ខេត្តកណ្តាល៖ ចោរប្លន់ប្រដាប់អាវុធពីរនាក់បានចូលប្លន់យកទ្រព្យសម្បត្តិ ពលរដ្ឋជាអ្នកលក់ចាប់ហ៊ួយយកអស់មាស និងលុយជាច្រើនព្រម ទាំងទូរសព្ទ័៣គ្រឿង ហើយគេចខ្លួនបាត់ដោយសុវត្ថិភាព ។
ហេតុការណ៍នេះកើតឡើងកាលពីវេលាម៉ោង២៣និង៣០នាទី ថ្ងៃទី២៨ ខែតុលា ឆ្នាំឆ្នាំ២០១៥ នៅចំណុចផ្ទះគ្មានលេខ ក្នុងភូមិ ជ្រែមួយរយ ឃុំសំបួមាស ស្រុកមុខកំពូល ខេត្តកណ្តាល ។
ប្រភពពីសមត្ថកិច្ច បានឱ្យដឹងថា ជនរងគ្រោះដែលត្រូវចោរប្លន់ ឈ្មោះ ឈន ចលនា អាយុ៤៩ឆ្នាំ ប្រពន្ធ ឈ្មោះ សា រ៉េត អាយុ៣៥ឆ្នាំ មានលំនៅភូមិកើហេតុខាងលើ ចំណែកជនសង្ស័យមានគ្នា២នាក់ស្លៀកពាក់ស៊ីវិល ហើយមានអាវុធ AK 47មួយដើម និងកាំបិតចុងស្រួចមួយបានធ្វើសកម្មភាពសម្លុតគំរាមយកអស់លុយចំនួន២៥០ម៉ឺនរៀល ខ្សែកមាស៥ជីមួយខ្សែ ចិញ្ចៀនមួយវង់ទម្ងន់១ជីកន្លះ និងទូរសព្ទ័៣គ្រឿង ក្នុងនោះ ម៉ាកអាយហ្វូនមួយគ្រឿង និងម៉ាកណូគា ពីរគ្រឿង ។
បន្ទាប់ពីសម្លុតយកកាបូបលុយ និងមាសរួចហើយ ជនសង្សយ័ទាំង២នាក់បានគេចខ្លួនចេញតាមផ្លូវក្រោយផ្ទះជនរងគ្រោះបាត់ស្រម៉ោល លុះព្រឺកឡើងថ្ងៃទី២៩ ខែតុលា ឆ្នាំ២០១៥ សមត្ថកិច្ចចំរុះបានចុះធ្វើកំណត់ហេតុហើយបានរកមើលជុំវិញផ្ទះ ឃើញជនសង្ស័យ បន្សល់ ទុកកាំបិតចុងស្រួចមួយជារបស់ចោរ និងកាបូបជនរងគ្រោះពណ៌ខ្មៅមួយ តែសម្ភារអស់គ្មានសល់ ។
ជុំវិញករណីចោរប្លន់ខាងលើនេះ សមត្ថកិច្ចដាក់ការសង្ស័យទៅលើមនុស្សធ្លាប់ចេញ ចូល តែពុំទាន់ដឹងថា អ្នកណានៅឡើយទេ ។
បច្ចុប្បន្ន សមត្ថកិច្ចកំពុងស៊ើបអង្កេតស្រាវជ្រាវ រកមុខសញ្ញា ដើម្បីចាត់ការតាមច្បាប់ ៕
ដោយ៖ ឡូ សំអាត
