោកមិនអាចដោះស្រាយបានទេ ។
លោកប្រាក់ ឈី ប្រធានវិនិយោគ ផ្សារអង្គរបុរីបានឱ្យដឹងបន្ថែមទៀតថា ក្រុមអាជីវករលក់ដូរសុខៗស្រាប់តែលោកអភិបាលស្រុកអង្គរបុរីចេញមករៀបចំសណ្ដាប់ធ្នាប់ធ្វើឱ្យមានភាពចលាចល ទៅវិញ ។
ជុំវិញការចោទពីលោកប្រធានផ្សារអង្គរបុរីទៅលើលោកអភិបាលស្រុក បែបនេះអ្នកយកព័ត៌មាននគរវត្ដមិន អាចសុំការបំភ្លឺពីលោក ឌឹម កឹមសាន្ដ អភិបាលស្រុកអង្គរបុរីបានទេដោយទូរស័ព្ទចូលជាច្រើនដងមិនមានអ្នកទទួល ៕
ដោយ៖ ជីសូរកា
