ខេត្តក្រចេះ៖ បុរសជាឃាតករស៊ីឈ្នួលម្នាក់ រួមនិងស្ត្រីជាអ្នកជួលឃាតករ ត្រូវបាននគរបាលស្រុកសំបូរ ស្រាវជ្រាវនិងចាប់ឃាត់ខ្លួនជាបន្តបន្ទាប់ ក្រោយពីជននេះបានយកថ្នាំបំពុលសត្វឆ្កែងាប់បីក្បាល រួចចូលទៅចាក់សម្លាប់ស្ត្រីរងគ្រោះ បណ្តាលឱ្យស្លាប់ក្នុងថ្លុកឈាម ខណៈដែលស្ត្រីរងគ្រោះកំពុងដែកលង់លក់នៅក្រោមផ្ទះ។
ក្រោយពីចាប់ខាត់ខ្លួនរួចមកនៅរសៀលថ្ងៃទី២ខែវិច្ឆិកា នគរបាលបាននាំខ្លួនជនដៃដល់ជាឃាតកររូបនេះ ទៅបង្ហាញកន្លេងដែលជននេះបានយកវត្ថុតាង ទៅកប់នៅចំការក្រោយផ្ទះរបស់គេ និងបាននាំជននេះមកធ្វើសកម្មភាពសារដើមឡើងវិញពេលដែលចននេះចាក់សម្លាប់ស្ត្រីរងគ្រោះ។
ហេតុការណ៍នេះបានកើតឡើង កាលពីវេលាម៉ោង២និង៤០នាទីទៀបភ្លឺ ឈានចូលថ្ងៃទី២ ខែវិច្ឆិកា នៅក្នុងក្រោមផ្ទះស្ត្រីរងគ្រោះ ក្នុងភូមិអូរពោធ៍ ឃុំក្បាលដំរី ស្រុកសំបូរ ខេត្តក្រចេះ។
អធិការរងស្រុកសំបូរ លោក ឈិន សំបូរ ទទួលបន្ទុកបទល្មើសព្រហ្មទណ្ឌបាននិយាយថា ក្រោយពីកើតហេតុនិងមានការភ្ញាក់ផ្អើល នគរបាលជំនាញបានចុះទៅពិនិត្យដល់កន្លែងកើតហេតុ លោកថាស្ត្រីរងគ្រោះត្រូវជនដៃដល់ យកដែកជើងជ្រូកចាក់សម្លាប់ចំដើមទ្រូង បណ្តាលឱ្យស្លាប់ៗ ខណៈស្ត្រីរងគ្រោះកំពុងដែកលង់លក់នៅក្រោមផ្ទះ។
លោកអធិការរងបានបន្តថា ស្ត្រីជាជនរងគ្រោះ ឈ្មោះ ហ៊ិន ភាព អាយុ៦១ឆ្នាំ ជាស្ត្រីមេម៉ាយ និងមានកូនស្រីម្នាក់នៅក្នុងបន្ទុក។ ចំណែកជនដៃដល់ឈ្មោះ ឡឹក ចាន់វាសនា ហៅក្លូ អាយុ២៨ឆ្នាំ ទាំងជនរងគ្រោះនិងជនដៃដល់រស់នៅភូមិកើតហេតុខាងលើ។
យោងតាមចម្លើយសារភាព របស់ជនដៃដល់ឈ្មោះ ឡឹក ចាន់វាសនា ហៅក្លូ បានសារភាពប្រាប់សមត្ថកិច្ចថា រូបគេពិតជាបានចាក់សម្លាប់ស្ត្រីរងគ្រោះពិតប្រាកដមែន ។ ជនដៃដល់បានបន្តថា ការដែលរូបគេចាក់សម្លាប់ស្ត្រិរងគ្រោះនេះ គឺមានស្ត្រីម្នាក់ឈ្មោះ ស៊ុន វ៉ាន់នី អាយុ៤៧ឆ្នាំ រស់នៅភូមិចង្ហប ឃុំក្បាលដំរី ស្រុកសំបូរ ជាអ្នកជួលរូបគេ ក្នុងតម្លៃ២លានរៀល ឱ្យសម្លាប់ស្ត្រីរងគ្រោះនេះ។
លោកអធិការបានបញ្ជាក់ថា មូលហេតុដែលស្ត្រីឈ្មោះ ស៊ុន វ៉ាន់នី បានជួលឃាតករឱ្យសម្លាប់ស្ត្រីរងគ្រោះ គឺមកពីស្ត្រីម្នាក់នេះ បានជំពាក់លុយស្ត្រីរងគ្រោះជិត១ពាន់ដុល្លារ ។ លោកថា ឃាតករស៊ីឈ្មួលម្នាក់នេះ បានទៅប៉ុនប៉ងចាក់សម្លាប់ស្ត្រីរងគ្រោះ២ទៅ៣ដងមកហើយ តែមិនបានសម្រេច ដោយសារបមពុលសត្វឆ្កែពុំបាន លុះដល់យប់កើតហេតុ ពេកដែលស្ត្រីរងគ្រោះកំពុងដេកលង់លក់លើប៉ៅអ៊ីក្រោមផ្ទះ ជនដៃដល់ក៏ដាក់ថ្នាំបំពុលសត្វឆ្កែងាប់បីក្បាល រួចចូលទៅធ្វើសកម្មភាពចាក់សម្លាប់ស្ត្រីរងគ្រោះតែម្តង ៕
ដោយ៖ កោះទ្រុង
