ភ្នំពេញ៖ ក្រុមកីឡាបាល់ទាត់បឹង កេតអង្គរទំនងត្រូវប្រើប្រាស់កីឡាករល្អៗ របស់ខ្លួនឱ្យបានច្រើនសម្រាប់ស្វែងរក គ្រាប់បាល់ពីក្រុមណាហ្គាវើលនៅជើងទី២វគ្គពាក់កណ្ដាលផ្ដាច់ព្រ័ត្រនាវេលា ម៉ោង៦ល្ងាចថ្ងៃទី៧ ខែវិច្ឆិកា ឆ្នាំ២០១៥ នេះ ។
ទោះបីយ៉ាងនេះក្ដីទស្សនិកជននៅចាំ មិនភ្លេចទេ កាលពីជើងទី១វគ្គពាក់ កណ្ដាលផ្ដាច់ព្រ័ត្រក្រុមបឹងកេតអង្គរ បានលេងចាញ់ក្រោមថ្វីជើងរបស់ក្រុមណាហ្គាវើលក្នុងលទ្ធផល ៣-១ កាលពី ថ្ងៃទី២៥ ខែតុលា ឆ្នាំ២០១៥កន្លងទៅ ខណៈដែលជំនួបជើងទី២របស់ក្រុមទាំង២ខាងលើបានពន្យារពេលរហូតដល់ថ្ងៃទី៧ ខែវិច្ឆិកា ឆ្នាំ២០១៥ ក្រោមលេសរបស់ ក្រុមបឹងកេតថាពុំមានពេលគ្រប់គ្រាន់សម្រាប់ប្រមូលផ្ដុំកីឡាករហ្វឹកហាត់រួមគ្នា ។ ម្យ៉ាងវិញទៀតក្រុមបឹងកេតកំពុង ជាប់កាតព្វកិច្ចតំណាងប្រទេសកម្ពុជា ទៅចូលរួមប្រកួតជម្រុះពានរង្វាន់តូយ៉ូតា មេគង្គក្លិប២០១៥ ។ ដោយសុំសហ ព័ន្ធកីឡាបាល់ទាត់កម្ពុជាពន្យារពេល មួយរយៈ ។ ការសុំពន្យារពេលរបស់ ក្រុមបឹងកេតធ្វើឱ្យក្រុមណាហ្គាវើលមិនសប្បាយចិត្ដ ពីព្រោះណាហ្គាវើលសម្លឹង ឃើញជ័យជម្នះឡើងទៅវគ្គផ្ដាច់ព្រ័ត្រ ។
ចំពោះជំនួបជើងទី២នាថ្ងៃទី៧ ខែ វិច្ឆិកានេះ គ្រូបង្វឹកក្រុមណាហ្គាវើល លោក មាស ចាន់ណា បានប្រាប់អ្នក សារព័ត៌មានថា លោកនៅតែមានជំនឿ ចិត្ដទៅលើកូនក្រុមរបស់លោកដដែល ពីព្រោះគ្រប់យ៉ាងបានរៀបចំល្អអស់ ហើយ ហើយការលេងនៅជើងទី២នេះ ហើយដែរក្រុមណាហ្គាវើលនៅបន្ដជំហរប្រើទម្រង់លេងកាល ពីជើងទី១ដដែល ។ ដោយឡែក លោក ប្រាក់ សុវណ្ណារ៉ា គ្រូ បង្គោលរបស់ក្រុមបឹងកេតអង្គរហាក់ មានជំនឿចិត្ដខ្ពស់សម្រាប់ជំនួបប្រកួត ជើងទី២លោកអះអាងថា យ៉ាងណាក៏ដោយ យើងមានរយៈពេល៩០នាទីដើម្បីស្វែង រកគ្រាប់បាល់ពីណាហ្គាវើលវិញ ។
លោក ប្រាក់ សុវណ្ណារ៉ា ហាក់មិន បានផ្ដោតទៅលើកីឡាករ ចាន់ វឌ្ឍនាការ ខ្លាំងនោះទេ ដោយលោកបញ្ជាក់ថា លោកមានក្ដីសង្ឃឹមនិងទំនុកចិត្ដលើ កីឡាករបឹងកេតទាំងអស់ ។
ប៉ុន្ដែទោះយ៉ាងណាក្រុមអ្នកវិភាគកីឡាបាល់ទាត់ក្នុង ស្រុកបានលើកឡើងថា ជំនួបរវាងក្រុមណាហ្គាវើលនឹងក្រុមបឹងកេតពួកគេសុទ្ធតែទាមទារគ្រាប់បាល់ ពីគូបដិបក្ខរៀងៗខ្លួនប្រយោជន៍ឡើងទៅវគ្គផ្ដាច់ព្រ័ត្រ ។
គួររំលឹកថា រដូវកាលឆ្នាំ២០១៤នៃ ពានរង្វាន់មិត្ដហ្វូនខេមបូឌានលីកក្រុម ភ្នំពេញក្រោនជាម្ចាស់ជើងឯក ខណៈ ដែលក្រុមបឹងកេតអង្គរ គឺជាជើងឯករង។ ដូច្នេះគេចាំមើលថាតើក្រុមបឹងកេត អង្គរអាចឡើងទៅប្រជែងជាមួយនឹង ក្រុមភ្នំពេញក្រោនបានដែរឬទេ?
ដោយ៖ សារីម
