ភ្នំពេញ៖ ជនសង្ស័យម្នាក់ ក្នុងចំណោមបក្ខពួក២នាក់
ត្រូវកម្លាំងនគរបាលខណ្ឌដូនពេញឃាត់ខ្លួន ក្រោយពីពួកគេទាំង ២នាក់ធ្វេីសកម្មភាពឆក់កាបូបពីជនបរទេសបានសម្រេចតែរត់មិនរួច។ ហេតុការណ៍បានកេីតឡេីងកាលពីម៉ោង ៤រសៀល ថ្ងៃទី២៦ ខែមករា ឆ្នាំ២០១៩ នៅតាមផ្លូវលេខលេខ១៨៤ ស្ថិតនៅក្នុងសង្កាត់ជ័យជំនៈ ខណ្ឌដូនពេញ រាជធានីភ្នំពេញ។
សមត្ថកិច្ចបានឲ្យដឹងថាជនសង្ស័យឈ្មោះ អន់ ស៉ីដេត អាយុ ២០ឆ្នាំ មុខរបរ មិនពិតប្រាកដ ស្នាក់នៅផ្ទះភូមិព្រែកតាអុង ឃុំពាមឧកញ៉ាអុង ស្រុកល្វាឯម ខេត្តកណ្តាល និងម្នាក់ទៀតឈ្មោះ អាលុង អាយុប្រហែល ២០ឆ្នាំជាង មុខរបរ មិនពិតប្រាកដ ស្នាក់នៅផ្ទះខាងក្រោយប៉ុស្តិ៍នគរបាលទួលសង្កែ ភូមិផ្សារតូច សង្កាត់ទួលសង្កែ១ ខណ្ឌឫស្សីកែវ រាជធានីភ្នំពេញ។
ប្រភពព័ត៌មានពីសមត្ថកិច្ចបានប្រាប់ឲ្យដឹងថា មុនពេលកេីតហេតុ គេឃេីញមានជនជាតិបរទេសចំនួន ២នាក់ បានធ្វេីដំណេីរតាមផ្លូវលេខ១៨៤ ខណៈមកដល់កន្លែងកេីតហេតុ ស្រាប់តែមានជនសង្ស័យចំនួន ២នាក់ ជិះម៉ូតូ មួយគ្រឿង ម៉ាក ហុងដាសង់ សេ១២៥ ពណ៌ខ្មៅ ពាក់ស្លាកលេខ ភ្នំពេញ 1GE-8005 បានជិះមកជិតរួចបានធ្វេីសកម្មភាពឆក់កាបូបរបស់ជនបរទេសខាងលេីបានសម្រេច តែត្រូវកម្លាំងសមត្ថកិច្ចនៅជិតនោះ ធ្វេីការដេញតាមរហូតឃាត់ខ្លួនជនសង្ស័យបានម្នាក់ រឺឯម្នាក់ទៀតបានរត់គេចខ្លួនបាត់តែម្តង។
ក្រោយពេលកេីតហេតុ កម្លាំងសមត្ថកិច្ចបានបញ្ជូនខ្លួនជនសង្ស័យ មកកាន់អធិការដ្ឋាននគរបាលខណ្ឌដូនពេញ ដេីម្បីសាកសួរស្វែងរកឃាត់ខ្លួនបក្ខពួកម្នាក់ទៀតយកមកផ្តន្ទាទោសទៅតាមច្បាប់៕
ដោយ៖ ជ្រោយពេជ្រ
