ក្រុមរដ្ឋអិស្លាម (IS) ត្រូវគេរាយការណ៍ថាបានធ្វើសកម្មភាពវាយប្រហារដណ្តើមគ្រប់គ្រងបានទីក្រុង Maheen ស្ថិតនៅក្នុងខេត្ត Homs ពីកងកម្លាំងទាហានស៊ីរី ។ សេចក្តីរាយការណ៍នេះត្រូវគេធ្វើឡើងកាលពីថ្ងៃទី២ ខែវិច្ឆិកា ឆ្នាំ២០១៥ ។
ក្រុមសង្កេតការណ៍សិទ្ធិមនុស្សស៊ីរីមានមូលដ្ឋាននៅចក្រភពអង់គ្លេសបានបញ្ជាក់ថា ក្រុមរដ្ឋអិស្លាមបានបើកការប្រយុទ្ធប្តូរស្លាប់រស់ ដោយការបំផ្ទុះរថយន្តអត្តឃាត២គ្រឿងកើតឡើងកាលពីរសៀលថ្ងៃទី៣១ ខែតុលា ឆ្នាំ២០១៥។ បន្ទាប់មកការប៉ះទង្គិចគ្នាក៏បានកើតឡើងជាមួយកងកម្លាំងរដ្ឋាភិបាលដែលស្ថិតនៅជិតទីក្រុង Sadad សម្បូរដោយអ្នកកាន់សាសនាគ្រឹស្ទរស់នៅនោះ ។
សកម្មភាពដណ្តើមបានគ្រប់គ្រងរបស់ក្រុមរដ្ឋអិស្លាមនេះកើតឡើង ខណៈដែលយុទ្ធនាការតាមដែនអាកាសក្នុងទឹកដីស៊ីរីរបស់កងកម្លាំងទាហានរុស្ស៊ី និងកម្លាំងសម្ពន្ធមិត្តដឹកនាំដោយអាមេរិក ។ ក្រុមរដ្ឋអិស្លាមបានពង្រីកទឹកដីកាន់កាប់របស់ខ្លួនបានយ៉ាងប៉ិនប្រសប់ និងងាយស្រួលជាទីបំផុតស្ថិតនៅភាគខាងជើង និងភាគខាងកើតឆ្ពោះទៅកាន់ទីប្រជុំជន Homs ភាគកណ្តាលប្រទេសស៊ីរីនោះ ក្នុងអំឡុងខែថ្មីៗនេះ ។
កាលពីខែឧសភា ឆ្នាំ២០១៥កន្លងទៅនេះ ក្រុមរដ្ឋអិស្លាមបានដណ្តើមគ្រប់គ្រងទីក្រុង Tadmur ទីក្រុងដែលមានប្រាសាទបុរាណ Palmyra ដ៏ល្បីល្បាញនោះ ហើយបន្តបន្ទាប់ក្រោយមកទៀត ក្រុមរដ្ឋអ៊ីស្លាមបានគ្រប់គ្រងទីក្រុង al-Qaryatain បន្ថែមទៀតនៅក្នុងខែសីហា ឆ្នាំ២០១៥ ។
ការគ្រប់គ្រងបានទីក្រុង Maheen និង Sadad នេះធ្វើឲ្យក្រុមរដ្ឋអិស្លាមកាន់តែខិតជិតបន្ថែមទៀត ចម្ងាយតែ២០គីឡូម៉ែត្រប៉ុណ្ណោះពីមហាវិថីដែលតភ្ជាប់ពីរដ្ឋធានទីដាម៉ាកាស ស៊ីរីឆ្ពោះទៅកាន់ទីក្រុង Homs និងទៅកាន់រដ្ឋធានីផ្សេងៗទៀតស្ថិតនៅភាគខាងជើងស៊ីរីនោះ ៕
ប្រែសម្រួល៖ ថាច់ យ៉ាត
