មនុស្សជាច្រើនពាន់នាក់បាននាំគ្នាធ្វើបាតុកម្មនៅទូទាំងប្រទេស Romania កាលពីថ្ងៃទី៤ ខែវិច្ឆិកា ឆ្នាំ២០១៥ ទាមទារឲ្យមានការលាលែងតំណែងនាយករដ្ឋមន្ត្រីប្រទេសនេះ បន្ទាប់ពីជនរងគ្រោះបាត់បង់ជីវិតដោយសារព្រឹត្តិការណ៍អគ្គិភ័យឆេះក្លិបរាត្រីកម្សាន្តកណ្តាលទីក្រុងនោះបានកើនដល់៣២នាក់ និងរាប់សិបនាក់ផ្សេងទៀតរងរបួសជាទម្ងន់នៅតាមមន្ទីរពេទ្យនានានោះ ។
អាជ្ញាធរនៅក្នុងប្រទេសនេះមិនបានរារាំងការព្រឹត្តិទៅនៃបាតុកម្មនេះឡើយ ។ ក្រុមបាតុករបានធ្វើបាតុកម្មតាំងពីព្រឹករហូតដល់យប់អធ្រាត្រមិនព្រមឈប់សម្រាកសោះឡើយ ។ បាតុករខ្លះបានលើកបដាសរសេរថា ប្រហារអំពើពុករលួយ ឬថាជាពេជ្ឈឃាត ។ គ្រោះអគ្គិភ័យបានកើតឡើងកាលពីសប្តាហ៍មុននៅក្នុងប្រទេសនេះ ជាព្រឹត្តិការណ៍គ្រោះថ្នាក់មួយដ៏អាក្រក់បំផុតមិនធ្លាប់កើតមានក្នុងរយៈពេលទសវត្សរ៍ចុងក្រោយរបស់ប្រទេសមួយនេះ ។
ស្ថិតនៅទីក្រុង Bucharest មនុស្សប្រមាណ២០.០០០នាក់បានដង្ហែក្បួនធ្វើបាតុកម្មឆ្ពោះទៅកាន់វិមានរដ្ឋាភិបាល និងក្រសួងមហាផ្ទៃ ។ ការបាតុកម្មរាលដាលទៅលើខាងក្រៅរដ្ឋធានី Romania ទៅដល់ Brasov និង Ploiestiផងដែរ ។ នៅអំឡុងថ្ងៃខាងមុនទៀតនេះ នឹងមានការដង្ហែក្បួនទ្រង់ទ្រាយធំបន្ថែមទៀតប្រឆាំងរដ្ឋាភិបាលប្រទេសនេះ ។ នេះបើតាមការប្រកាសផ្សព្វផ្សាយនៅតាមប្រព័ន្ធទំនាក់ទំនងសង្គមហ្វេសប៊ុក ។
អគ្គិភ័យបានកើតឡើងកាលពីយប់ថ្ងៃសុក្រ សប្តាហ៍មុន ដែលករណីនេះត្រូវគេជឿថា ផ្កាភ្លើងនៃការបាញ់កាំជ្រួចជាមូលមូលហេតុចម្បងនាំឲ្យមានអណ្តាតភ្លើងឆាបឆេះឡើង Colectiv ។ មានការផ្អើលរត់ជាន់ជើងគ្នាដោយសារតែអគ្គិភ័យនេះផងដែរ ។ មនុស្សប្រមាណ៤០០នាក់ ភាគច្រើនជាយុវវ័យស្ថិតនៅក្នុងក្លិបកម្សាន្តរាត្រីដែលត្រូវភ្លើងឆេះនេះ ។ មានការរិះគន់ផងដែរថា ក្លិបកម្សាន្តនេះគ្មានផ្លូវចេញ ចូលគ្រប់គ្រាន់សម្រាប់ជម្លៀសជនរងគ្រោះនៅពេលមានហេតុការណ៍អាក្រក់កើតឡើងនោះឡើយ ។
ក្រុមបាតុករដែលធ្វើបាតុកម្មនៅទីក្រុង Bucharest បានស្រែកទាមទារឲ្យលោកនាយករដ្ឋមន្ត្រី Victor Ponta និងឧបនាយករដ្ឋមន្ត្រី Gabriel Oprea ចុះចេញពីតំណែង ព្រមទាំងមន្ត្រីរដ្ឋាភិបាលជាន់ខ្ពស់ដែលទទួលខុសត្រូវក្នុងរដ្ឋធានីដែលទីតាំងក្លិបColectiv ត្រូវភ្លើងឆាបឆេះនោះផងដែរ ។
បាតុកម្មបានឈានដល់ការបិទផ្លូវ ។ បាតុករជាស្ត្រីបានស្រែកតាមឧគ្ឃោសនស័ព្ទថា «ចូរក្រោកឡើង ហើយធ្វើអ្វីមួយទៅ ។ យើងចង់បានយុត្តិធម៌ខ្លាំងណាស់» ។
ក្រុមវេជ្ជបណ្ឌិតបានអំពាវនាវស្វែងរកការផ្តល់ឈាមដោយស្ម័គ្រចិត្ត ក៏ដូចជាការផ្តល់ម្ហូបអាហារ និងទឹកផឹកផងដែរដើម្បីយកទៅផ្តល់ជូនដល់ក្រុមអ្នកជំងឺរងគ្រោះដែលកំពុងសម្រាកព្យាបាលនៅក្នុងមន្ទីរពេទ្យ ៕
ប្រែសម្រួល៖ ថាច់ យ៉ាត
