ភ្នំពេញ៖ ជនសង្ស័យម្នាក់ ត្រូវបានម្ចាស់ម៉ូតូចាប់ខ្លួនប្រគល់អោយនគរបាលប៉ុស្តិ៍ច្បារអំពៅទី២ ពាក់ព័ន្ធករណីខ្ចីម៉ូតូ ទៅទិញសាច់ក្លែមតែបែជាយកទៅលក់ហើយគេចខ្លួនជាង១ខែ ទើបម្ចាស់ម៉ូតូរកឃើញ ហើយចាប់ខ្លួនប្រគល់អោយសមត្ថកិច្ចចាត់ការតាមផ្លូវច្បាប់ ដោយឡែកម៉ូតូត្រូវជន សង្ស័យលក់យកលុយស៊ីចាយអស់ហើយ ។
ករណីចាប់ខ្លួនមុខសញ្ញា យកម៉ូតូគេទៅលក់នេះបានកើតឡើងនៅវេលាម៉ោង១០និង៣០នាទី ព្រឹកថ្ងៃទី២ ខែវិច្ឆិកា ឆ្នាំ២០១៥ នៅចំណុចផ្ទះជួល ភូមិដើមស្លែង សង្កាត់ច្បារ អំពៅទី២ ខណ្ឌច្បារអំពៅ ។
ជនរងគ្រោះជាម្ចាស់ម៉ូតូ មានឈ្មោះជាន់ សីម៉ា ភេទ ប្រុស អាយុ២៦ឆ្នាំ ជា មន្ត្រីកងរាជអាវុធហត្ថលើផ្ទៃប្រទេស មានទីលំនៅផ្ទះជួល ភូមិទ្រា សង្កាត់ស្ទឹងមានជ័យ ខណ្ឌមានជ័យ មករកស៊ីនៅ ច្បារអំពៅ ។
ជនសង្ស័យមានឈ្មោះឡាំ យ៉ាំងឌាំង ភេទប្រុស អាយុ២៤ឆ្នាំ មុខរបរជាកម្មករ សំណង់ មានទីលំនៅផ្ទះជួល ភូមិដើមស្លែង សង្កាត់ច្បារ អំពៅទី២ ខណ្ឌច្បារអំពៅ ។
លោកទេព បូរ៉ា នាយប៉ុស្តិ៍ នគរបាលច្បារអំពៅទី២ បាន អោយដឹងថា ជនរងគ្រោះនិង ជនសង្ស័យជាមនុស្សស្គាល់រាប់អានគ្នាព្រោះជួលផ្ទះរកស៊ីនៅច្បារអំពៅក្បែរគ្នា ស្រាប់តែនៅថ្ងៃទី២៧ ខែកញ្ញា ឆ្នាំ២០១៥ ជនសង្ស័យបាន ខ្ចីម៉ូតូរបស់ជនរងគ្រោះ ម៉ាក ស្កូពី ពាក់ស្លាកលេខ ភ្នំពេញ 1CA-7301ដោយប្រាប់ថាទៅ យកលុយគេជំពាក់ហើយទិញសាច់ក្លែមត្រឡប់មកវិញ ។ បន្ទាប់ពីបានម៉ូតូដល់ដៃហើយជនសង្ស័យជិះយកទៅបាត់គេចខ្លួនរហូត ដោយឡែកជនរង គ្រោះដែលជាម្ចាស់ម៉ូតូបានមកដាក់ពាក្យបណ្តឹងនៅនគរបាលប៉ុស្តិ៍រួចរាល់ផងដែរ ។ លុះ ដល់ព្រឹកថ្ងៃទី២ ខែវិច្ឆិការ ឆ្នាំ២០១៥ជនរងគ្រោះជាម្ចាស់ ម៉ូតូបានឃើញជនសង្ស័យត្រឡប់មកវិញ ក៍ចាប់ខ្លួនប្រគល់ អោយសមត្ថកិច្ចតែម្តង ។
បច្ចុប្បន្នជនសង្ស័យត្រូវ បញ្ជូនទៅកាន់អធិការដ្ឋាននគរបាលខណ្ឌច្បារអំពៅដើម្បីចាត់ការតាមច្បាប់ ៕
ដោយ៖ សណ្តោស
