ខេត្តកណ្តាល៖ បុរសម្នាក់ខឹងសម្បាទៅលើក្មួយប្រុសស្រែកច្រៀងពេលខ្លួនកំពុងអង្គុយហូបបាយក្រោមផ្ទះ ក៏ស្ទុះចូលទៅវាយជាច្រើនដៃបន្ទាប់មកជនរងគ្រោះបានរត់ទៅឲ្យលោកតាជួយអន្តរាគមន៍ ក៏ត្រូវជនសង្ស័យកាប់ចំនួន៣កាំបិតផ្គាក់បន្ថែមទៀត បណ្តាលឲ្យស្លាប់បាត់បង់ជីវិតយ៉ាងអណោចអធ័ម ។ ក្រោយពីមានហេតុការណ៍កើតឡើងជនដៃដល់ត្រូវបានសមត្ថកិច្ចនគរបាលប៉ុស្តិ៍រដ្ឋបាលភ្នំបាតឃាត់ខ្លួន បញ្ជូនទៅកាន់អធិការដ្ឋាននគរបាលស្រុកពញាឮ ដើម្បីកសាងសំណុំរឿងចាត់ការតាមច្បាប់ ។
ករណីមនុស្សឃាតដោយចេតនានេះបានកើតឡើង កាលពីវេលាម៉ោង១១ និង៣០នាទី ថ្ងៃទី០១ ខែវិច្ឆិកា ឆ្នាំ២០១៥ ស្ថិតក្នុងភូមិថ្លុកត្របែក ឃុំភ្នំបាត ស្រុកពញាឮ ។
អធិការនគរបាលស្រុកពញាឮលោកវសេនីយ៍ទោ ដួង តេង បានឲ្យដឹងថា ជនដៃដល់ដែលត្រូវបានឃាត់ខ្លួននោះឈ្មោះ ប៉ិច ពន ភេទប្រុស អាយុ២៨ឆ្នាំ មុខរបរមិនពិតប្រាកដ មានទីលំនៅក្នុងភូមិថ្លុកត្របែក ឃុំភ្នំបាត ស្រុកពញាឮ ។ ចំណែកឯជនរងគ្រោះឈ្មោះ ប៉ុន ពេជ្រ ភេទប្រុស អាយុ១៨ឆ្នាំ មានទីលំនៅក្នុងភូមិ-ឃុំកើតហេតុ ។ ជនរងគ្រោះត្រូវជនដៃដល់ជាឪពុកមាកាប់ត្រូវចំនួន៣កាំបិតផ្គាក់ បណ្តាលឲ្យស្លាប់បាត់បង់ជីវិតភ្លាមៗនៅនិងកន្លែងកើតហេតុ ។
លោកវសេនីយ៍ទោ ដួង តេង បានបន្តថា នៅមុនពេលកើតហេតុជនដៃដល់បាននៅអង្គុយហូបបាយលើគ្រែក្រោមផ្ទះរបស់ខ្លួន គ្រានោះជនរងគ្រោះជាក្មួយប្រុសបានដើរស្រែកច្រៀងនៅក្បែរជនដៃដល់ ។ ពេលនោះជនដៃដល់បានស្រែកសួរទៅជនរងគ្រោះថា “ហ្អែងស្រែកច្រៀងនិងមានន័យថាម៉េច ហើយហ្អែងចង់ម៉េច ?” ។ ឮដូច្នេះជនរងគ្រោះបានឆ្លើយតបវិញថា “អត់ចង់ម៉េចទេ ពូឯងហូបបាយដឹងតែហូបទៅ ខ្ញុំច្រៀងតែខ្ញុំទេ ” ។ បន្ទាប់មកជនដៃដល់ក៏បានស្ទុះចូលទៅវាយជនរងគ្រោះ៣ទៅ៤ដៃ បណ្តាលឲ្យដេកដួលសន្លប់ទៅលើដី រួចក៏ឡើងទៅហូបបាយបន្តនៅលើក្រែក្បែរជនរងគ្រោះដេកសន្លប់ ។
លោកអធិការបន្តទៀតថា មួយសន្ទុះក្រោយមកជនរងគ្រោះក៏បានក្រោកពីលើដីសួរទៅជនសង្ស័យជាឪពុកមាថា “ខ្ញុំធ្វើអីខុសបានជាពូឯងវាយខ្ញុំ” ។ ពេលនោះជនសង្ស័យមិនបាននិយាយអ្វីទេ ពោលគឺបានស្ទុះចូលទៅរកវាយជនរងគ្រោះបន្តទៀត ខណៈនោះជនរងគ្រោះបានរត់ទៅឲ្យជីតាឈ្មោះប៉ាត់ ប៉ុន ជួយ គ្រាដែលជីតាកំពុងបិតឬស្សីធ្វើឈ្នាងលក់ ។ ក្រោយមកជនដៃដល់បានឆក់យកកាំបិតផ្គាក់នៅក្បែរនោះកាប់ប្រហារ ទៅលើជនរងគ្រោះចំនួន៣កាំបិតត្រូវចំដៃនិងខ្នង រងរបួសយ៉ាងធ្ងន់ធ្ងររហូតស្លាប់បាត់បង់ជីវិតនៅនិងកន្លែងកើតហេតុតែម្តង ។
លោក ដួង តេង បានបញ្ជាក់ថា ក្រោយពីមានហេតុការណ៍កើតឡើងជនដៃដល់ត្រូវបានសមត្ថកិច្ចនគរបាលប៉ុស្តិ៍រដ្ឋបាលភ្នំបាតឃាត់ខ្លួន បញ្ជូនទៅកាន់អធិការដ្ឋាននគរបាលស្រុកពញាឮ ដើម្បីកសាងសំណុំរឿងបញ្ជូនបន្តទៅកាន់ការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តកណ្តាលនៅព្រឹកថ្ងៃទី០២ ខែវិច្ឆិកា ឆ្នាំ២០១៥ ៕
ដោយ៖ ស្អាងជ័យ
