ប្រភពព័ត៌មានប៊ីប៊ីស៊ីបានផ្សព្វផ្សាយកាលពីថ្ងៃទី១ ខែវិច្ឆិកា ឆ្នាំ២០១៥ថា ក្រុមឧទ្ទាមអិស្លាមជ្រុលនិយម Al-Shabab បានវាយប្រហារទៅលើសណ្ឋាគារមួយស្ថិតនៅក្នុងរដ្ឋធានី Mogadishu របស់ស៊ូម៉ាលី បណ្តាលឲ្យស្លាប់មនុស្សយ៉ាងតិច១៥នាក់ ។
ប៉ូលិសក្នុងតំបន់បានបញ្ជាក់ថា ក្រុមខ្មាន់កាំភ្លើងបានប្រើប្រាស់រថយន្ត២គ្រឿងដើម្បីបំផ្ទុះគ្រាប់បែកនៅផ្លូវចូលទៅកាន់សណ្ឋាគារ Sahafi នៅមុនពេលវាយប្រហារចូលទៅកាន់ទីនោះ ។ ជនរងគ្រោះរួមមានសមាជិករដ្ឋសភា និងមេទ័ពដែលដឹកនាំការវាយប្រហារកាលពីឆ្នាំ២០១១បណ្តេញក្រុម al-Shabab ចេញពីតំបន់ Mogadishu នោះផងដែរ ។
កងទ័ពសហភាពអាហ្វ្រិក និងកងកម្លាំងរដ្ឋាភិបាលបានប្រកាសថា ពួកគេបានគ្រប់គ្រងស្ថានការទាំងស្រុងក្រោយការប្រយុទ្ធជាមួយក្រុមខ្មាន់កាំភ្លើង ។ សណ្ឋាគារដែលរងការបាញ់ប្រហារនេះមានភាពល្បីល្បាញ់ ហើយសមាជិកសភាប្រទេសនេះតែងតែទៅកាន់ទីនោះ ។
នៅលើគេហទំព័ររបស់ក្រុមសមាសភាព al-Shabab បានសរសេរថា ពួកគេជាអ្នកទទួលខុសត្រូវការវាយប្រហារសណ្ឋាគារខាងលើនេះ ដោយអះអាងថា ជាការវាយប្រហារធ្វើឡើងនៅវេលាព្រឹកព្រលឹមដើម្បីបញ្ចៀសគ្រោះថ្នាក់ដល់អាយុជីវិតចំពោះជនស៊ីវិល ។
ម្ចាស់សណ្ឋាគារ និងមេទ័ពមួយរូបឈ្មោះ Abdikarim Dhagabadan ដែលជាអ្នកដឹកនាំប្រតិបត្តិការប្រឆាំងក្រុម al-Shabab កាលពីឆ្នាំ២០១១នោះស្ថិតនៅក្នុងចំណោមជនរងគ្រោះដែលបាត់បង់ជីវិតផងដែរ ។
ការវាយប្រហារទៅលើសណ្ឋាគារខាងលើនេះកើតមានមួយថ្ងៃ បន្ទាប់ពីការវាយប្រហារយ៉ាងបង្ហូរឈាមរវាងក្រុមសកម្មប្រយុទ្ធជីហាដ នឹងកងកម្លាំងសហភាពអាហ្វ្រិក(AU) ស្ថិតនៅក្នុងតំបន់ Bakool ជិតព្រំដែនប្រទេស Ethiopia ។
កងទ័ពសហភាពអាហ្វ្រិកបានធ្វើប្រតិបត្តិការជួយដល់កងទ័ពរដ្ឋាភិបាលស៊ូម៉ាលីដើម្បីកម្ចាត់ក្រុមឧទ្ទាម al-Shabab ។ សន្តិសុខនៅក្នុងប្រទេសនេះបានល្អប្រសើរ ។ ប៉ុន្តែក្រុមខ្មាន់កាំភ្លើងដែលមានទំនាក់ទំនងជាមួយក្រុមភេរវកម្មអាល់កៃដា តែងតែបើកការវាយឆ្មក់ជាទៀតទាត់ទៅលើទីតាំង Mogadishu នេះ ។
ក្រុមឧទ្ទាមក៏វាយប្រហារគោលដៅទៅលើប្រទេសជិតខាងស៊ូម៉ាលីនោះផងដែរបណ្តាលឲ្យមនុស្សយ៉ាងតិច១៥០នាក់បាត់បង់ជីវិត គឺការវាយប្រហារទៅលើសាកលវិទ្យាល័យ Garissa របស់កេនយ៉ាក្នុងខែមេសា ឆ្នាំ២០១៥ ៕
ប្រែសម្រួល៖ ថាច់ យ៉ាត
