ខេត្តបន្ទាយមានជ័យ ៖ រថយន្តកាមរី១គ្រឿង បានបើកទៅបុកពីក្រោយគោយន្តកន្ត្រៃពេញទំហឹង តែគ្រាន់តែបង្ករបួសបន្តិចបន្តួចដល់មនុស្សប៉ុណ្ណោះ បង្កការភ្ញាក់ផ្អើលនៅវេលាម៉ោង១០យប់ថ្ងៃទី១៣ ខែវិច្ឆិកា ឆ្នាំ២០១៥ នៅលើកំណាត់ផ្លូវជាតិលេខ៦ ខាងកើតស្ពានព្រៃជីក ស្ថិតក្នុងភូមិទឹកជោរ ឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យ។
ប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុ មានរថយន្តកាមរី១គ្រឿងស៊េរី៩៥ ពណ៌ស ពាក់ស្លាកលេខស្វាយរៀង 2A 0231 បើកដោយឈ្មោះ ហំ ហឿន ភេទប្រុស អាយុ២៩ឆ្នាំ រស់នៅភូមិ២ សង្កាត់កំពង់ស្វាយ ក្រុងសិរីសោភ័ណខេត្តបន្ទាយមានជ័យ បានបើកស្របទិសគ្នា ជាមួយគោយន្តកន្ត្រៃមួយគ្រឿង ក្នុងទិសដៅពីកើតទៅលិច។ លុះបើកមកដល់ចំណុចកើតហេតុ រថយន្តនោះក៏បានជ្រុលចង្កូតទៅបុកគោយន្តកន្ត្រៃពីក្រោយពេញទំហឹង តែពុំបណ្ដាលឲ្យមនុស្សរងរបួសធ្ងន់នោះទេ គ្រាន់តែរបួសបន្តិចបន្តួច។ ចំណែកអ្នកបើកគោយន្តកន្ត្រៃមានឈ្មោះឈ្មោះ រឿង ចាន់រ៉ា ភេទប្រុស អាយុ៣៣ឆ្នាំ រស់នៅភូមិស្វាយស ឃុំស្វាយស ស្រុកវ៉ារិន ខេត្តសៀមរាប អ្នកទាំងអស់គ្នាពុំមានគ្រោះថ្នាក់អ្វីឡើយ។
ក្រោយកើតហេតុ សមត្ថកិច្ចជំនាញបានចុះដល់កន្លែងកើតហេតុ និងនាំយករថយន្ត និងគោយន្ត ត្រូវបានយកមករក្សាទុកនៅអធិការនគរបាលស្រុក ដើម្បីដោះស្រាយទៅតាមច្បាប់៕ វិបុល
