អាមេរិកបានបង្កើនទណ្ឌកម្ម ទៅលើប្រទេសអ៊ីរ៉ង និងឡោមព័ទ្ធអ៊ីរ៉ង់ដោយកម្លាំងយោធា​ ប៉ុន្តែអ៊ីរ៉ង មិនខ្វាយខ្វល់ពីសកម្មភាព របស់អាមេរិកនោះឡើយដោយបង្កើន ការផលិតមីស៊ីលនិងបរមាណូ ក៏ដូចជាការខិតខំអភីវឌ្ឍន៍សេដ្ឋកិច្ចជាតិ​។

មេដឹកនាំជាន់ខ្ពស់អ៊ីរ៉ង់លោក​ Ali Khamenei ​បានបញ្ជាក់នឹងមិនបោះបង់កម្មវិធីមីស៊ីលនិងបរមាណូនោះឡើយ​ ហើយអ៊ីរ៉ង់និងមិនធ្លាក់ចូលក្នុងអន្ទាក់ ​គឺសំណើរពិភាក្សាជាមួយអាមេរិក របស់ប្រធានាធិបតីដូណាលត្រាំ​។

មេដឹកនាំជាន់ខ្ពស់ អ៊ីរ៉ង់ លោក Ali Khamenei កាលពីថ្ងៃទី​៤ខែមិថុនាបានប្រកាសខាងលើ ក្រោយពេល លោកត្រាំស្នើពិភាក្សា បន្ទាប់ពីប្រទេសទាំងពីរឈានដល់ដំណាក់កាលប្រឈម​មុខតានតឹងបំផុត ក្រោយរយៈពេល​១ឆ្នាំដែល លោកត្រាំដកខ្លួនចេញពីកិច្ចព្រមព្រៀងបរមាណូ ជាមួយអ៊ីរ៉ង់​។

លោក​ Ali Khamenei បានបន្តទៀតថា អាមេរិក និង មិនអាច​លុបបំបាត់សមត្ថភាព ផលិតមីស៊ីលរបស់អ៊ីរ៉ង់បានឡើយ​ ហើយអាមេរិកក៏មិនអាចផ្លាសប្តូរ របបដឹកនាំរបស់អ៊ីរ៉ង់នោះដែរ​។ លោក​ Ali Khamenei បញ្ជាក់ទៀតថា អាមេរិក បានដាក់ទណ្ឌកម្ម បង្កផលលំបាកយ៉ាងខ្លាំងដល់ ពលរដ្ឋអ៊ីរ៉ង់   ដូច្នេះរដ្ឋាភិបាលអ៊ីរ៉ង់ចាំបាច់ត្រូវតែ កែទម្រងសេដ្ឋកិច្ច ជាសំខាន់ ដើម្បីជួយដល់ជីវភាពរស់នៅរបស់ពលរដ្ឋកាន់តែប្រសើរ​។

កន្លងមក ប្រធានាធិបតីដូណាលត្រាំបានបញ្ជាក់ថា កិច្ចព្រមព្រៀងបរមាណូ អ៊ីរ៉ង់ ដែលចុះហត្ថលេខាដោយអតីតប្រធានាធិបតីបារ៉ាក់អូបាម៉ា  គឺមិនមានប្រសិទ្ធិភាព នោះឡើយ ដោយមិនបូកបញ្ចូលទាំកម្មវិធីបរមាណូ ក៏ដូចជាតួនាទីរបស់អ៊ីរ៉ង់នៅតំបន់មជ្ឈិបូព៌ា។

កន្លងមក អ៊ីរ៉ងបានចាត់ទុកទណ្ឌកម្មរបស់អាមេរិកគឺជាសង្គ្រាមសេដ្ឋកិច្ច ហើយមិនមានការចរចាជាមួយសហរដ្ឋអាម៉េរិកទេ រហូតដល់ទណ្ឌកម្មត្រូវបានដកចេញ ពោលគឺមួយថ្ងៃគត់បន្ទាប់ពីរដ្ឋាភិបាលក្រុងវ៉ាស៊ីនតោនបានលើកឡើងថា ខ្លួនអាចរៀបចំកិច្ចចរចាដោយគ្មានបុរេលក្ខខណ្ឌ ប្រសិនបើអ៊ីរ៉ង់ផ្លាស់ប្តូរឥរិយាបថរបស់ខ្លួន។

រដ្ឋមន្ត្រីការបរទេសអ៊ីរ៉ង់ លោកម៉ូហាម៉ាត់ ចាវ៉ាត ហ្សារីហ្វ បានសរសេរនៅលើ Twitter អមជាមួយវីដេអូឃ្លីបនៃស្ត្រីម្នាក់ ដែលនិយាយថា ជើងសិប្បនិម្មិតដែលកូនប្រុសគាត់ត្រូវការត្រូវបានដាក់ទណ្ឌកម្ម យ៉ាងដូច្នេះថា “ភេរវកម្មសេដ្ឋកិច្ចលើអ៊ីរ៉ង់បានផ្តោតគោលដៅទៅលើជនស៊ីវិលស្លូតត្រង់។ ដូចក្មេងប្រុសតូចម្នាក់នេះអ៊ីចឹង ម្តាយខូចចិត្តរបស់ក្មេងនេះមិនអាចទទួលបានជើងសិប្បនិម្មិតសម្រាប់កូនប្រុសទេ នៅពេលកូនធំដឹងក្តី។ ជើងសិប្បនិម្មិតត្រូវបានដាក់ទណ្ឌកម្ម”។

ទីភ្នាក់ងារសារព័ត៌មានរ៉យទ័រមិនអាចផ្ទៀងផ្ទាត់ភាពត្រឹមត្រូវនៃវីដេអូនោះបានទេ។

លោកហ្សារីហ្វបានបន្ថែមនៅក្នុង Twitter ថា “នេះគឺជាសង្គ្រាមសេដ្ឋកិច្ចរបស់ដូណាល់ ត្រាំ។ ហើយសង្គ្រាមនិងការចរា ទោះមានឬគ្មានបុរេលក្ខខណ្ឌ គឺមិនស៊ីគ្នានោះទេ”។

រដ្ឋមន្ត្រីការបរទេសអាម៉េរិក លោកម៉ៃ ផមផេវ បាននិយាយកាលពីថ្ងៃអាទិត្យទី២មិថុនាថា សហរដ្ឋអាម៉េរិកបានត្រៀមខ្លួនដើម្បីចូលរួមចរចាជាមួយអ៊ីរ៉ង់ដោយគ្មានបុរេលក្ខខណ្ឌអំពីកម្មវិធីនុយក្លេអ៊ែររបស់អ៊ីរ៉ង់ ប៉ុន្តែត្រូវឃើញប្រទេសនេះប្រព្រឹត្តដូច “ប្រទេសជាតិធម្មតាដទៃទៀត” ជាមុនសិន។

ភាពតានតឹងរវាងសត្រូវទាំងពីរបានកើនឡើងកាលពីខែមុន ពោលគឺមួយឆ្នាំបន្ទាប់ពីសហរដ្ឋអាម៉េរិកបានដកខ្លួនចេញពីកិច្ចព្រមព្រៀងមួយរវាងអ៊ីរ៉ង់និងមហាអំណាចពិភពលោកដើម្បីទប់ស្កាត់កម្មវិធីនុយក្លេអ៊ែររបស់អ៊ីរ៉ង់ដើម្បីជាថ្នូរនឹងការដកទណ្ឌកម្ម។

រដ្ឋាភិបាលក្រុងវ៉ាស៊ីនតោនបានដាក់ទណ្ឌកម្មកាលពីឆ្នាំមុននិងរឹតបន្តឹងអ៊ីរ៉ង់យ៉ាងខ្លាំងនៅដើមខែនេះដោយបញ្ជាឱ្យប្រទេសទាំងអស់បញ្ឈប់ការនាំចូលប្រេងរបស់អ៊ីរ៉ង់។ អាម៉េរិកក៏បានព្រលយផងដែរអំពីការប្រឈមមុខដាក់គ្នាផ្នែកយោធាដោយបញ្ជូនកងកម្លាំងបន្ថែមទៅតំបន់មជ្ឈិមបូព៌ាដើម្បីប្រឆាំងនឹងអ្វីដែលខ្លួនពណ៌នាថាជាការគំរាមកំហែងពីអ៊ីរ៉ង់។

សម្រាប់អ៊ីរ៉ង់វិញគឺបានឆ្លើយតបដោយគំរាមបង្កើនផលិតកម្មអ៊ុយរ៉ានីញ៉ូមបន្ថែមពីលើដែនកំណត់នៅក្នុងកិច្ចព្រមព្រៀងនុយក្លេអ៊ែរ បើទោះបីជាមិនទាន់បានធ្វើដូច្នេះក៏ដោយ។

ភាគីទាំងពីរបានធ្វើការកត់សម្គាល់ម្តងហើយម្តងទៀតក្នុងរយៈពេលប៉ុន្មានសប្តាហ៍ថ្មីៗនេះអំពីលទ្ធភាពចរចាដើម្បីដោះស្រាយការខ្វែងគំនិតគ្នារបស់ពួកគេ ដោយនិយាយថា ភាគីម្ខាងទៀតត្រូវធ្វើសកម្មភាពជាមុនសិន។

នៅពេលនេះដែរ​អាមេរិកបានបញ្ជូន នាវាផ្ទុកយន្តហោះ យ៉ាងប្រញាប់ប្រញាល់ទៅកាន់តំបន់មជ្ឈិមបូព៌ាដើម្បីទប់ទល់ការគំរាមគំហែងរបស់អ៊ីរ៉ង់គឺនៅស្ថិតនៅខាងក្រៅឈូងសមុទ្រពែក្សនៅឡើយទេរហូតមកដល់ពេលនេះដោយជៀសវាងការប្រឈមមុខគ្នាជាមួយកងកម្លាំងឆ្មាំបដិវត្តន៍អ៊ីរ៉ង់ ស្របពេលមានកិច្ចប្រឹងប្រែងដើម្បីកាត់បន្ថយភាពតានតឹងរវាងរដ្ឋាភិបាលក្រុងតេអេរ៉ង់និងរដ្ឋាភិបាលក្រុងវ៉ាស៊ីនតោន។

ក្រុមមន្ត្រីដែលស្ថិតនៅលើនាវាផ្ទុកយន្តហោះអាម៉េរិក USS Abraham Lincoln នេះបាននិយាយប្រាប់ទីភ្នាក់ងារសារព័ត៌មានAP កាលពីថ្ងៃចន្ទទី៣មិថុនាថា ពួកគេ(កងទ័ពអាម៉េរិក)អាចឆ្លើយតបយ៉ាងរហ័សចំពោះការគំរាមកំហែងក្នុងតំបន់ចេញពីទីតាំងរបស់ពួកគេ ដោយសារពួកគេស្ថិតនៅប្រហែល៣២០គីឡូម៉ែត្រនៅឯនាយឆ្នេរសមុទ្រនៃប្រទេសអូម៉ង់ នៅសមុទ្រអារ៉ាប់ ។

ទោះជានាវាផ្ទុកយន្តហោះអាមេរិកច្រើនគ្រឿងធ្លាប់ធ្វើនាវាចរណ៍អស់ជាច្រើទសវត្សរ៍កាត់ច្រកសមុទ្រHormuz ដែលជាចក្រសមុទ្រតូចនៃសមុទ្រពែក្សដែល១ភាគ៣នៃពាណិជ្ជកម្មប្រេងទាំងអស់ឆ្លងកាត់សមុទ្រនេះ ក៏កងទ័ពជើងទឹកអាមេរិកសម្រេចចិត្តរក្សាទុកនាវាផ្ទុកយន្តហោះUSS Abraham Lincoln នេះនៅឆ្ងាយពីវាបន្តិច។

មេបញ្ជាការនៃនាវាអាម៉េរិកនេះ បាននិយយាប្រាប់សារព័ត៌មានAPថា ” យើងមិនចង់ធ្វើអ្វីមួយឱ្យមានភាពតានតឹងនោះទេ” ។

កាលពីខែឧសភា សេតវិមានបានបញ្ជូននាវាផ្ទុកយន្តហោះនេះនិងយន្តហោះទម្លាក់គ្រាប់បែកB-52ទៅកាន់ឈូងសមុទ្រពែក្ស។សហរដ្ឋអាម៉េរិកក៏មានគម្រោងបញ្ជូនទាហានបន្ថែមចំនួន៩០០នាក់ផងដែរទៅតំបន់មជ្ឈិមបូព៌ានិងពង្រីកការបោះទីតាំងនៃកងទ័ពចំនួន៦០០នាក់ផ្សេងទៀត ខណៈដែលទាហានរាប់ម៉ឺននាក់ផ្សេងទៀតបានមានវត្តមាននៅលើដីគោក នៅទូទាំងតំបន់នោះផងដែរ៕