ភ្នំពេញ ៖ លោក ឃួង ស្រេង អភិបាលរាជធានីពេញ បានលើកឡើងថា៖ រដ្ឋបាលរាជធានីភ្នំពេញ គ្រោងដាំ ព្រៃលិចទឹកចំនួន៥០០ហិកតា នៅបឹងតាមោក ក្នុងខណ្ឌ ព្រែកព្នៅ ដើម្បីរក្សាជាបឹងបៃតង និងកាត់បន្ថយជាតិពុលនៅក្នុងបឹង ហើយគម្រោងនេះជាជំហានដំបូង យើងដាំត្រឹមតែ១០០ហិកតាសិន ហើយគម្រោងនេះនឹងចាប់ផ្តើមនារដូវប្រាំងនេះហើយដើមឈើ ដែលគ្រោងនឹងយកមកដាំក្នុងទឹកនេះមានដូចជា៖ ដើមឬស្សី ដើមប្រស់ ដើមរាំងទឹក ដើមថ្កូវ ដើមសណ្តាន់ជាដើម។
លោក ឃួង ស្រេង បានលើកឡើងបែបនេះ ក្នុងឱកាសបើកកិច្ចប្រជុំស្តីពីការរៀបចំ Master Plan ដាំដើមឈើក្នុងរាជធានីភ្នំពេញ កាលពីថ្ងៃសុក្រ ១០កើត ខែមាឃ ឆ្នាំរកានព្វស័កព.ស២៥៦១ ត្រូវនិងថ្ងៃទី២៦ មករា ឆ្នាំ២០១៨ នៅសាលារាជធានីភ្នំពេញ គម្រោងដាំដើមឈើនេះ គឺ ដើម្បីលើកម្ពស់សោភ័ណភាពទីក្រុង រួមចំណែកកាត់បន្ថយការបំពុលបរិស្ថានដែលកើតចេញពីយានជំនិះប្រចាំថ្ងៃផង ដូច្នេះទាំងការងារបច្ចេកទេស និងការដាំដើមឈើ ត្រូវដាំនៅតាមដងផ្លូវនានាក្នុងរាជធានីភ្នំពេញ។
លោក ឃួង ស្រេង ក៏បានជំរុញឲ្យមន្ត្រីជំនាញពាក់ព័ន្ធពិសេសខាង BAU (ការិយាល័យរៀបចំក្រុង) មន្ទីរកសិកម្មរាជធានី សិក្សាឲ្យបានច្បាស់លាស់ ចៀសវាងការយកដើម ឈើ មកដាំក្នុងទឹកនេះមិនទទួលបានផលដោយ ហេតុថាទឹក ដែលយើងត្រូវយកដើម ឈើលិចទឹកមកដាំនេះ វាជាទឹកមានជាតិប្រៃ និងស្អុយវាខុសពីទឹកធម្មជាតិ។
សូមបញ្ជាក់ថា៖ កាលពីរសៀលថ្ងៃទី២៩ធ្នូ ឆ្នាំ២០១៧កន្លងទៅ លោក ឃួង ស្រេង បានឯកភាពឲ្យមានការដាំ ដើមឈើឲ្យក្លាយជាទីក្រុងមាន ពណ៌បៃតងពិសេសការដាំដើមឈើជាច្រើនប្រភេទនៅតាមបណ្តោយផ្លូវ R1 (ផ្លូវក្នុងតំបន់អភិវឌ្ឍបឹងកក់ ចាប់ពីផ្លូវសហព័ន្ធរុស្សី ដល់ផ្លូវ៧០ ទំនប់ទួលគោក) ហើយការងារនេះ បានជំរុញឲ្យក្រុមហ៊ុន ស៊ូកាគូអ៊ីន ដាំដើមឈើឲ្យបានរួចរាល់នៅក្នុងរដូវប្រាំងនេះ ៕

ដោយ៖ សំរិត