ភ្នំពេញ៖លោក គឹម សន្តិភាព រដ្ឋលេខាធិការនិងជាអ្នកនាំពាក្យក្រសួងយុត្តិធម៌ បញ្ជាក់ថា តាមច្បាប់ស្តីពីពន្ធនាគារ បញ្ជាក់យ៉ាងច្បាស់ថា មានតែនាយករដ្ឋមន្ត្រីម្នាក់ប៉ុណ្ណោះ មានបុព្វសិទ្ធិពិសេសធ្វើសំណើថ្វាយព្រះមហាក្សត្រ សុំលើកលែងទោសទណ្ឌិតនៅពេលណាក៏បាន ។
លោក គឹម សន្តិភាព បញ្ជាក់នៅយប់ថ្ងៃទី១១ ខែវិច្ឆិកា ឆ្នាំ២០១៨ នេះ ថា “នេះជាបុព្វសិទ្ធិរបស់នាយករដ្ឋមន្ត្រីកម្ពុជា តាមច្បាប់កម្អុជា ។ ការស្នើលើកលែងទោសទណ្ឌិតណាម្នាក់នៅពេលណាក៏បាន គឺមានតែនាយករដ្ឋមន្ត្រីម្នាក់ប៉ុណ្ណោះដែលមានបុព្វសិទ្ធិស្នើទៅព្រះមហាក្សត្រ យោងតាមមាត្រា៧៧នៃច្បាប់ស្តីពីពន្ធនាគារ ។
មាត្រា៧៧នៃច្បាប់ស្ដីពីពន្ធនាគារ ចែងថា”ក្នុងករណីចាំបាច់ ប្រមុខរាជរដ្ឋាភិបាលមានបុព្វសិទ្ធិធ្វើសំណើថ្វាយព្រះមហាក្សត្រសុំលើកលែងទោសឲ្យទណ្ឌិតនៅពេលណាក៏បាន”។
លោក គឹម សន្តិភាព បន្តថា ពាក្យថា”ទណ្ឌិត” គឺជាជនទាំងឡាយណាដែលមានសេចក្តីសម្រេចផ្តន្ទាទោសស្ថាពរពីតុលាការ ។
ការប្រើប្រាស់ ឬមិនប្រើប្រាស់បុព្វសិទ្ធិពិសេសនេះ ជាការសម្រេចរបស់នាយករដ្ឋមន្ត្រី ហើយពុំមែនជាការជ្រៀតជ្រែកអំណាចតុលាការនោះទេ ព្រោះតុលាការបានអនុវត្តអំណាចតាមឆន្ទានុសិទ្ធិរបស់ខ្លួនតាមច្បាប់ចប់សព្វគ្រប់ហើយ ៕
ដោយ៖ចេស្តា
