ចក្រភពអង់គ្លេសកាលពីថ្ងៃទី៥ ខែវិច្ឆិកា ឆ្នាំ២០១៥ បានធ្វើមាតុភូមិនិវត្តអ្នកទេសចររាប់ពាន់នាក់ពីតំបន់រមណីយដ្ឋាន Sharm el-Sheikh ប្រទេសអេហ្ស៊ីប ក្រោយមានការព្រមានថា យន្តហោះរុស្ស៊ីដែលធ្លាក់នោះទំនងជាបណ្តាលមកពីទង្វើភេរវកម្ម ។ ជើងហោះហើរជាច្រើនត្រូវលុបចោលជើងការហោះហើរទៅកាន់តំបន់នោះ ។
ប្រធានាធិបតីអេហ្ស៊ីប លោក Abdel Fattah al-Sisi មិនបានសម្តែងការព្រួយបារម្ភចំពោះបញ្ហាសន្តិសុខនៅអាកាសយានដ្ឋានក្នុងរមណីយដ្ឋានសមុទ្រក្រហម ក្រោមពីចក្រភពអង់គ្លេស និងអាមេរិកបានថ្លែងថា ការបំផ្ទុះគ្រាប់បែក អាចជាមូលហេតុធ្វើឲ្យយន្តហោះធ្លាក់កាលពីសប្តាហ៍កន្លងនៅឧបទ្វីបស៊ីណាយ ដែលសម្លាប់មនុស្ស២២៤នាក់ ។
ក្រុមឧទ្ទាមរដ្ឋអិស្លាម IS បានប្រកាសទទួលស្គាល់ចំពោះគ្រោះថ្នាក់ខាងលើនេះថាជាទង្វើរបស់ពួកគេ ប៉ុន្តែរដ្ឋាភិបាលអេហ្ស៊ីប និងរុស្ស៊ីផងដែរបានច្រានចោលការអះអាងរបស់ក្រុមរដ្ឋអិស្លាមនោះ ដោយបញ្ជាក់ថា ទីក្រុងកៃរ៉ូរកមិនឃើញភស្តុតាងណាមួយច្បាស់លាស់ដើម្បីកំណត់បានថា យន្តហោះដែលធ្លាក់នេះកើតឡើងដោយសារតែការបាញ់ប្រហារនោះឡើយ ។
ប្រទេសបារាំងបានព្រមានដល់ពលរដ្ឋរបស់ខ្លួនផងដែរចំពោះការធ្វើដំណើរដែលគ្មានលក្ខណៈចាំបាច់ទៅកាន់តំបន់រមណីយ្ឋាន ប្រទេសអេហ្ស៊ីបនោះ បើទោះបីថា ពលរដ្ឋរបស់ខ្លួនតិចតួចប៉ុណ្ណោះដែលស្ថិតទេសចរណ៍នៅតំបន់ដែលមានគ្រោះថ្នាក់កើតឡើង បើប្រៀបធៀបជាមួយពលរដ្ឋចក្រភពអង់គ្លេសដែលមានប្រមាណ២០.០០០នោះ ។
ក្រុមហ៊ុនអាកាសចរណ៍អាល្លឺម៉ង់ Lufthansa នៅពេលនេះបានលុបចោលជើងហោះហើររបស់ខ្លួន ចេញ ចូលទៅកាន់តំបន់រមណីយដ្ឋាន Sharm ដើម្បីជាការការពារ និងប្រុងប្រយ័ត្នទុកជាមុន ។ អាកាសចរណ៍ទូរគីក៏បានលុបចោលជើងហោះហើររបស់ខ្លួនពីរជើងផងដែរ បើទោះបីមានការបញ្ជាក់អះអាងកាលពីថ្ងៃទី៥ ខែវិច្ឆិកាថា ខ្លួននឹងបន្តការហោះហើរទៅកាន់តំបន់រមណីយដ្ឋានអេហ្ស៊ីបនោះក៏ដោយ ។
ទោះបីយ៉ាងណា គ្មានការព្រមានមិនឲ្យមានការហោះជាអន្តរជាតិ ឬថាពីសហគមន៍អឺរ៉ុបនោះទេ ហើយអាកាសចរណ៍អេហ្ស៊ុបបានហោះហើរចាកចេញពីទីក្រុងរ៉ូម មកកាន់ទីក្រុងរមណីយដ្ឋាន Sharm អេហ្ស៊ីបតាមការគ្រោងទុក ។
ប្រធានាធិបតីអេហ្ស៊ីប លោក Sisi បាននិងកំពុងស្ថិតនៅទីក្រុងឡុង ចក្រភពអង់គ្លេសដើម្បីពិភាក្សាការងារដែលគ្រោងរយៈពេលយូរមកនោះជាមួយនាយករដ្ឋមន្ត្រីដេវីដ កាមេរុន ។ លោក Sisi បានបញ្ជាក់ថា លោកត្រៀមខ្លួនរួចហើយនៅក្នុងការធ្វើសហប្រតិបត្តិការជាមួយដៃគូរបស់អេហ្ស៊ីបទាំងអស់ដើម្បីការពារដល់អ្នកទេសចរណ៍បរទេស ។ លោកបានធានាថា គ្រោះថ្នាក់ធ្លាក់យន្តហោះនាពេលនេះមិនធ្វើឲ្យប៉ះពាល់ជាវិជ្ជមានដល់វិស័យទេសចរណ៍អេហ្ស៊ីបឡើយ ។
ចក្រភពអង់គ្លេសកាលពីថ្ងៃទី៤ ខែវិច្ឆិកា បានប្រកាសផ្អាក់រាល់ការហោះហើរចេញ ចូលទៅកាន់តំបន់រមណីយដ្ឋានប្រទេសអេហ្ស៊ីប ដែលភាគច្រើនមានភ្ញៀវទេសចរណ៍រុស្ស៊ី និងអង់គ្លេសច្រើនជាងគេនោះ និងបានបញ្ជាក់ដោយសង្ឃឹមថា ការហោះហើរដើម្បីជម្លៀសពលរដ្ឋរបស់ខ្លួន នឹងបន្តធ្វើឡើងរហូតដល់ថ្ងៃទី៦ ខែវិច្ឆិកា ក្រោយពីការត្រួតពិនិត្យអំពីបញ្ហាសន្តិសុខគ្រប់ជ្រុងជ្រោយ ។
ថ្លែងនៅក្នុងសន្និសីទកាសែតរួមជាមួយលោកដេវីដ កាមរុន នាយករដ្ឋមន្ត្រីអង់គ្លេស លោក Sisi ប្រធានាធិបតីអេហ្ស៊ីបបានបញ្ជាក់ថា «យើងត្រៀមលក្ខណៈរួចជាស្រេចនៅក្នុងការធ្វើកិច្ចសហប្រតិបត្តិការជាមួយមិត្តភក្តិទាំងអស់ ដើម្បីធានាថា អាកាសយានដ្ឋានរបស់យើងផ្តល់ជូនគ្រប់គ្រាន់ពីសន្តិសុខ និងសុវត្ថិភាព» ។
លោកអះអាងថា ទីក្រុងឡុងបានសម្តែងការសប្បាយរីករាយ ជាមួយការផ្តល់ជូនសន្តិសុខ សុវត្ថិភាពនៅឯអាកាសយានដ្ឋាន Sharm el-Sheikh ក្រោយស្នើឲ្យទីក្រុងកៃរ៉ូជួយពិនិត្យមើលក្នុងរយៈពេល១០ខែកន្លងមកនោះ ។
លោក កាមរុន បានថ្លែងថា «យើងកំពុងធ្វើការគ្រប់នាទីជាមួយអេហ្ស៊ីបដើម្បីធានាឲ្យបានពីសន្តិសុខ និងសុវត្ថិភាពនៅអាកាសយានដ្ឋាន។ វិធានការផ្សេងៗបន្ថែមទៀតត្រូវតែកំណត់ឲ្យធ្វើឡើងនៅអាកាសយានដ្ឋាន Sharm el-Sheikh ដើម្បីធានាពីសុវត្ថិភាព សន្តិសុខឲ្យបានល្អប្រសើរ» ។
នាយករដ្ឋមន្ត្រីអង់គ្លេស លោក ដេវីដ កាមរុន កាលពីថ្មីៗនេះបានថ្លែងទៅកាន់ប្រធានាធិបតីរុស្ស៊ី លោកវ្ល៉ាឌីមៀរ ពូទីន ឲ្យជួយច្បាស់លាស់ទាក់ទងការសម្រេចចិត្តរបស់ប្រទេសរុស្ស៊ី ។ លោកពូទីន បានអះអាងថា ហេតុការណ៍ធ្លាក់យន្តហោះនោះ គួរតែផ្អែកទៅលើមូលដ្ឋាននៃការស៊ើបអង្កេតដែលកំពុងប្រព្រឹត្តទៅនោះតែប៉ុណ្ណោះ ៕
ប្រែសម្រួល៖ ថាច់ យ៉ាត
