ភ្នំពេញ៖ រនាំងដែកពុះចែកទ្រូងផ្លូវចំនួន០៨ផ្ទាំងត្រូវបានបាក់ដាច់រាបស្មើរដល់ដីដោយសារតែ បុរសម្នាក់បើករថយន្ដបាឡែនមួយគ្រឿងក្នុងល្បឿនលឿនជ្រុលបុកពេញទំហឹងនិងរថយន្ដដាច់កាឡេបន្តដំណើរទៅមុខលែងរួច ។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង០៣ និង៤៥នាទីទាបភ្លឺថ្ងៃទី១៧ ខែវិឆ្ឆិកា ឆ្នាំ២០១៥ តាមបណ្ដោយផ្លូវ ព្រះមុនីវង្ស នៅចំណុចខាងជើងស្តុបផ្សារថ្មីប្រហែល៥០ម៉ែត្រ ស្ថិតក្នុងសង្កាត់មនោរម្យ ខណ្ឌ៧មករា រាជធានីភ្នំពេញ ។
សាក្សីនៅកន្លែងកើតហេតុបានអោយដឹងថា នៅមុនពេលកើតហេតុគេបានឃើញមានរថយន្ដមួយគ្រឿងម៉ាក កាមរីបាឡែន ពណ៍ស្ករ ពាក់ស្លាកលេខ ភ្នំពេញ2Q-2529 បើកបរដោយបុរសម្នាក់និងរួមដំណើរជាមួយមិត្តភ័ក្ដម្នាក់ទៀត ដោយធ្វើដំណើរតាមបណ្ដោយផ្លូវ ព្រះមុន្នីវង្ស ទិសដៅពីជើងទៅត្បូងក្នុងល្បឿនលឿនលុះមកដល់ចំណុចកើតហេតុក៏រេចង្កូតទៅបុករះរនាំងដែកពុះចែកទ្រូងផ្លូវបណ្ដាលអោយបាក់អស់ចំនួន០៨ផ្ទាំង និងរថយន្ដដាច់កាឡេខាងមុខផ្នែកខាងឆ្វេងបន្តដំណើរទៅមុខលែងរួច ។
ក្រោយកើតហេតុកម្លាំងសមត្ថកិច្ចមូលដ្ឋានបានចុះដល់កន្លែងកើតហេតុ និងបានសហការណ៍ជាមួយកម្លាំងជំនាញចុះធ្វើការវាស់វែងស្ទូចយករថយន្ដបង្កយកទៅរក្សាទុកនៅការិយាល័យចរាចរណ៍រាជធានិភ្នំពេញ ដើម្បីរងចាំធ្វើការដោះស្រាយនៅពេលក្រោយ ៕
ដោយ៖ ស រស្មី
