ខេត្តប៉ៃលិន៖ លោកនាយឧត្តមសេនីយ៍ គន់ គីម អគ្គមេបញ្ជាការរង នាយសេនាធិការចំរុះ តំណាងសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត អមដំណើរដោយនាយឧត្តមសេនីយ៍ ជា តារា អគ្គមេបញ្ជាការរង ប្រធានសមរភូមិមុខ ទិសយោធភូមិភាគទី៤ លោកឧត្តមសេនីយ៍ឯក ច័ន្ទ លំផាត់ ឧត្តមសេនីយ៍ឯក ង៉ែត ចាន់ថុន នាយរងសេនាធិការចំរុះ នៅថ្ងៃទី៥ ខែវិច្ឆិកា ឆ្នាំ២០១៥ បានបន្តនាំយកអាវរងា ជូនដល់កងកម្លាំងជួរមុខ នៅទិសយោធភូមិភាគទី៥ នៅទីបញ្ជាការមុខ របស់កងពលតូចលេខ៥១ លេខ៥២ លេខ៥៣ ។
លោកមេបញ្ជាការកងពលតូចថ្មើរជើងទាំងបីទីតាំង លេខ៥១ លេខ៥២ លេខ៥៣ តំណាងកងកម្លាំងប្រដាប់អាវុធ ជួរមុខទាំងអស់ មានការសប្បាយរីករាយ ថ្លែងអំណរគុណយ៉ាងខ្ពង់ខ្ពស់បំផុត ជូនចំពោះសម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ដែលបានឧបត្ថម្ភអាវរងា ដល់កងកម្លាំងជួរមុខសំរាប់ត្រៀម មុនពេលរដូវរងាមកដល់។ ការជួយឧបត្ថម្ភនេះ មានរាល់រដូវកាលក្នុងនោះ រដូវភ្លៀងសម្តេចផ្តល់អាវភ្លៀង រដូវរងាសម្តេចផ្តល់អាវរងា ជារៀងរាល់ឆ្នាំ បន្ថែមលើការជួយឧបត្ថម្ភគ្រឿង បំពាក់ដល់កងទ័ព មានគ្រប់លទ្ធភាព គ្រប់សមត្ថភាពប្រយុទ្ធ។
តំណាងកងកម្លាំងប្រដាប់អាវុធទាំងអស់ ក៏បានប្តេជ្ញាដាច់ខាតអនុវត្ត ភារកិច្ចការពារជាតិ ការពារបូរណ ភាពទឹកដី ប្តេជ្ញាដាច់ខាតការពាររដ្ឋធម្មនុញ្ញ ការពារព្រះមហាក្សត្រ ការពាររាជរដ្ឋាភិបាលដឹកនាំដោយសម្តេច តេជោ ហ៊ុន សែន ដល់ដង្ហើមចុងក្រោយ និងថ្កោលទោសប្រឆាំង ដាច់អហង្ការនូវទង្វើរបស់ជនទុច្ចរិតនិង ជនអគតិទាំងឡាយ ដែលតែងតែប្រឌិត មូលបង្កាច់ប្រជាភិថុតិ ក្នុងចេតនាអាក្រក់ផ្តួលរំលំ រាជរដ្ឋាភិបាលកម្ពុជា។
លោកនាយឧត្តមសេនីយ៍ គន់ គីម បានពាំនាំនូវបណ្តាំផ្ញើ សាកសួរសួរសុខទុក្ខពីសំណាក់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា និងសម្តេចកិត្តិព្រឹទ្ធបណ្ឌិត ជូនចំពោះកងទ័ព កងនគរបាលជួរមុខកំពុងឈរជើង ការពារទឹកដីតាមបន្ទាត់ព្រំដែន ដែលកន្លងមកបានធ្វើពលីកម្ម គ្រប់បែបយ៉ាង អនុវត្តបានម៉ឺងម៉ាត់នូវបទបញ្ជា ការពារបាននូវបូរណភាពទឹកដី ក្នុងសិទ្ធិស្វ័យការពារទឹកដីកន្លងមក។ ពិតមែនតែស្ថានការណ៍ព្រំដែនបច្ចុប្បន្ន មានភាពធូរស្រាលមួយចំនួនហើយ តែជំហរសម្តេចតេជោនៅតែចង់ បានព្រំដែនមានសន្តិភាព មានកិច្ចសហ ប្រតិបត្តិការល្អ មានការអភិវឌ្ឍន៍ថែមទៀត ដើម្បីប្រជាជនព្រំដែន បានរស់នៅសុខសាន្ត សុខដុមរម្យនា។
លោកនាយឧត្តមសេនីយ៍បានបន្តថា នៅពេលនេះមិនទាន់ដល់រដូវរងា តែសម្តេចទាំងពីរលោកបាន ផ្តល់អាវរងាដល់កងកម្លាំងយើង នៅព្រំដែនសំរាប់ត្រៀមមុន រដូវរងាមកដល់ ហើយនឹងបន្តផ្តល់ជូនរហូតកម្លាំង តាមបន្ទាត់ព្រំដែន ទទួលបានអាវរងារ នេះគ្រប់ៗគ្នា៕
