ប៉ូលិសអេហ្ស៊ីបបានរកឃើញសាកសពជនអន្តោប្រវេសន៍អាហ្វ្រិក១៥នាក់ ដែលត្រូវបានបាញ់សម្លាប់ស្ថិតនៅភាគខាងជើងឧបទ្វីបស៊ីណាយ ។ ជាមួយគ្នានេះដែរ ជនភៀសខ្លួន៨នាក់ទៀតបានរកឃើញនៅរសរានមានជីវិត ប៉ុន្តែទទួលរងរបួស ។
គេនៅមិនទាន់ដឹងនៅឡើយថា តើក្រុមណាមួយជាអ្នកបើកការបាញ់ប្រហារទៅលើជនអន្តោប្រវេសន៍ទាំងនោះឡើយ ។ ពួកគេត្រូវបាញ់ប្រហារនៅជិតតំបន់ប្រជុំជន Rafah ជាប់ព្រំដែនជាមួយ Gaza ។
មានស្ថានការតានតឹងជាប្រចាំស្ថិតនៅក្នុងតំបន់ខាងលើនេះ ។ កម្លាំងយោធាអេហ្ស៊ីបព្យាយាមបោសសម្អាតក្រុមឧទ្ទាមរដ្ឋអិស្លាម IS ។ សពជនរងគ្រោះគេនៅមិនទាន់ដឹងថា ជាពលរដ្ឋមកពីប្រទេសណានៅឡើយទេ ។
ក្រុមជីហាដនិយមបានបោះមូលដ្ឋានរឹងមាំនៅតំបន់ស៊ីណាយភាគខាងជើងរបស់អេហ្ស៊ីប និងបានបង្កើនសកម្មភាពវាយប្រហាររបស់ពួកគេ ក្រោយកងកម្លាំងយោធាអេហ្ស៊ីបធ្វើរដ្ឋប្រហារប្រធានាធិបតីអិស្លាមនិយម មូហាម៉េដ មឺស៊ី កាលពីខែកក្កដា ឆ្នាំ២០១៣ ។
ប្រទេសនេះបានប្រកាសដាក់រដ្ឋស្ថិតក្នុងស្ថានភាពអាសន្នទៅលើតំបន់ស៊ីណាយនោះតាំងពីខែតុលា ឆ្នាំ២០១៤ ក្រោយមានការវាយប្រហារនៅក្នុងខេត្តស៊ីណាយនោះ ហើយត្រូវគេដឹងថា មានទំនាក់ទំនងជាមួយក្រុមរដ្ឋអិស្លាមនោះ ។
គេមិនទាន់ដឹងនៅឡើយថា ការបាញ់សម្លាប់ជនអន្តោប្រវេសន៍ទាំងនេះមានពាក់ព័ន្ធអំពើចលាចលនោះដែរឬយ៉ាងណាទេ ៕
ប្រែសម្រួល៖ ថាច់ យ៉ាត
