ខេត្តស្វាយរៀង៖ ប្រុស ស្រី៤នាក់រងរបួសធ្ងន់ ស្រាល ខណៈដែលជួបគ្រោះចរាចរណ៍រវាងម៉ូតូនឹងម៉ូតូ បើកស្របទិសគ្នាកាលពីវេលាម៉ោង៦និង២០នាទីព្រឹក ថ្ងៃទី៤ ខែវិច្ឆិកា ឆ្នាំ២០១៥ លើកំណាត់ផ្លូវជាតិលេខ១ ស្ថិតក្នុងភូមិលាប ឃុំកណ្តៀងរាយ ស្រុកស្វាយទាប យោងតាមសមត្ថកិច្ចស្រុកស្វាយទាបបានឲ្យដឹងថា មុនពេលកើតហេតុគេមានម៉ូតូម៉ាកវ៉ែវ ពណ៌ ស្លែ គ្មានស្លាកលេខ ជិះឌុបគ្មា២នាក់ធ្វើដំណើរពីទិសខាងលិចទៅទិសខាងកើតលុះដល់ចំនុចកើតហេតុខាងលើ ក៏មានម៉ូតូមួយគ្រឿងទៀតម៉ាកហុងដា សេ១២៥ ជិះឌុបគ្នា២នាក់ធ្វើដំណើរស្របទិសគ្នា យ៉ាងលឿនបុកម៉ូតូវ៉ែវពីក្រោយយ៉ាងពេញទំហឹងបណ្ដាលឲ្យដួលរដូករណែលលើផ្លូវតែម្ដង ។
សមត្ថកិច្ចនគរបាលបន្តថា បុរសដែលរងរបួសធ្ងន់ ជិះម៉ូតូម៉ាកសេ១២៥នោះ មានឈ្មោះ តែន ពិសី អាយុ២៥ឆ្នាំ មុខរបរកម្មករ រស់នៅ ភូមិ តាយន្ត ឃុំពងទឹក ស្រុករំដួល និងរួមដំណើរជាមួយមានឈ្មោះ ពុត ប៊ុនធឿន ភេទស្រី អាយុ៣៤ឆ្នាំ រស់នៅភូមិឃុំជាមួយរងរបួសស្រាល ។
ចំណែកអ្នកបើកបរម៉ូតូវ៉េវម្ខាងទៀតមានឈ្មោះ ស្រី សុខា ភេទប្រុស អាយុ៤១ឆ្នាំ មុខរបរ កសិករ និងអ្នករួមដំណើរឈ្មោះ ម៉ី ចាន់ធឿន ភេទស្រីអាយុ៤១ឆ្នាំ មុខរបរ កសិករ ដោយអ្នកទាំង២មានទីលំនៅភូមិរស់នៅភូមិ ទាហ៊ាន សង្កាត់ ស្វាយតឿ ក្រុងស្វាយរៀង ។
ក្រោយពីកើតហេតុ សមត្ថកិច្ចនគរបាលចុះវាស់វែង និងយកម៉ូតូទាំង២គ្រឿងមករក្សាទុកនៅអធិការដ្ឋាននគរបាលស្រុកស្វាយទាបដើម្បីដោះស្រាយតាមច្បាប់ ។
ប្រជាពលរដ្ឋដែលឃើញហេតុការណ៍បានរិះគន់ចំពោះរថយន្តសង្គ្រោះរបស់មន្ទីរពេទ្យបង្អែកស្រុកស្វាយទាបដែលយឺតយ៉ាវក្នុងការមកដឹកជនរងគ្រោះមកមន្ទីពេទ្យដោយទូរស័ព្ទហៅរថយន្តជាងមួយម៉ោងទើបរថយន្តមកដល់ដោយទុកឲ្យជនរងគ្រោះស្ទើរដាច់ខ្យល់ ខណៈចំងាយពីកន្លែងកើតហេតុនោះគឺនៅមិនឆ្ងាយសោះ ៕
ដោយ៖ យឹម សុថាន
