ភ្នំពេញ៖ លោកប៉ា សុជាតិវង្ស អភិបាលរាជធានីភ្នំពេញ បានបញ្ជាក់ថា៖ ឆ្នាំសិក្សា២០១៤-០១៥ សិស្សពូកែ ជាប់ចំណាត់ថ្នាក់លេខ១ ដល់លេខ៣ ពីថ្នាក់៩ ដល់ថ្នាក់ទី១២ តាមគ្រឹះស្ថានមធ្យមសិក្សា សាធារណៈ មានចំនួន ៣.៣៨២នាក់(យុវតី ២.២២១ នាក់)។ ជាលទ្ធផលដែលសិស្សទទួលបាន នាពេលនេះ គឺសិស្សានុសិស្សខ្លួនឯងផ្ទាល់ ព្យាយាមរៀនសូត្រ ក្នុងនាមជាកូនល្អ សិស្សល្អ លោកគ្រូ អ្នកគ្រូ យកចិត្តទុកដាក់ខ្ពស់ក្នុងការបង្រៀននេះជាមោនភាពរបស់ថ្នាក់ដឹកនាំរាជធានីភ្នំពេញ ។
លោកប៉ា សុជាតិវង្ស បានបញ្ជាក់បែបនេះក្នុងខណៈដែលលោកចូលរួមពិធីចែករង្វាន់ ដល់សិស្សពូកែ រាជធានីភ្នំពេញសម្រាប់ ឆ្នាំសិក្សា ២០១៤-២០១៥ នៅវិទ្យាល័យជាស៊ីម បឹងកេងកង កាលពីព្រឹកថ្ងៃទី០២ ខែវិច្ឆិកា ឆ្នាំ២០១៥ បានឲ្យដឹងថា៖ បេក្ខជនប្រឡង សញ្ញាបត្រមធ្យមសិក្សា ទុតិយភូមិ សម័យប្រឡង ២៤ ខែសីហា ២០១៥ មានចំនួន ៩៤៩៩ នាក់ (ស្រី ៤៨១៣ នាក់) ដោយទទួលបាននិទ្ទេស A ចំនួន៨៤នាក់ (ស្រី២១នាក់) និងនិទ្ទេសB ចំនួន៣១៣នាក់ (ស្រី១៦៩នាក់) ក្នុងចំណោមទូទាំងប្រទេស១០៨០០នាក់ ។
លោកបន្ដថា៖ ការអភិវឌ្ឍរាជធានីភ្នំពេញ លើគ្រប់ផ្នែកនេះ បានធ្វើឲ្យគ្រប់គ្រឹះស្ថានសិក្សា មានការគ្រប់គ្រងល្អ បង្រៀនល្អ រៀនល្អ និងមានការគាំទ្រ ពីប្រជាពលរដ្ឋ ទូទាំងរាជធានីភ្នំពេញ។ជាលទ្ធផលដែលសិស្សទទួលបាន នាពេលនេះ គឺសិស្សានុសិស្សខ្លួនឯងផ្ទាល់ ព្យាយាមរៀនសូត្រ ក្នុងនាមជាកូនល្អ សិស្សល្អ មិត្តល្អ ដោយមិនយកពេលវេលា ដ៏មានតម្លៃ ទៅដើរលេងឥតប្រយោជន៍ និងលោកគ្រូ អ្នកគ្រូ បានយកចិត្តទុកដាក់ខ្ពស់ ក្នុងការបង្រៀន ក្រោមការគ្រប់គ្រងល្អ របស់គណៈនាយកសាសានីមួយៗផងដែរ។ក្នុងឱកាសនេះលោកបានផ្ដល់អំណោយលើកទឹកចិត្ដ ដល់សិស្សជាប់ចំណាត់ថ្នាក់លេខ១ ចំនួន៨៤នាក់ម្នាក់ៗ ទទួលបានថវិកា១០ម៉ឺនរៀល,កាតាប១,សៀវភៅ១០ក្បាល់,អ្នកជាប់ចំណាត់ ថ្នាក់លេខ២ ដល់លេខ៣ចំនួន៣១៣នាក់ម្នាក់ៗទទួលបានថវិកា៥ម៉ឺនរៀល,សៀវភៅ១០ក្បាលនិងកាតាប១ផងដែរ។ ដោយឡែកសិស្សជាប់ចំណាត់ថ្នាក់លេខ៣ដល់លេខ១០ចំនួន២៩៨៥នាក់,ទទួលបានថវិកា២ម៉ឺនរៀល,សៀវភៅ៥ក្បាល,ប៊ិច២ដើមផងដែរ ។
តាមរបាយការណ៍របស់លោកស្រី ហ៊ួត យ៉ារី ប្រធានមន្ទីរអប់រំយុវជន និងកីឡារាជធានីភ្នំពេញ បានបញ្ជាក់ថា៖ ការប្រឡងសិស្សពូកែ លើឆាកអន្តរជាតិ នៅខែឧសភា ឆ្នាំ២០១៥ ក្រសួងអប់រំ យុវជន និងកីឡា បានបញ្ជូនបេក្ខជន ទូទាំងប្រទេសចំនួន ៥នាក់ ទៅចូលរួមប្រឡង Asian Physics Olimpaid លើកទី១៦ ផ្នែករូបវិទ្យា ដែលប្រព្រឹត្តទៅ នៅទីក្នុង Hangzhou ប្រទេសចិន ។ ជាលទ្ធផលយុវសិស្ស ឈ្មោះ ហេង សូវីរ៉ូ ជាសិស្សថ្នាក់ទី១២ នៃវិទ្យាល័យបាក់ទូក រាជធានីភ្នំពេញ ទទួលបានមេដាយសំរឹទ្ធិ ។
នៅខែកក្កដា ឆ្នាំ២០១៥ ក្រសួងអប់រំ យុវជន និងកីឡា បានបញ្ជូនបេក្ខជន ទូទាំងប្រទេសចំនួន ៥នាក់ ទៅចូលរួមប្រឡង អូឡាំព្យាដ អន្តរជាតិ លើកទី៤៦ ផ្នែករូបវិទ្យា ដែលប្រព្រឹត្តទៅ នៅទីក្រុងម៉ុមបៃ ប្រទេសឥណ្ឌា។ ជាលទ្ធផល យុវសិស្ស ឈ្មោះ ហេង សូវីរ៉ូ ជាសិស្សថ្នាក់ទី១២ នៃវិទ្យាល័យបាក់ទូក រាជធានីភ្នំពេញ ទទួលបានមេដាយសំរឹទ្ធិ។ នៅខែកក្កដា ឆ្នាំ២០១៥ ក្រសួងអប់រំ យុវជន និងកីឡា បានបញ្ជូនសិស្ស អនុវិទ្យាល័យចតុមុខ ចំនួន៦នាក់ ទៅចូលរួមប្រឡង ផ្នែកវិទ្យាសាស្ត្រ នៃកម្មវិធី Science Leadership Development Programe ,GNHD ដែលប្រព្រឹត្តទៅ នៅទីក្រុងជីណាន ប្រទេសចិន ជាលទ្ធផល ទទួលបានមេដាយមាស២មេដាយប្រាក់២និងមេដាយសំរឹទ្ធិ២ ។
លោកស្រីបន្តថា មន្ទីរអប់រំ យុវជន និងកីឡា បានធ្វើការប្រឡងជ្រើសរើស សិស្សពូកែផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី៩ និងថ្នាក់ទី១២ សម្រាប់ឆ្នាំសិក្សា ២០១៤-២០១៥ ដែលមកពីគ្រប់គ្រឹះស្ថាន មធ្យមសិក្សាសាធារណៈ និងឯកជនទូទាំងរាជធានី មានចំនួន៥៤នាក់ យុវតី២១នាក់ និងបានបញ្ជូនសិស្សពូកែទាំងនេះ ទៅចូលរួមប្រឡងជ្រើសរើស សិស្សពូកែទូទាំងប្រទេស នាថ្ងៃទី២៤ ខែមេសា ឆ្នាំ២០១៥ នៅមណ្ឌលអនុវិទ្យាល័យ មិត្តភាព កម្ពុជា ជប៉ុន ដែលបេក្ខជន មកពីគ្រប់ រាជធានី ខេត្ត ចំនួន៤៨០នាក់។ ជាលទ្ធផល រាជធានីភ្នំពេញ ដណ្តើមជ័យលាភី បាន១៣នាក់ (យុវតី៥នាក់) មេដាយមាស២ មេដាយប្រាក់២ មេដាយសំរឹទ្ធ១ ទទួលបានវិញ្ញាបនបត្រ សិស្សពូកែទូទាំងប្រទេស ៨ ។
របាយការណ៍ បានបន្តថា៖ នៅឆ្នាំសិក្សា ២០១៤-០១៥ កន្លងមកនេះ សិស្សពូកែ ជាប់ចំណាត់ថ្នាក់លេខ១ ដល់លេខ៣ ពីថ្នាក់៩ ដល់ថ្នាក់ទី១២ តាមគ្រឹះស្ថានមធ្យមសិក្សា សាធារណៈ មានចំនួន៣.៣៨២នាក់ (យុវតី២.២២១នាក់)។ ការអភិវឌ្ឍ រាជធានីភ្នំពេញ លើគ្រប់ផ្នែកនេះ បានធ្វើឲ្យគ្រប់គ្រឹះស្ថានសិក្សា មានការគ្រប់គ្រងល្អ បង្រៀនល្អ រៀនល្អ និងមានការគាំទ្រ ពីប្រជាពលរដ្ឋ ទូទាំងរាជធានីភ្នំពេញ។ជាលទ្ធផលដែលសិស្សទទួលបាន នាពេលនេះ គឺសិស្សានុសិស្សខ្លួនឯងផ្ទាល់ ព្យាយាមរៀនសូត្រ ក្នុងនាមជាកូនល្អ សិស្សល្អ មិត្តល្អ ដោយមិនយកពេលវេលា ដ៏មានតម្លៃ ទៅដើរលេងឥតប្រយោជន៍ និងលោកគ្រូ អ្នកគ្រូ យកចិត្តទុកដាក់ខ្ពស់ ក្នុងការបង្រៀន ក្រោមការគ្រប់គ្រងល្អ របស់គណៈនាយកសាសា។ មាតាបិតា អាណាព្យាបាល តាមដានការសិក្សា និងអប់រំទូន្មានកូនជាប្រចាំ ការផ្តល់សុវត្ថិភាព ទាំងនេះក៏ដោយសារមានអគារសិក្សា សង្ហារឹម សិក្សា បន្ដជួយគាំទ្រផ្ដល់ការលើកទឹកចិត្ដ ពីសម្តេចអគ្គមហាសេនាបតីតេជោហ៊ុន សែន នាយករដ្ឋផងដែរ ៕
ដោយ៖ សំរិត
