ភ្នំពេញ៖ ដោយសារតែការប្រើប្រាស់សាធាតុញៀនប្រភេទម៉ុកហ្វីនលើសកម្រិត បានធ្វើឲ្យបុរសជនជាតិអូស្ត្រាលីម្នាក់ ខណៈដែលជនរងគ្រោះបានហៅនារីម្នាក់មកដេកជាមួយហើយពេលនារីត្រឡប់ទៅវិញ ស្រាប់តែបុរសជនរងគ្រោះរូបនោះ គាំងបេះដូងស្លាប់ ក្នុងបន្ទប់សណ្ឋាគារយីហោ ហាវ មុន្នី ដោយដេកផ្គាប់មុខ ។
ហេតុការណ៍បង្កឲ្យមានភាពភ្ញាក់ផ្អើលកាលពីវេលាម៉ោង៤រសៀល ថ្ងៃទី៥ ខែវិច្ឆិកា ឆ្នាំ២០១៥ នៅក្នុងបន្ទប់ជួលលេខ១០៤ជាន់ទី៤ នៃសណ្ឋាគារយីហោ ហាវ មុន្នី ទីតាំងលេខ២៥ផ្លូវលេខ១៤៨ ភូមិ៥ សង្កាត់ផ្សារកណ្តាល១ខណ្ឌដូនពេញ រាជធានីភ្នំពេញ ។
ជនរងគ្រោះឈ្មោះ CAVKA ANTON JASON PETER (ខេវកា អានថុន ចេសសាន់ ផេតធឺ)អាយុ៤៦ មុខរបរទេសចរណ៍) កាន់លិខិតឆ្លងដែនលេខ N6163226 ស្នាក់នៅសណ្ឋាគារកើតហេតុខាងលេី ។
តាមប្រភពព័ត៌មានពីសមត្ថកិច្ចដែលនៅកន្លែងកើតហេតុបានឲ្យដឹងថា នៅមុនពេលកើតហេតុ នៅវេលាម៉ោង៦ និង៣០នាទីថ្ងៃទី០៤ ខែវិច្ឆិកាឆ្នាំ២០១៥ ជនរងគ្រោះនិងមិត្តភក្ដិម្នាក់ទៀតដែលជាជនបរទេសដូចគ្នាបាននាំគ្នាំដើរលេងចូលបារផឹកសីុរហូតដល់១១យប់ថ្ងៃដដែល ក៏ត្រលប់មកសណ្ឋាគារដែលខ្លួនស្នាក់នៅវិញ ដោយមាននារីម្នាក់មកដេកជាមួយផងដែរ ។ លុះដល់វេលាម៉ោង០១និង៣០នាទីរំលងអធ្រាត្រ ឈានចូលថ្ងៃទី០៥ ស្រាប់តែឃើញនារីដែលដេកជាមួយជនរងគ្រោះ បានចុះពីសណ្ឋាគារវិញ ភ្លាមនោះបុគ្គលិកសណ្ឋាគារម្នាក់ ឈ្មោះ ប៉ុច ខាំខូយ បានឃាត់នារីខ្មែររូបនោះ ហេីយបានទូរស័ព្ទទៅជនរងគ្រោះនិយាយគ្នាថាអនុញ្ញាតិឲ្យនារីរូបនេះទៅដែរឬអត់ ហើយជនរងគ្រោះ ក៏ឆ្លើយប្រាប់ថា ឲ្យគាត់ទៅចុះ ។
រហូតដល់ម៉ោង០៩ព្រឹកថ្ងៃទី០៥មិត្តភក្ដិរបស់ជនរងគ្រោះឈ្មោះFaid Judd Damien បានទូរស័ព្ទចូលជនរងគ្រោះច្រើនដងតែពុំមានការឆ្លើយតប លុះដល់ម៉ោង៤ និង៣០នាទីរសៀល មិត្តភក្ដិរបស់ជនរងគ្រោះ បានឡើងទៅបន្ទប់ជនរងគ្រោះគោះទ្វារ បន្ទប់ក៏មិនឮនិងមិនឆ្លើយតប ទេីបមិត្តភក្ដិជនរងគ្រោះចុះមកប្រាប់អ្នកទទួលខុសត្រូវក្នុងសណ្ឋាគារបាននាំគ្នាឡើងទៅមើលនិងចាក់សោរចូលទៅក្នុងបន្ទប់ ទើបឃើញជនរងគ្រោះដេកថ្កាប់មុខស្លាប់មិនដឹងពេលណានោះទេ ។
បន្ទាប់ពីមានការភ្ញាក់ផ្អើលឡើងនោះ កម្លាំងសមត្ថកិច្ចចំរុះបានបង្កើតគណៈកម្មការត្រួតពិនិត្យនិងធ្វើកោសល្យវិច័យដោយលោកនង សុវណ្ណរ័ត្ន គ្រូពេទ្យកោសល្យវិច័យសាលាដំបូងរាជធានីភ្នំពេញសហការជាមួយនិងនគរបាលការិយាល័យបច្ចេកទេសវិទ្យាសាស្ត្រក្រុង រហូតដល់សន្ឋិដ្ឋានថាជនរងគ្រោះស្លាប់ បណ្ដាលមកពីការប្រើប្រាស់សាធាតុញៀនប្រភេទម៉ុកហ្វីនលើសកម្រិត ទើបបណ្ដាលឲ្យគាំងបេះដូងតែម្តង ។
បច្ចុប្បន្នសពត្រូវបានសមត្ថកិច្ចដឹកបញ្ជូនទៅតម្កល់នៅមន្ទីរពេទ្យ ខ្មែរ សូវៀត ៕
ដោយ៖ ស ដារ៉ា
