បន្ទាប់ពីប្រទេសថៃបានហាមប្រាមបង្កើតកូនស៊ីឈ្នួលឲ្យជនបរទេស ពេលនេះប្រទេសឥណ្ឌាក៏បានចេញច្បាប់ដូចគ្នានេះដែរ។ រដ្ឋាភិបាលឥណ្ឌាកាលពីថ្ងៃទី២៨ ខែតុលា បានផ្សាយថា នឹងហាមប្រាមជនបរទេសប្រើប្រាស់សេវាកម្មបង្កើតកូនស៊ីឈ្នួលនៅក្នុងប្រទេសនេះ ។ សកម្មភាពរបស់រដ្ឋាភិបាលបានធ្វើឲ្យប៉ះពាល់យ៉ាងខ្លាំងទៅលើវិស័យឧស្សាហកម្មបង្កើតកូនស៊ីឈ្នួលនៅឥណ្ឌា ដែលបានកើតឡើងយ៉ាងគគ្រឹកគគ្រេងនាពេលកន្លងមក។
គូស្វាមីភរិយាបរទេសដែលគ្មានកូនបាននាំគ្នាទៅកាន់ប្រទេសឥណ្ឌាដើម្បីជួលស្ត្រីនៅទីនោះបង្កើតកូនឲ្យពួកគាត់ក្នុងតម្លៃថោក និងស្រប់ច្បាប់ទៀតផង។ ក្រសួងសុខាភិបាលឥណ្ឌាបានប្រកាសថាវិស័យឧស្សាហកម្មបង្កើតកូនស៊ីឈ្នួលនៅក្នុងប្រទេសនេះបានរកប្រាក់ចំណូលរហូតដល់១៣៨លានដុល្លារក្នុងមួយឆ្នាំ ហើយបានកើតឡើង២០ភាគរយ ជាបន្តបន្ទាប់ជារៀងរាលឆ្នាំ។
ប៉ុន្តែមតិសាធារណៈ និងមន្ត្រីឥណ្ឌាមួយចំនួនបានបញ្ជាក់ថា ស្ត្រីវ័យក្មេងជាច្រើនមកពីជនបទ ក្រីក្រ ត្រូវបានគេប្រើប្រាសកេងប្រវញ្ច ឲ្យបង្កើតកូនស៊ីឈ្នួលក្នុងតម្លៃថោក ហើយគ្មានការធានារ៉ាប់រងសុខាភិបាលឡើយ។
នៅក្នុងសារលិខិតផ្ញើទៅកាន់តុលាការជាន់ខ្ពស់ឥណ្ឌាកាលពីថ្ងៃទី២៨ ខែតុលា រដ្ឋាភិបាលឥណ្ឌាបញ្ជាក់ថា មិនគាំទ្រដល់សេវាកម្មបង្កើតកូនស៊ីឈ្នួលនោះឡើយ។ ខ្លឹមសារនៅក្នុងសារលិខិតនោះបញ្ជាក់ថា«គ្មានជនបរទេសណាមួយអាចប្រើប្រាស់សេវាកម្មបង្កើតកូនស៊ីឈ្នួលនៅឥណ្ឌាទៀតឡើយ ។ សេវាកម្មបង្កើតកូនស៊ីឈ្នួលអាចធ្វើទៅបាន តែពលរដ្ឋឥណ្ឌាដែលរៀបការយូរឆ្នាំមិនទាន់មានកូនតែប៉ុណ្ណោះ»។ រដ្ឋាភិបាលនឹងចេញច្បាប់ហាមបង្កើតកូនឲ្យជនបរទេស។
ប៉ុន្តែក្រុមសកម្មជនដើម្បីសិទ្ធិមនុស្សឥណ្ឌាបានព្រមានថា សកម្មភាពខាងលើរបស់រដ្ឋាភិបាល គឺធ្វើឲ្យមាន ទីផ្សារងងឹត លើវិស័យបង្កើតកូនស៊ីឈ្នួល ពិបាកក្នុងការគ្រប់គ្រង ហើយថែមទាំងបាត់បង់ប្រាក់ចំណូលជាតិទៀតផង។
សេវាកម្មសម្រាប់បង្កើតកូនស៊ីឈ្នួលនៅឥណ្ឌាមានតម្លៃចាប់ពី១៨.០០០ទៅ៣០.០០០ដុល្លារសម្រាប់ទារកម្នាក់ ប៉ុន្តែសម្រាប់ស្ត្រីដែលពរពោះវិញ ទទួលបានតែ៨០០០ដុល្លារប៉ុណ្ណោះ គឺទាបជាងការបង្កើតកូនស៊ីឈ្នួលនៅអាមេរិកដល់ទៅ៣ដង ។
កាលពីឆ្នាំ២០១២ រដ្ឋាភិបាលឥណ្ឌាបានចេញបញ្ជាហាមគូស្វាមីភរិយាភេទដូចគ្នា ប្រើប្រាស់សេវាកម្មស៊ីឈ្នួលបង្កើតកូននៅឥណ្ឌា។ តាមច្បាប់កាលពីឆ្នាំ២០១២បញ្ជាក់ថា ប្តីប្រពន្ធត្រូវតែមានភេទផ្ទុយគ្នា ទើបអាចបង្កើតកូនតាមសេវាកម្មខាងលើបាន ហើយរៀបការយ៉ាងតិចក៏ពីរឆ្នាំដែរទើបមានសិទ្ធិជួលគេបង្កើតកូនឲ្យ ៕
ប្រែសម្រួល៖ ម៉ែវ សាធី
