ខេត្ដព្រះសីហនុ៖ សង្គមស៊ីវិលជិត ២០អង្គភាពនៅខេត្ដព្រះសីហនុត្រៀម លើកយកបញ្ហាប្រឈមដែលកើតមាន នៅខេត្ដនេះជាពិសេសករណីរំលោភចំណី មាត់បឹងព្រែកទប់ និងដីអនុក្រឹត្យលេខ ៧៦សម្រាប់រក្សាប្រភពទឹកស្អាតជាដើម ដាក់ជូនអភិបាលខេត្ដព្រះសីហនុបំភ្លឺ ដើម្បីរួមគ្នារកដំណោះស្រាយ ។ បណ្ដាញ អង្គការមិនមែនរដ្ឋាភិបាល ឬហៅថា បណ្ដាញតស៊ូមតិដែលមានអង្គការសមាគមជិត២០ស្ថាប័នជាសមាជិកនៅខេត្ដ ព្រះសីហនុនឹងបើកកិច្ចប្រជុំលើកយក បញ្ហាប្រឈមមួយចំនួនដែលបានកើតមាននាមូលដ្ឋាននេះ ប៉ុន្ដែអាជ្ញាធរខេត្ដ មិនទាន់បានដោះស្រាយយកទៅពិភាក្សានៅថ្ងៃទី៥នេះ ។
ប្រធានអង្គការមួយរូបមានប្រសាសន៍ថា លទ្ធផលដែលទទួលបានពីកិច្ចប្រជុំ នេះនឹងដាក់ជូនទៅអភិបាលខេត្ដព្រះ សីហនុបំភ្លឺ ឬរួមគ្នារកដំណោះស្រាយ ។ លោកបន្ដថាឯកសារដែលត្រៀមដាក់ជូនអភិបាលខេត្ដព្រះសីហនុនាសបា្ដហ៍ក្រោយ គឺផ្ដោតទៅលើការផ្ដល់ប័ណ្ណកម្មសិទ្ធិនៅជុំវិញមាត់បឹងព្រែកទប់និងករណីទន្ទ្រានកាន់កាប់ដីអនុក្រឹត្យលេខ៧៦នៅតំបន់ ក្បាលឆាយដើម្បីរក្សាប្រភពទឹកស្អាត ។ ប្រជាពលរដ្ឋរិះគន់ថាអាជ្ញាធរខេត្ដព្រះសីហនុបានអនុញ្ញាតឱ្យមានសកម្មភាពសាងសង់វីឡាធំស្កឹមស្កៃនៅជាប់មាត់បឹងព្រែកទប់អាចបន្ដដំណើរការដោយរលូននិងគ្មានការហាមឃាត់ទេ ។
លោក ប៊ួន ណារិទ្ធិ មន្ដ្រីសម្រប សម្រួលអង្គការលីកាដូ (LICADHO) ខេត្ដព្រះសីហនុចាត់ទុកថា រាល់ការ ចេញប័ណ្ណកម្មសិទ្ធិអនុញ្ញាតដោយ មន្ទីរសុរិយោដីខេត្ដទៅលើដីចំណីមាត់ បឹងព្រែកទប់ឬផ្ទៃរងទឹកភ្លៀងបឹងធម្មជាតិមួយនេះកើតឡើងដោយការឃុបឃិត ខុសនីតិវិធីច្បាប់ ។ ដូច្នេះបើអភិបាល ខេត្ដមានឆន្ទៈចង់រក្សាតំបន់នេះទុកជា ប្រភពទឹកស្អាតតាមបទបញ្ជារបស់រាជរដ្ឋាភិបាលពិតប្រាកដ ហើយអំណាច ថ្នាក់ខេត្ដមិនអាចដោះស្រាយបាន គឺ ត្រូវសុំគោលការណ៍ពីរាជរដ្ឋាភិបាល ដើម្បីមោឃភាពប្លង់សិទ្ធិដីនៅជុំវិញ បរិវេណមាត់បឹងព្រែកទប់មកដាក់ជា សម្បត្ដិរដ្ឋគ្រប់គ្រងវិញ ។ បើមិនដូច្នេះទេ អាជ្ញាធរខេត្ដមិនអាចទប់ស្កាត់មហិច្ឆតារំលោភកាន់កាប់ពីសំណាក់ឈ្មួញ និង មន្ដ្រីមានអំណាចទាំងនោះដោយខ្លួនឯង បានទេ ហើយបឹងព្រែកទប់ នឹងត្រូវបាត់ បង់ ឬរលាយហិនហោច ។
លោកយន្ដ មីន អភិបាលខេត្ដព្រះសីហនុ ធ្លាប់មានប្រសាសន៍ថា រាល់ការចេញ ប័ណ្ណកម្មសិទ្ធិជូនបុគ្គលរបស់មន្ទីរជំនាញខេត្ដនេះទៅលើដីចំណីមាត់បឹងព្រែកទប់កន្លងមក គឺទុកមួយឡែកសិន ។ ប៉ុន្ដែ បច្ចុប្បន្នអាជ្ញាធរខេត្ដនេះអាចទប់ស្កាត់ទាំងស្រុងមិនឱ្យមានសកម្មភាពដឹកដី ចាក់ចូលបឹងព្រែកទប់ទៀតទេ ។
មន្ដ្រីសង្គមស៊ីវិលនិងប្រជាពលរដ្ឋមួយចំនួនរស់នៅខេត្ដព្រះសីហនុបានអះអាងថា រាល់ថ្ងៃនេះសកម្មភាពសាងសង់ វីឡាធំស្កឹមស្កៃមានទីតាំងនៅជាប់មាត់បឹងព្រែកទប់ ស្ថិតក្នុងសង្កាត់លេខ៣ ដែលគេស្គាល់ថាជាកម្មសិទ្ធិរបស់លោក តាក់ វណ្ណថា អតីតស្នងការនគរបាល ខេត្ដព្រះសីហនុ និងបច្ចុប្បន្នជាសមា ជិកក្រុមប្រឹក្សាខេត្ដនេះបានបន្ដដំណើរ ការសាងសង់ដោយគ្មានអាជ្ញាធរហាមឃាត់ទេ ។
ត្រង់ចំណុចនេះ លោក ប៊ួន ណារិទ្ធិ ប្រធានអង្គការលីកាដូប្រចាំខេត្ដព្រះ សីហនុចាត់ទុកសំណង់វីឡាធំស្កឹមស្កៃជាកម្មសិទ្ធិរបស់លោក តាក់ វណ្ណថា ដែល កំពុងបន្ដសាងសង់ថាបានផ្គើនទៅនឹង បទបញ្ជារបស់សម្ដេចក្រឡាហោម ឧបនាយករដ្ឋមន្ដ្រី ស ខេង រដ្ឋមន្ដ្រីក្រសួង មហាផ្ទៃ និងបទបញ្ជារបស់សម្ដេច នាយករដ្ឋមន្ដ្រី ហ៊ុន សែន បានដាក់ឱ្យ អាជ្ញាធរអភិរក្សតំបន់នេះសម្រាប់ប្រភពទឹកស្អាត ។
វីឡាធំស្កឹមស្កៃជាកម្មសិទ្ធិរបស់ លោក តាក់ វណ្ណថា ត្រូវ លោក នួន ប៉ុក ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ដព្រះសីហនុ ទើបឡើងកាន់តំណែងថ្មីបញ្ជាក់ថា “លោកបានសុំចុះបញ្ជីស្នើប្លង់កម្មសិទ្ធិ ត្រឹមត្រូវពីស្ថាប័នខ្លួននាពេលកន្លងមក” ។ លោកថា សំណង់នេះ សង់មានច្បាប់ ឬអត់ច្បាប់អនុញ្ញាត គឺមិនបានដឹងទេ ព្រោះមិនស្ថិតក្រោមជំនាញរបស់លោកគ្រប់គ្រងឡើយ ។
សម្ដេចក្រឡាហោមឧបនាយករដ្ឋ មន្ដ្រី ស ខេង រដ្ឋមន្ដ្រីក្រសួងមហាផ្ទៃ ធ្លាប់ព្រមានធ្ងន់ៗទៅលើមន្ដ្រីរដ្ឋាភិបាលទាំងឡាយណាដែលមានជាប់ពាក់ព័ន្ធ សកម្មភាពរំលោភយកដីបឹងព្រែកទប់ ត្រូវដកខ្លួនជាបន្ទាន់ដើម្បីទុកតំបន់នេះសម្រាប់អភិរក្សប្រភពទឹកសាបប្រើប្រាស់នៅទាំងខេត្ដព្រះសីហនុ ។
ទោះយ៉ាងណាបទបញ្ជានេះ ទាំងមន្ដ្រី សង្គមស៊ីវិលនិងប្រជាពលរដ្ឋខេត្ដព្រះ សីហនុថ្លែងថា មិនទាន់ឃើញអាជ្ញាធរ ខេត្ដនេះមានចំណាត់ការតាមផ្លូវច្បាប់ ទៅលើជនរំលោភដីចំណីមាត់បឹងព្រែកទប់ ដែលបានហ៊ុមព័ទ្ធរបងថ្ម ឬចាក់ដី លុបមាត់បឹងទុកចោលនោះទេ ។ ជាង នេះចំពោះវីឡាធំស្កឹមស្កៃដែលកំពុង សាងសង់នៅខាងលើជាប់មាត់បឹងព្រែកទប់ជាកម្មសិទ្ធិរបស់ លោក តាក់ វណ្ណថា សមាជិកក្រុមប្រឹក្សាខេត្ដព្រះសីហនុ ក្នុងតំណែងសព្វថ្ងៃនេះបានបន្ដសកម្មភាពសាងសង់ដោយគ្មានកោតញញើតអាជ្ញាធរខេត្ដនោះទេ ៕
ដោយ៖ ហេង នរិន្ទ្រ
