ខេត្តកណ្តាល៖ ជនអន្តោប្រវេសន៍ខុសច្បាប់ចំនួន៨នាក់លួចចូលមកស្នាក់នៅក្នុងភូមិសាស្ត្រស្រុកស្អាង ដើម្បីស៊ីឈ្នួលបេះផ្លែស្វាយឲ្យក្រុមឈ្មួញជនជាតិវៀតណាមដូចគ្នា ត្រូវបានសមត្ថកិច្ចនគរបាលនគរបាលស្រុកស្អាង សហការជាមួយនគរបាលប៉ុស្តិ៍រដ្ឋបាលស្វាយប្រទាលឃាត់ខ្លួន ដើម្បីសាកសួរ និងបញ្ជូនខ្លួនទៅកាន់ប្រទេសកំណើតវិញតាមចក្រទ្វារទ្វេភាគីជ្រៃធំ-ខ្នាតាំងយូរ នៅវេលារសៀលថ្ងៃទី៣ ខែវិច្ឆិកា ឆ្នាំ២០១៥ ។
ប្រតិបត្តិការឃាត់ខ្លួនជនអន្តោប្រវេសន៍ខុសច្បាប់ខាងលើនេះធ្វើឡើង នៅវេលាម៉ោង៨ និង៣០នាទីព្រឹក ថ្ងៃទី០៣ ខែវិច្ឆិកា ឆ្នាំ២០១៥ នៅលើកំណាត់ផ្លូវជាតិលេខ១១០ ស្ថិតក្នុងភូមិបារ៉ែនលើ ឃុំស្វាយប្រទាល ស្រុកស្អាង គ្រាដែលជនអន្តោប្រវែសន៍ទាំងអស់នេះជិះរថយន្តទួរីសមួយគ្រឿងម៉ាកសាំយ៉ុង ពណ៌ស ពាក់ស្លាកលេខភ្នំពេញ2C-5313 ក្នុងគោលបំណងឆ្ពោះទៅបេះផ្លែស្វាយនៅឯចម្ការមួយក្នុងឃុំស្វាយប្រទាលស្រុកស្អាង ។
អធិការនគរបាលស្រុកស្អាងលោកវរសេនីយ៍ទោ សេង សុជាតិ បានឲ្យដឹងថា ជនអន្តោប្រវេសន៍វៀតណាមខុសច្បាប់ទាំង៨នាក់នោះ ទី១-ឈ្មោះ វៀង យ៉ាំងតាប់ ភេទប្រុស អាយុ ២៩ឆ្នាំ (មានលិខិតឆ្លងដែនចូលមកទេសចរណ៍) ,ទី២- ឈ្មោះ វៀង យ៉ាំងប៊ិន ភេទប្រុស អាយុ ៣១ឆ្នាំ,ទី៣- ឈ្មោះ វៀង យ៉ាំងវ៉ាង ភេទប្រុស អាយុ ២០ឆ្នាំ,ទី៤- ឈ្មោះ វៀង ទឹងយូ ភេទប្រុស អាយុ ២៥ឆ្នាំ,ទី៥- ឈ្មោះ វៀង យ៉ាំងឡើយ ភេទប្រុស អាយុ ៣០ឆ្នាំ ,ទី៦- ឈ្មោះ វៀង យ៉ាំងញឹក ភេទប្រុស អាយុ ១៨ឆ្នាំ ,ទី៧- ឈ្មោះ វៀង វ៉ឹកផុង ភេទប្រុស អាយុ ៣៧ឆ្នាំ និងទី៨- ឈ្មោះ វៀង ថៃប៊ិន ភេទប្រុស អាយុ ២៤ឆ្នាំ ។ ជនជាតិវៀតណាមទាំង៨នាក់ខាងលើនេះមានទីលំនៅក្នុងភូមិខាំងប៊ិន ឃុំខាំងប៊ិន ស្រុកអាំងភូ ខេត្តអាងយ៉ាង ប្រទេសវៀតណាម ។
លោកវរសេនីយ៍ទោ សេង សុជាតិ បានបន្តថា ជនជាតិវៀតណាមខាងលើនេះបានលួចឆ្លងដែនចូលមកកម្ពុជាដោយខុសច្បាប់តាមច្រករបៀងព្រែកស្បូវ ស្ថិតក្នុងឃុំសំពៅពូន ស្រុកកោះធំនៅវេលាយប់ថ្ងៃទី២ តាមរយៈមេខ្យល់ឈ្មោះ វៀង យ៉ាំងតាប់ ដើម្បីមកស៊ីឈ្នួលបេះផ្លែស្វាយឲ្យឈ្មោះ សុង លាងហួរ ភេទប្រុស អាយុ៣៣ឆ្នាំ មានទីលំនៅភូមិបារ៉ែនលើ ឃុំស្វាយប្រទាល ស្រុកស្អាង ។
ស្នងការរងនគរបាលខេត្តកណ្តាលទទួលការងារអន្តោប្រវេសន៍ លោកវរសេនីយ៍ឯក តុប សុវណ្ណ បានថ្លែងប្រាប់អ្នកយកព័ត៌មាននគរវត្តតាមទូរស័ព្ទថា នៅរសៀលថ្ងៃទី៣ ខែ/ឆ្នាំដដែលនេះកម្លាំងនគរបាលការិយាល័យអន្តោប្រវេសន៍ នៃស្នងការដ្ឋាននគរបាលខេត្តរៀបចំឯកសារចាប់បញ្ជូនជនអន្តោប្រវេសន៍ខុសច្បាប់ទាំង៨នាក់នេះក្នុងនោះមានម្នាក់ជាមេខ្យល់ ទៅកាន់ប្រទេសកំណើតវិញតាមចក្រទ្វាទ្វេរភាគីជ្រៃធំ-ខ្នាតាំងយូរ ៕
ដោយ៖ ស្អាងជ័យ
