ខេត្តតាកែវ៖ កាលពីថ្ងៃទី ០១ ខែវិច្ឆិកា ឆ្នាំ២០១៥កន្លងទៅនេះ លោក កែវ រ៉េមី រដ្ឋលេខាធិការទីស្តីការគណៈរដ្ឋមន្ត្រី និងជាអនុប្រធានអង្គភាពព័ត៌មាន និងប្រតិកម្មរហ័ស តំណាងដ៍ខ្ពង់ខ្ពស់របស់ លោកបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងលោក ស្វាយ សុវណ្ណរិទ្ធ អនុប្រធាន ក្រុមការងារ ថ្នាក់ជាតិចុះមូលដ្ឋានឃុំកុមាររាជា បានអញ្ជើញជាអធិបតីក្នុងពិធីអបអរសាទរពិធីបើកបវេសនកាលឆ្នាំសិក្សាថ្មី ២០១៥-២០១៦ នៅសាលាបឋមសិក្សា និងអនុវិទ្យាល័យក្រាំងពង្រ ស្ថិតនៅក្នុង ឃុំកុមារាជា ស្រុកបាទី ខេត្តតាកែវ។
ជាកិច្ចចាប់ផ្តើម លោក ញិប នៅ នាយកអនុវិទ្យាល័យក្រាំងពង្រ ធ្វើរបាយការណ៍សង្ខេបស្តីពីស្ថានភាពទូទៅ របស់សាលាបឋមសិក្សា និងអនុវិទ្យាល័យក្រាំងពង្រ ដោយលោកបានរំលឹកថាក្រោយថ្ងៃរំដោះ ៧ មករា ១៩៧៩ សាលាសល់អគារសិក្សា ១ ខ្នង មាន៣បន្ទប់ ដែលមានសភាពចាស់ទ្រុឌទ្រោម ហើយបច្ចុប្បន្ន កំពុង ត្រូវការ អគារសិក្សាបន្ថែម ដើម្បីបំពេញសេចក្តីត្រូវការរបស់សិស្សានុសិស្ស ជិត៨០០នាក់។
បន្ទាប់មក លោក ស្វាយ សុវណ្ណរិទ្ធ អនុប្រធានក្រុមការងារថ្នាក់ជាតិចុះជួយឃុំកុមាររាជា ក៏បានឡើងអានសារលិខិតសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាថ្លែងក្នុងឱកាសបើក បវេសនកាលឆ្នាំសិក្សា ២០១៥-២០១៦។
ក្នុងឱកាសនោះ លោក កែវ រ៉េមី ក៏បានអញ្ជើញមានមតិសំណេះសំណាលនៅក្នុងអង្គពិធី ដោយបានរំលឹកថា ប្រទេសកម្ពុជាសព្វថ្ងៃ មានការរីកចម្រើននិងអភិវឌ្ឍជាលំដាប់ ទាំងអស់នេះក៏ដោយសារ ការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន ដែលបានធ្វើឱ្យប្រទេសយើងមានសន្តិភាព និងស្ថេរភាពនយោបាយ។ លោក កែវ រ៉េមី ក៏បានលើកឡើងថា រាជរដ្ឋាភិបាល បាននិងកំពុងយកចិត្តទុកដាក់យ៉ាងខ្លាំងទៅលើវិស័យអប់រំ ជាក់ស្តែងដោយសារតែកំណែ ទម្រង់ប្រព័ន្ធអប់រំ ឆ្នាំនេះសិស្សថ្នាក់ទី១២ ដែលប្រលងជាប់សញ្ញាប័ត្រ មធ្យមសិក្សាទុតិយភូមិ ទទួលបាននិទ្ទេសAកើនដល់108នាក់។ ជាមយយកគ្នានេះដែលោក ក៏បានអំពាវនាវដល់អាជ្ញាធរមូលដ្ឋានឱ្យគិតគូរទៅលើភូមិឃុំមានសុវត្ថិភាព ជាពិសេសគឺបញ្ហាគ្រឿងញៀន ព្រោះ វាបំផ្លាញដល់អាយុជីវិតប្រជាពលរដ្ឋទូទៅជាពិសេសយុវជន។
ជាការឆ្លើយតបទៅនឹងសំណូមពររបស់ លោកគ្រូ អ្នកគ្រូ និងប្រជាពលរដ្ឋជាមាតាបិតាសិស្ស លោកបានប្រកាសថា ក្រោមការខិតខំស្វះស្វែងទំនាក់ទំនង របស់ក្រុមការងារថ្នាក់ជាតិចុះមូលដ្ឋានឃុំកុមារាជា តាមរយៈក្រសួងអប់រំ យុវជន និងកីឡា និងក្រសួងសុខាភិបាលម អគារអនុវិទ្យាល័យ មួយខ្នងមាន១២បន្ទប់ និងទីចាត់ការមួយខ្នង និងមណ្ឌលសុខភាពនឹងចាប់ផ្តើមសាងសង់នៅឆ្នាំ២០១៦ខាងមុខ។ លើសពីនេះស្ថិតក្រោមការជួយជ្រោមជ្រែងរបស់ក្រុមការងារថ្នាក់ជាតិចុះមូលដ្ឋានយើងបានដាក់ឲ្យដមណើរការ សមាគម និងមូលនិធិគ្រូបង្រៀនឃុំកុមារាជា ដើម្បីជួយសម្រួលដល់ជីវភាពលោកគ្រូ អ្នកគ្រូ។
ជាចុងបញ្ចប់នៃមតិសំណេះសំណាល លោក កែវ រ៉េមី ក៏បាន ថ្លែងអំណរគុណ និងជូនពរដល់លោកនាយក លោកគ្រូ អ្នកគ្រូ មាតាបិតា សិស្សានុសិស្សឱ្យទទួលបានសុភមង្គល និងសេចក្តីថ្លៃថ្នូរ ហើយលោកក៏បានអញ្ជើញផ្តល់កិត្តិយសចែករង្វាន់ដល់សិស្សពូកែ និងផ្តល់នូវសំភារៈសិក្សាដូចជាសៀវភៅ២ក្បាល និងប៉ិច១ដើមជូនដល់សិស្សានុសិស្ស ដែលមកចូលរួម ដោយឡែកសម្រាប់លោកគ្រូ អ្នកគ្រូ២៥នាក់ទទួលបានអំណោយជាថវិកាក្នុងម្នាក់ៗ ៥ម៉ឺនរៀល ៕
