ខេត្តកំពង់ឆ្នាំង៖ យុវជនម្នាក់បានស្លាប់ភ្លាមៗនៅនឹងកន្លែងកើតហេតុ ក្រោយពីបានជិះម៉ូតូយ៉ាងលឿនទៅបុកគោយន្តកន្ត្រៃមួយគ្រឿងដែលធ្វើដំណើរស្របទិសគ្នា ។
ហេតុការណ៍នេះបានកើតឡើងកាលពីវេលាម៉ោង៧និង៣០នាទីយប់ថ្ងៃទី១ ខែវិច្ឆិកា ឆ្នាំ២០១៥ នៅលើកំណាត់ផ្លូវគ្រួសក្រហម ស្ថិតក្នុងភូមិស្វាយជ្រុំថ្មី ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង ។
សមត្ថកិច្ចនគរបាល ស្រុករលាប្អៀរ បានអោយដឹងថា ជនរងគ្រោះមានឈ្មោះ ឈៀង សីលា ភេទប្រុស អាយុ២២ឆ្នាំ មានទីលំនៅភូមិឃុំកើតហេតុខាងលើ ជិះម៉ូតូម៉ាក ស៊ុយហ្ស៊ុយគី វីវ៉ា ពណ៌ខ្មៅ ពាក់ស្លាកលេខ កណ្តាល ១B -៦១៤២ ។
សមត្ថកិច្ចបានអោយដឹងទៀតថា ក្នុងពេលកើតហេតុ ជនរងគ្រោះជិះម៉ូតូរបស់ខ្លួន បោះពួយយ៉ាងលឿន ក្នុងទិសដៅពីលិចទៅកើត លុះមកដល់ចំណុចកើតហេតុ ដោយសារតែងងិតផងនោះ ក៍ជ្រុលទៅបុកគោយន្តកន្ត្រៃពេញមួយទំហឹងតែម្តង បណ្តាលអោយជនរងគ្រោះផ្លោងប៉ើងចេញពីម៉ូតូ និងរងរបួសរយៈ ក ធ្ងន់ធ្ងរនិងហូរឈាមច្រើន បណ្តាលអោយស្លាប់ភ្លាមៗនៅកន្លែងកើតហេតុតែម្តង ។
ដោយឡែកគោយន្តកន្ត្រៃ ក្រោយពេលកើតហេតុឃើញស្ថានភាពបែបនេះបានបើករត់គេចតែម្តង ៕
ដោយ៖ ចន្ថា
