ភ្នំពេញ៖ នគរបាលប៉ុស្តិ៍វត្តភ្នំ ឃាត់ខ្លួនជនសង្ស័យម្នាក់ ក្នុងចំណោមបក្ខពួក២នាក់បាននាំគ្នាទៅផឹកស៊ីរួចប្រពន្ធបានប្រើល្បិចខ្ចីទូរស័ព្ទរបស់ម្ចាស់ម៉ាក Iphone6 ដើម្បីហៅបងប្អូបមកផឹកជាមួយ បែរជាឡើងជិះម៉ូតូគេចខ្លួន តែប្តីរត់មិនរួច ក៏ម្ចាស់ហាងឃាត់ខ្លួនប្រគល់ជូនសមត្ថកិច្ចតែម្តង ។
ករណីខាងលើនេះ បានកើតឡើងកាលពីវេលាម៉ោង០១និង២០នាទី រំលងអធ្រាត្រ ឈានចូលថ្ងៃទី២ ខែវិច្ឆិកា ឆ្នាំ២០១៥ នៅចំណុចហាងស្តារិចទីតាំងលេខ១០ ផ្លូវលេខ១០៥ ភូមិ៨ សង្កាត់វត្តភ្នំ ខណ្ឌដូនពេញ ។
ជនសង្ស័យឈ្មោះវ៉ន ផល្លីន ភេទប្រុស អាយុ២៨ឆ្នាំ គ្មានមានមុខរបរពិតប្រាកដស្នាក់នៅសង្កាត់ច្បារអំពៅ ខណ្ឌច្បារអំពៅ។ ចំណែកជនសង្ស័យជាប្រពន្ធដែលគេចខ្លួននោះឈ្មោះជា ស៊ីនូ អាយុ៣៤ឆ្នាំ ស្នាក់នៅជាមួយគ្នាបានយកទូរស័ព្ទរបស់ម្ចាស់ហាងម៉ាក I phone 6 ទៅបាត់ ។
តាមប្រភពពីសមត្ថកិច្ច បានឲ្យដឹងថា នៅមុនពេលកើតហេតុ គឺប្តីប្រពន្ធ២នាក់បាននាំគ្នាមកចូលផឹកស៊ីនៅហាងកើតហេតុបានមួយសន្ទុះ ប្រពន្ធបានប្រើល្បិចខ្ចីទូរស័ព្ទរបស់ថៅកែហាងដើម្បីទូរស័ព្ទទៅរកបង ឲ្យមកផឹកជាមួយ ហើយលួចចេញមកក្រៅនិយាយរួចក៏ប្រញាប់ឡើងជិះម៉ូតូគេចខ្លួនបាត់ ខណៈនោះដែរម្ចាស់ហាងក៏បានឃាត់ខ្លួនបុរសជាប្តីស្ត្រីសង្ស័យនាំមកប្រគល់ជូនសមត្ថកិច្ចដើម្បីចាត់ការតាមនីតិវិធី ៕
ដោយ៖ ស ដារ៉ា
