ខេត្តសៀមរាប៖ ក្រុមគ្រូពេទ្យធ្មេញស្ម័គ្រចិត្តមកពីប្រទេសចំនួន៤ មកព្យាបាលមាត់ធ្មេញជូនពលរដ្ឋឥតគិតថ្លៃ រយៈពេល៣ថ្ងៃ ចាប់ពីថ្ងៃទី០១រហូតដល់ថ្ងៃទី០៣ ខែវិច្ឆិកា ឆ្នាំ២០១៥ នៅមន្ទីរពេទ្យយោធភូមិភាគទី៤ ខេត្តសៀមរាប ។
ក្នុងប្រតិបត្តិការចុះព្យាបលមាត់ធ្មេញដោយឥតគិតថ្លៃនេះ ដឹកនាំដោយលោកជំទាវឧត្តមសេនីយ៍ឯក តុប សារ៉ន អគ្គនាយករង អគ្គនាយកដ្ឋានភស្តុភា ហិរញ្ញវត្ថុ នៃក្រសួង ការពារជាតិ អមដំណើរដោយលោកឧត្តមសេនីយ៍ឯក ទេព សំអាន អគ្គនាយករង អគ្គនាយកដ្ឋាន ភស្តុភា ហិរញ្ញវត្ថុ និង ជាសមាជិកក្រុមការងារថ្នាក់ជាតិចុះជួយខេត្តសៀមរាប ។
តាមការបញ្ជាក់របស់លោក លី ហ៊ុយ ប្រធានអង្គការមួយ ជាដៃគូរជាមួយកម្ពុជា បានឲ្យដឹងថា ក្នុងរយៈពេល ១១ឆ្នាំកន្លងមកនេះ អង្គការរបស់លោកបានរួមសហការ ជាមួយសុខាភិបាលក្រសួងការពារជាតិ ជាពិសេសលើការងារ ព្យាបាលជម្ងឺធ្មេញជូនប្រជាពលរដ្ឋ នៅតាមបណ្តាខេត្ត មានរយៈពេល៧ឆ្នាំមកហើយ ។ ក្នុងការព្យាបាលជម្ងឺធ្មេញ នេះ ដោយមានក្រុមគ្រួពេទ្យជំនាញមកពីប្រទេសអង់គ្លេស , អូស្ត្រាលី , អាល្លឺម៉ង់ និង ជប៉ុន រួមនឹងក្រុមគ្រូពេទ្យ កម្ពុជា ដោយព្យាបាលក្នុងមួយថ្ងៃបាន ២០០នាក់ ។
មានប្រសាសន៍សំណេះសំណាលនោះ លោកស្រីឧត្តមសេនីយ៍ឯក តុប សារ៉ន និង លោកឧត្តម សេនីយ៍ឯក ទេព សំអាន បានបញ្ជាក់ថា ការធ្វើអនាម័យមាត់ធ្មេញ គឺជាកត្តាចំបងដែលមនុស្សយើងគ្រប់រូប ដែលត្រូវយកចិត្តទុកដាក់ខ្ពស់ឲ្យបានជាប្រចាំថ្ងៃ ដូច្នេះសុខភាពគឺជាកត្តាដ៏សម្ខាន់បំផុត សម្រាប់មនុស្សជាតិគ្រប់រូប ក្នុងការអនុវត្តន៍របៀបរស់ នៅប្រកបដោយសុខមាភាពរបស់យើងគ្រប់គ្នា។ ដោយកត្តានេះហើយទើប ប្រមុខ រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្ត្រី និង លោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ បានជម្រុញឲ្យសុខាភិបាលក្រសួងការពារជាតិ ធ្វើកិច្ចសហការជាមួយ អង្គការដៃគូរ ដើម្បីចុះមកធ្វើការ ព្យាបាលជូនប្រជាពលរដ្ឋ នៅតាមមូលដ្ឋានដោយឥតគិតថ្លៃ ក្នុងការកាត់បន្ថយ ភាពក្រីក្ររបស់ប្រជាពលរដ្ឋ ។
លោកស្រីឧត្តមសេនីយ៍ឯក តុប សារ៉ន និង លោកឧត្តម សេនីយ៍ឯក ទេព សំអាន បានបន្តទៀតថា ដើម្បីផ្តល់សេវាសុខភាពជូន ប្រជាពលរដ្ឋ គឺ ដើម្បីធ្វើឲ្យសុខ មាលភាពយើង មានសុខភាពល្អ សម្រាប់ប្រកបកិច្ចការងារ រៀនសូត្រ ធ្វើស្រែ ចំការជាដើម ។ ម្យ៉ាងទៀត ការពិនិត្យព្យាបាលជម្ងឺជូនបងប្អូននាពេលនេះ ក្រុមគ្រូពេទ្យយើងមិនរើសអើង ឬ ប្រកាន់ន្និនាការណ៍នយោបាយណាឡើយ គឺធ្វើការព្យាបាលដោយឥតគិតថ្លៃជូនទាំងអស់ ។ ក្នុងនាមលោកជំទាវ ជាអនុប្រធានក្រុមការងារយេនឌ័រ នៃក្រសួងការពារជាតិ ក៏បានធ្វើការថ្លែងអំណរគុណ ចំពោះកិច្ចសហប្រតិបត្តិការរបស់ក្រុមការងារ អង្គការ 1 two 1 ក្រុមការងារថ្នាក់ជាតិ មេបញ្ជាការ អាជ្ញាធរមូលដ្ឋាន និង ក្រុមគ្រូពេទ្យ និង សប្បុរសជនដែលជាដៃគូរទាំងអស់បានគាំទ្រជួយដល់កុមារកំព្រា ដែលបានយកចិត្តទុកដាក់ ក្នុងការព្យាបាលអនាម័យមាត់ធ្មេញ មានសុខភាពល្អ ជូនដល់ប្រជាពលរដ្ឋក្នុងខេត្តសៀមរាបផងដែរ ។
ក្នុងឱកាសនោះដែរលោកជំទាវនិងលោកប្រតិភូ ក៏បានអញ្ជើញចុះសួរសុខទុក្ខពលទាហានមានជម្ងឺកំពុងសម្រាក់ព្យាបាលក្នុងមន្ទីរពេទ្យ ដោយនាំយកអំណោយរបស់ក្រសួងការពារជាតិទៅចែកជូន ព្រមទាំងបានពាំនាំនូវការផ្តាំផ្ញើរបស់សម្តេចតេជោ ហ៊ុន សែន និងលោកឧបនាយករដ្ឋមន្ត្រី ទៀ បាញ់ សូមឲ្យបានឆាប់ជាផ្សះស្បើយ បានវិលត្រឡប់ទៅកាន់អង្គភាព និង ជួបជុំក្រុមគ្រួសារវិញ ៕
ដោយ៖ ឡាំ សុធា
