ខេត្តកំពត៖ បុរសម្នាក់ត្រូវបានគេប្រទះឃើញចងកស្លាប់ នៅក្រោមផ្ទះដោយ កាលពីវេលាម៉ោង៤ទៀបភ្លឺ ថ្ងៃទី៣ ខែវិច្ឆិកា ឆ្នាំ២០១៥ នៅក្នុងភូមិទងលាង ឃុំបន្ទាយមាសខាងលិច ស្រុកបន្ទាយមាស ខេត្តកំពត ដែលករណីនេះ ត្រូវបានសន្និដ្ឋានថា ជាការធ្វើអត្តឃាតដោយសារតែគាត់តូចចិត្តនឹងជំងឺរ៉ាំរ៉ៃព្យាបាលមិនជា។
បុរសដែលចងកធ្វើអត្តឃាតសម្លាប់ខ្លួនខាងលើ ឈ្មោះប៉ិច សុខា អាយុ២៨ឆ្នាំ(នៅលីវ) រស់នៅភូមិ-ឃុំកើតហេតុខាងលើ។
ប្រភពព័ត៌មានឲ្យដឹងថា យុវជនរូបនេះមានជំងឺដំបៅក្រលៀនរលួយរឡេះយ៉ាងធ្ងន់ធ្ងរជាយូរឆ្នាំមកហើយ។ រាល់ថ្ងៃគាត់រស់នៅក្នុងបន្ទុករបស់ម្តាយ ដោយសារបញ្ហាជីវភាពក្រីក្រ ទើបគាត់មិនអាចមានលទ្ឋភាពយកកូនទៅព្យាបាលនៅមន្ទីរពេទ្យក្រៅប្រទេសបាន ក៏ចេះតែបណ្ដែតបណ្ដោយ ឲ្យកូនប្រុសរស់នៅទាំងទុរុនទុរាបែបនេះ។ ជាយូរឆ្នាំមកហើយ ដែលបុរសខាងលើ បានធ្លាក់ខ្លួនដោយសារជំងឺនេះ ហើយទើបនៅថ្ងៃកើតហេតុ ប្រហែលដោយសារមិនអាចទ្រាំទ្រនឹងភាពឈឺចាប់ឥតស្បើយនោះទៀត ទើបគាត់សម្រេចចិត្តចងកបញ្ចប់ជីវិតដើម្បីផុតទុក្ខនិងការឈឺចុកចាប់។
ប្រភពបន្ដទៀតថា នៅយប់មុនពេកើតហេតុ គ្រប់គ្នាបានចូលសម្រាកនិទ្ទ្រាជាធម្មតា។ លុះវេលាម៉ោង៤ទៀបភ្លឺពេលម្តាយចុះមកដី ស្រាប់តែឃើញសាកសពបានចងកនឹងធ្នឹមផ្ទះនៅក្រោមផ្ទះស្លាប់បាត់ទៅហើយ ក៏ស្រែកឆោឡោបង្កការភ្ញាក់ផ្អើលដល់ប្រជាពលរដ្ឋដែលនៅក្បែរខាងនោះ រួចក៏បានរាយការណ៍ជូនសមត្ថកិច្ចឲ្យទៅពិនិត្យសាកសព។
ក្រោយពីទទួលបានពត៌មាននេះ កម្លាំងនគរបាលព្រហ្មទណ្ឌ័ស្រុកបន្ទាយមាសបានចុះទៅដល់កន្លែងកើតហេតុ ដើម្បីពិនិត្យសាកសព។ ក្រោយពីសមត្ថកិច្ចពិនិត្យសាកសពរួចរាល់ សមត្ថកិច្ចសន្និដ្ឋានថា ជនរងគ្រោះពិតជាចងកធ្វើអត្តឃាតដោយខ្លួនឯងពិតប្រាកដមែន ហើយក៍បានប្រគល់ឲ្យក្រុមគ្រួសាររៀបចំធ្វើបុណ្យទៅតាមប្រពៃណី៕
ដោយ៖ វិបុល
